จำนวนผู้เล่น : ๘ คนขึ้นไป

สถานที่และการเตรียม : เดิ่นหรือบริเวณกว้างๆ

การคัดโต : คัดออกมาสองคนหรือหนึ่งคู่ โดยวิธี จ้ำ ปิ่ง จ้ำ ดอง หรือ อาสาสมัคร

กติกา :

• คู่หนอน หรือคู่ถืกตัด กำหนดอย่างน้อยต้องสองคน
• คู่หนอน ทำหน้าที่ตัดแบ่งคนออกเป็นคู่กัน แล้วกะแล่นอ้อมวงเพื่อเข้าแทนที่
• คู่ถืกตัด ทำหน้าที่ รักษาหม่องหรือตำแหน่งเจ้าของไว้ โดยแล่นอ้อมวง ในทิศทางตรงข้ามกับคู่หนอน
• การแล่นอ้อมวงของคู่หนอน ให้แล่นในทิศทางเดิม ที่เจ้าของย่างเวียนอยู่
• การตัดแบ่งคนออกเป็นคู่กัน โดย คู่หนอนคนใดคนหนึ่ง เอามือตัดหรือฟันลง หม่องที่เขาจับกันไว้ ให้มือสองคนที่จับกัน ขาดออกจากกัน (หม่องที่หนึ่ง) จากนั้น นับไปหนึ่งคู่ กะไปตัดมือของคนถัดไป ให้ขาดออกจากกัน... หม่องที่ถืกตัด กะสิได้สองคน หรือคู่หนึ่ง
• การเข้าแทนที่ หรือการรักษาหม่อง... ต้องแล่นอ้อมให้ครบหนึ่งรอบก่อน
• การเข้าแทนที่ หรือการรักษาหม่อง... ฝ่ายที่จับมือคนที่ยืนอยู่ ได้ก่อน ถือว่าถึงก่อน เป็นฝ่ายชนะ ...โดยการถึงก่อน ต้องถึงทั้งสองคน
• ถ้าผู้หนึ่งแล่นเร็ว คู่ขาด (มือที่จับกันหลุดจากกัน) ผู้หนึ่งไปถึงหม่องแทนที่แล้ว แต่อีกผู้หนึ่ง ยังมาบ่ถึง... ฝ่ายที่มาถึงสองคนก่อน เป็นฝ่ายชนะ
• ฝ่ายชนะ ได้ครอบครอบหม่องนั้น
• ฝ่ายแพ้ เป็นหนอน ทำหน้าที่หาตัดคู่

วิธีการเล่น :

ผู้เล่นคู่ที่เป็นผู้ตัด หรือสิเอิ้นว่าหนอน กะได้ ยืนอยู่ต่างหาก... ผู้เล่นที่เหลือ ทุกคน ยืนจับมือกัน แล้วกะขยายวงออก ให้ใหญ่พอสมควร ...การจับมือกัน ควรจับแบบหลวมๆ เพื่อให้ตัดขาดง่ายๆ สิได้บ่เจ็บมือ บ่เจ็บแขน...

คู่ที่เป็นหนอน จับมือกัน ย่าง หรือแล่นช้าๆ อ้อมวง หาคู่ที่เหมาะ หรือหาหม่องที่เจ้าของอยากไปแทนที่ (หรือว่าอยากตัดคู่ได๋กะตัดโลด) พอตัดสินใจได้ ว่าสิเอาคู่ได๋ ...คนใดคนหนึ่ง กะเอามือตัดหม่องที่เขาจับกัน ให้ขาดออกจากกัน หนึ่งหม่อง แล้วกะไปตัดอีกหม่องหนึ่ง ให้ได้สองคน หรือว่าคู่หนึ่งพอดี จากนั้น กะฟ้าวแล่นอ้อมวง ในทิศทางเดิมที่เจ้าของ ย่างหรือแล่นช้าๆ อยู่ก่อนแล้ว เพื่อสิเข้าแทนที่หม่องที่ว่างอยู่นั้น

ส่วนสองคนที่ถืกตัดแบ่งออกให้เป็นคู่กัน พอฮู้โตว่าถืกตัดแล้ว กะฟ้าวแล่นอ้อมวง ในทิศทางตรงข้ามกับคู่ที่เป็นหนอน (เช่น คู่หนอน แล่นวนขวา... คู่ที่ถืกตัด กะแล่นวนซ้าย) เพื่อกลับมาเข้าหม่องเจ้าของ เพื่อรักษาหม่องของเจ้าของไว้

กรณีคู่หนอน แล่นช้า เข้าแทนที่บ่ทัน กะต้องเป็นหนอนต่อ หาตัดคู่ต่อ สิตัดคู่เก่าเพื่อลองแข่งใหม่อีกรอบ กะได้ สิตัดคู่ใหม่กะได้ จนกว่า สิสามารถเข้าแทนที่ เข้าแทนหม่องของคู่ที่ตัดได้

กรณีคู่ถืกตัด แล่นช้า เข้าหม่องเจ้าของบ่ทัน ถืกคู่หนอนแย่งหม่องไป ...คู่ถืกตัดนั้น กะต้องไปเป็นคู่หนอน แล้วกะหาตัดคู่ ต่อไป