---

สวีดัส  ไปหมี่   สวัสดีปีใหม่

ผู้หนุ่ม ผู้สาว ผู้บ่าว ผู้แพว เอื้อย อ้าย น้อง หนุ่ง ลุง ป้า น้า อา ครูบา อาจารย์ ท่านประธาน ท่านเลขา พี่น้องชาวอีสาน ลูกข้าวเหนียวลูกข้าวจ้าว และผู้เข้ามาเยี่ยมชมสู่ผู้สู่คน  สิบนิ้วอันไร้แหวน สองเขนอันดำขี้หลี่ของผู้ข้า sinponglang ขอกล่าวคำว่าสวัสดีปีใหม่ย้อนหลังพี่ ๆ น้อง ๆ ชาวอีสาน ๑๙ จังหวัด ทุกท่านทุกคน (คงสิบ่อสายไปนอครับนอ)  บ่อหว่าสิเป็นพี่น้องชาว

กาฬสินธุ์ เมืองโปงลางผ้าแพรวา    ขอนแก่น  เมืองดอกคูณเสียงแคน    ชัยภูมิ   เมืองลูกพ่อพญาแล งามแท้ทุ่งดอกกระเจียว นครพนม เมืองพระธาตุอีสาน(พระธาตุพนม)    นครราชสีมา   เมืองหลานย่า เมืองราชาหมี่แซบ    บุรีรัมย์   เมืองปราสาทหิน ถิ่นภูเขาไฟ    มุกดาหาร   เมืองอ้ายลาวสาวภูไท    มหาสารคาม   เมืองพุทธมณฑลอีสาน (สะดืออีสาน)    ยโสธร   เมืองบั้งไฟโก้ แตงโมหวาน    ร้อยเอ็ด   เมืองข้าวปุ้น เมืองบุญผะเหวด เขตเจดีย์งาม    เลย   เมืองผีตาโขน มนต์ดอกฝ้ายขาว    ศรีสะเกษ   เมืองดอกลำดวน    สกลนคร  เมืองภูพาน ลูกหลานญ้อ     สุรินทร์   เมืองถิ่นสุรา เมืองราชาช้าง    หนองคาย   เมืองน้องลาวอ้ายไทย เมืองบั้งไฟพญานาค    หนองบัวลำภู   เมืองนครเขื่อนขันธ์ หลานสมเด็จนเรศวร    อุดรธานี   เมืองข้าวหลามอีสาน แดนตำนานผ้าหมี่ขิด    อุบลราชธานี   เมืองเสียงพิณถิ่นดอกบัวบาน    อำนาจเจริญ   เมืองเจ็ดลุ่มน้ำ ลือนามพระใหญ่(พระมงคลมิ่งเมือง)

มื้อนี้ถือเป็นโอกาสและบุญของ sinponglang แท้ ๆ ที่ได้เข้ามาเขียนข่าวสารวานทัก  พี่น้องป้องปายชมรมอีสานจุฬาฯเฮา รวมถึงสมาชิกอีสานจุฬาฯแฟนคลับ และผู้ที่เข้ามาเยี่ยมชม  ผู้มีใจฮักในประเพณีวัฒนธรรมอันทรงคุณค่าของชาวอีสานอย่างแท้จริง  สังเกตได้จาก sinponglang เข้ามาเยี่ยมยามได๋  กะได้สัมผัสถึงความฮักและความอบอุ่นที่คนบ้านเดียวกันฝากฮอดกันแทนความคิดถึงเสมอหว่ายังฮักคือเก่า  ถือเป็นแฟนพันธุ์แท้ของชมรม ที่บ่แหม่นแฟนเก็บกะหว่าได้  ยังคิดถึงชมรมเฮาตลอด คิดฮอดชมรมเฮาเสมอ แอบฮักแอบคิดถึงกันและกันอยู่ทุกยาม  นี่หละครับพี่น้องครับ เผิ่นจั่งเอิ้นหว่าลูกอีสานเต็มตัว เหยียบขี้งัวเต็มตีนของแท้ (ขออภัยที่ใช้คำบ่สุภาพ) กะขอย้องใจทีมงานผู้เผิ่นเขียนเว็บนี้หลาย ๆ เด้อครับเด้อ ที่ได้เปิดโอกาสให้ชาวอีสานเฮาได้แสดงออกถึงความเป็นอีสาน และขอขอบคุณทุกแรงใจ ที่เข้ามาเยี่ยมยามกันตลอดบ่ได้ขาด  กะถือหว่าส่ำเป็นบ้านของเฮานอครับนอ  แต่สำหรับ sinponglang เองก็เข้ามาเรื่อย ๆ อยู่ครับ แต่กะบ่อค่อยได้โพสต์ปานได๋ คอยเป็นผู้ถ่าจอบหลอยและผู้อยู่เบื้องหลัง โดน ๆ กะจั่งได้เขียนผญาเข้ามาโพสนำเผิ่น ย้อนยากนำการนำงาน แต่สำหรับ sinponglang เอง พี่น้องเฮากะยังคงอยู่ในใจเสมอนั่นหละครับ  อาจจะขอเป็นกำลังใจที่เธอไม่รู้ให้ทุกท่านได้แสดงออกถึงความเป็นอีสานได้เต็มที่แล้วกัน  ของดีบ้านเฮาภูมิปัญญาอีสานบ้านเฮามีหยังแหน่กะซ่อยกันนำเสนอเด้อครับเด้อ  เพราะของ ๆ เฮา คันเฮาบ่ซ่อยกันไผสิซ่อย แหม่นบ่ครับพี่น้อง

ดังนั้นแล้ว กะขอให้พี่น้องเฮาทุกท่านซ่อยกันเต็มที่ sinponglang เชื่อหว่าอีสานเฮาแห่งนี้ บ่มีคำหว่าสิ้นปราชญ์อีสานแน่นอนครับ  สุดท้ายแห่งการได้เข้ามายามเว็บชมรมอีสานจุฬาฯเถื่อนี่ sinponglang กะบ่อมีหยังสิฝากเป็นของขวัญปีใหม่ให้พี่ให้น้องเฮา กะคงสิมีแต่พร คือ คำเว้าดี ๆ อวยพรให้พี่ ๆ น้อง ๆ เฮาทุกคน จงมีแต่ความสุขความเจริญ

          ซื่อหว่าความพ่ายแพ้ จนทรัพย์อับปัญญา   อย่าสิมากวมกกเกี่ยวกอให้กลอยกลั้น
อายุยืนยาวมั่นเสมอกันดอกกว่าเก่า              ขอให้ซุมหมู่เจ้าสำราญชื่นอยู่เกษม
ขอให้เต็ม ๆ ล้นเงินคำอั่งนองใหล                ขอให้ใสเฮิง ๆ หุ่งเฮืองไปหน้า
เฮ็ดไฮ่ให้หมานปลา เฮ็ดนาให้หมานฝ้าย        ให้อยู่สุขซำบายหายฮ้อนนอนอั่ง
เงินคำหลั่งอั่งเต้าโฮมเจ้าผู้สู่คน                   ให้สุขล้นกว่าสู่ปีเด้อ พี่น้องเด้อ...

สวัสดีมีความสุขกับปี ๒๕๕๓ เด้อครับเด้อ....สวัสดีครับ

---