จำนวนผู้เล่น : ประมาณแปดคน หรือสี่คู่ขึ้นไป (ถ้าคนบ่หลาย กะควรสิเล่นหนอนธรรมดา)

สถานที่และการเตรียม :

เดิ่นหรือบริเวณกว้าง ๆ หม่องได๋กะได้.... ผู้เล่นทุกคนจับคู่กัน ตามความชอบใจ หรือสมัครใจว่า เจ้าของอยากคู่กับผู้ได๋ สิเป็นญิงกับญิง ชายกับชาย หรือญิงกับชาย กะได้ ได้คู่แล้ว กะจับมือกันไว้ เพื่อแสดงว่าเจ้าของมีคู่แล้ว ถ้าคู่ได๋ บ่อยากจับมือกัน กะสามารถสิเอาไม้มาจับ กะได้ (สองคนจับคนละส้น) .....ถ้าจับคู่กันแล้ว เหลือเศษผู้นึง หรือว่ามีผู้นึง บ่มีคู่นำหมู่ กะอนุโลมให้ผู้นั้น ไปอยู่กับคู่ได๋กะได้ กะสิเฮ็ดให้คู่นั้น มีสามคน (อาจสิแล่นยากจักหน่อย)

การคัดโต : วิธี จ้ำ ปิ่ง จ้ำ ดอง

วิธีการเล่น :

คู่ที่เป็น หนอน ต้องไล่คุมแต้ม (เอามือแตะ) คู่อื่น แต้มถืกผู้ได๋ผู้นึงของคู่ได๋ คู่นั้นกะเป็นหนอนแทน แล้วกะหาไล่คุมแต้มคู่อื่นๆ ต่อไป

ซุมบ่เป็นหนอน กะแล่นหนี แล่นหลบ บ่ให้หนอนแต้มถืก เทิงต้องระวังบ่ให้มือหลุดจากกัน (สำหรับผู้จับไม้แทนมือ กะต้องบ่ให้มือหลุดจากไม้) ถ้าคู่ได๋มือหลุดจากกัน คู่นั้น กะกลายเป็นหนอนแทน ทันที ...ถ้าหนอน ขี้คร้านไล่คุม ซุมบ่แมนหนอน กะพยายามเว้ายั่วให้หนอนไล่คุม ว่า

“ หนอนบ่ไล่ มักไก่ตาตูม หนอนบ่คุม มักไก่ตาบอด..”

กติกา :

• หนอน สิพ้นความเป็นหนอน ต่อเมื่อ ต้องแต้มถืกผู้อื่น หรือว่า คู่ได๋คู่นึง มือหลุดจากกัน
• คู่ที่ถืกหนอนแต้ม ต้องกลายเป็นหนอนแทน
• การแต้ม ห้ามแต้มคืน หรือว่าห้ามแต้มเอาคู่เก่า (ที่เพิ่งพ้นความเป็นหนอน)
• ถ้าคู่ได๋ มือหลุดจากกัน ถือว่าคู่นั้น “ลุ่น” ต้องกลายเป็นหนอน ทันที