เป็นการดึงลาก คนของฝ่ายตรงข้าม ที่ออกมาล่อ ให้เลยเส้นตาย คล้ายๆ กับเล่น “อี” ต่างกันคือ บ่มีการ “อี” หรือ บ่ต้องกลั้นหายใจ

จำนวนผู้เล่น : ๔ คนขึ้นไป

สถานที่และการเตรียม :

เดิ่นกว้าง ๆ พอสมควร.... ขีดเส้นขึ้นมาหนึ่งเส้น เป็นเส้นกลาง หรือเส้นแบ่งเขต ซึ่งเส้นนี้ กะคือ เส้นช่วยชีวิต จากนั้น กะก้าวนับจากเส้นกลางนั้น ออกไปทั้งสองฟาก ฟากละประมาณ ๑๐ ก้าว (หรือระยะที่เห็นว่าพอเหมาะ) แล้วกะขีดเส้นแนวขนาน ขึ้นมาอีก ซึ่งเส้นนี้ กะคือ เส้นตาย นั่นเอง

การจัดไท : วิธีการ ปาว ปิ่ง ป้ง

การเลือกไทเล่นก่อน : วิธีการ ปาว ปิ่ง ป้ง

วิธีการเล่น :

ผู้เล่นทั้งสองฝ่าย ไปยืนอยู่ด้านหลังเส้นตายของฝั่งไผฝั่งมัน ไทที่ได้เล่นก่อน ส่งโตแทนไปผู้หนึ่ง เป็นผู้ได๋กะได้ ออกไปในเขตของฝ่ายตรงข้าม ล่อแต้มเอาฝ่ายตรงข้าม ซึ่งต้องพยายามไปล่อแต้ม เอาฝ่ายตรงข้ามให้ได้ ...ทางฝ่ายตรงข้าม กะต้องหลบ โดยการแล่นหลบ หรือแล่นหนีไปอยู่หลังเส้นตาย.. เพราะว่าผู้ล่อแต้ม เลยเส้นตายไปบ่ได้... พร้อมกันนั้น กะต้องพยายามหาทาง จับผู้ล่อแต้ม แล้วกะดึง ลาก หรือยก ให้เลยเส้นตาย

ผู้ล่อแต้ม ถ้าแต้มเอาไผบ่ได้เลย หรือบ่ถืกจับลากเลยเส้นตาย ...สมควรแก่เวลาแล้ว สิกลับเขตเจ้าของ เพื่อเปลี่ยนให้อีกฝ่าย เป็นคนออกมาล่อแต้ม กะได้

จากนั้น กะถึงทีของอีกไทหนึ่ง เป็นฝ่ายออกมาล่อแต้ม ...ไทนั้น กะส่งโตแทน ออกมาหนึ่งคนคือกัน.. ย่างเซิ่น แล่นเซิ่นหาไล่แต้มเอา คือกัน

กรณีที่ผู้ล่อแต้ม แต้มได้ฝ่ายตรงข้าม ผู้ได๋กะตาม สิเป็นหนึ่งคน สองคน สามคน กะดี แล้วกะผู้ล่อแต้มนั้น สามารถกลับเข้าเขต แตะเส้นช่วยชีวิตได้ ผู้ที่ถืกแต้มเทิงเหมิด ต้อง “ตาย”

กรณีที่ผู้ล่อแต้ม แต้มได้ฝ่ายตรงข้ามผู้ได๋ผู้หนึ่งแล้ว ...ขณะที่กำลังสิแล่นกลับเข้าเส้นช่วยชีวิต ถืกจับไว้ โดยฝ่ายตรงข้าม คนเดียวหรือหลายคนก็ดี แล้วกะถืกลากไปจนเลยเส้นตาย ผู้ที่ล่อแต้ม นั้น ต้อง “ตาย” ...ส่วนผู้ที่สัมผัสกับผู้ล่อแต้ม นั้น ทุกคน กะรอดชีวิต แล้วกะสามารถฆ่า ผู้ล่อแต้ม ซึ่งเป็นฝ่ายตรงข้าม ได้หนึ่งคน ...ในทางกลับกัน ถ้าผู้ล่อแต้ม ดิ้นหนีไปแตะเส้นช่วยชีวิตได้ ผู้ล่อแต้มนั้น กะบ่ “ตาย” แต่ผู้ที่ “ตาย” กะคือ ฝ่ายตรงข้ามทุกคน ที่มาสัมผัสกับผู้ล่อแต้ม นั้น

ผู้ล่อแต้ม “ ตาย ” ก็ดี ผู้ล่อแต้ม กลับเข้าเขต ก็ดี ถือว่าจบรอบนั้นๆ ต้องเปลี่ยนให้อีกฝ่ายหนึ่งออกมา “ล่อแต้ม” .....ผลัดกันไป ผลัดกันมา อยู่จั่งซี้ล่ะ จนกว่าฝ่ายใดฝ่ายหนึ่ง สิตายเหมิดทุกคน... ฝ่ายที่ตายเหมิดทุกคนก่อน เป็นฝ่ายที่แพ้ ต้องถืกทำโทษโดยการถืกเขกเข่า หรือกุ่ง(กระเตง)อีกฝ่ายหนึ่ง ตามแต่ตกลงกัน

กติกา :

• “ ผู้ล่อแต้ม ” คือโตแทนของแต่ละไท ที่อาสาออกไปในเขตฝ่ายตรงข้าม เพื่อไล่แต้มเอาคนของฝ่ายตรงข้าม
• ผู้ล่อแต้ม ต้องบ่เลยเส้นตายที่อยู่ในเขตฝ่ายตรงข้าม บ่จั่งซั้น “ตาย”
• ผู้ล่อแต้ม ที่ถืกฝ่ายตรงข้าม ดึง ลาก ไปจนเลยเส้นตาย ถือว่า “ตาย”
• ผู้ที่ถืกผู้ล่อแต้ม แต้มได้ โดยที่ผู้ล่อแต้ม สามารถกลับไปแตะเส้นช่วยชีวิตได้ ต้อง “ตาย”
• การจับดึง ลากผู้ล่อแต้ม สามารถช่วยกันจับหลายๆ คนกะได้ ช่วยกันจักคน กะได้
• ผู้ที่ “ ตาย ” ถือว่าเหมิดสิทธิ์ในการเล่น ต้องรอจนกว่าไทได๋ไทหนึ่ง สิตายเหมิด แล้วเริ่มต้นเล่นใหม่ จั่งค่อยสิมีสิทธิ์เล่นอีก
• ฝ่ายที่ “ ตาย ” เหมิดก่อน ถือว่า แพ้