จำนวนผู้เล่น : ๑๐ คนขึ้นไป

สถานที่และการเตรียม :

เดิ่นหรือบริเวณกว้างๆ... แล้วกะผ้าสำหรับมัดปิดตา ๒ ผืน สิเป็นผ้าขาวม้า กะได้

การคัดโต :

ผู้พาเล่น คัดเลือกตามเห็นสมควร และผู้ถืกคัดเลือกยินยอมพร้อมใจที่สิเล่น โดยคัดเลือกผู้หนึ่งมาเป็นแมว คัดเลือกอีกผู้หนึ่งมาเป็นปลาย่าง สำหรับเล่นแต่ละรอบ

วิธีการเล่น :

ผู้เล่นทั้งเหมิด นั่งล้อมเป็นวงใหญ่ๆ พอสมควร บ่จำเป็นต้องนั่งติดกัน แต่ขอให้ได้วงที่พอเหมาะ จากนั้น ผู้พาเล่นคนหนึ่ง กะเอาผ้ามัดปิดตาผู้ที่เป็นแมว ผู้พาเล่นอีกคนนึง กะเอาผ้ามัดปิดตาผู้ที่เป็นปลาย่าง บ่ให้ทั้งสองคน เหลียวเห็นฮุ่ง โดยไปมัดปิดตาอยู่คนละฟาก หรือไกลกันจักหน่อย

หลังจากมัดปิดตาแมวกับปลาย่างแล้วแล้ว กะพาแมวกับปลาย่าง ไปปล่อยในวง ก่อนสิปล่อย อาจสิหมุนแมว จักสี่ห้ารอบ ให้หลงทิศ ก่อนกะได้

หน้าที่ของแมว กะคือ ต้องจับปลาย่าง(กิน) หน้าที่ของปลาย่าง คือ ต้องหนีแมว บ่ให้แมวจับได้

แมว ให้ฮ้องว่า “แมว... แมว... แมว...” ไปเรื่อยๆ แล้วกะคอยฟังเสียงปลาย่างว่า อยู่หม่องได๋ พร้อมทั้ง ย่างซาวหาปลายย่างไปนำ

ปลาย่าง ให้ฮ้องว่า “ปลาย่าง... ปลาย่าง... ปลาย่าง...” ไปเรื่อยๆ แล้วกะคอยฟังว่า ตอนนี้แมวอยู่หม่องได๋ พร้อมทั้งพยายามหลีกหนีแมวไปนำ... ในกรณีฮู้โตว่า เจ้าของอยู่ใกล้แมว (เพราะได้ยินเสียงแมวอยู่ใกล้ ๆ) สิเงียบไว้ก่อน หนีไปไกลๆ แมวแล้ว จั่งฮ้อง กะได้

แมว พอคะเนได้ว่า ปลาย่างอยู่หม่องนี้ล่ะ กะให้กระโดดครุบ หรือแล่นจับเอาปลาย่าง

ปลาย่าง พอฮูโตว่า ถืกโดดครุบ กะให้ฟ้าวโดดหลบหนี

ถ้ากำลังเล่นอยู่ ผ้ามัดปิดตาหลุด กะให้เซาพัก มัดผูกผ้าใหม่แล้ว จั่งค่อยเล่นต่อ

ผู้เล่นที่นั่ง-ยืนล้อมวงอยู่ ถ้าเห็นว่าแมวหรือปลาย่าง สิย่างเป๋ออกนอกวง กะให้จับหันหน้าเข้าวง แล้วกะ สามารถสิส่งเสียงบอกแมวว่า ปลาย่างอยู่ทางนั้นทางนี้ ให้เลี้ยวซ้าย เลี้ยวขวา กะได้ หรือ บอกปลาย่างว่า แมวมาแล้ว ให้ฟ้าวหนีไป กะได้

แมวจับปลาย่างได้ ถือว่าจบรอบนั้น ... จากนั้น กะหาผู้ที่เป็นแมว ปลาย่าง คู่ต่อไป

กติกา :

• ต้องมัดตา แมว กับ ปลาย่าง บ่ให้เหลียวเห็นกัน ให้ได้ยินแต่เสียง
• แมวจับปลาย่างได้ ถือว่า จบรอบ ซึ่งการจับได้ หมายถึง จับจนอยู่คามือ