จำนวนผู้เล่น : ๗ คนขึ้นไป (ผู้เศษ เป็นกรรมการ)

สถานที่และการเตรียม :

เดิ่นหรือบริเวณกว้างๆ จักหน่อย... แล้วกะคัดเลือกให้หาผู้นึงที่น่าเชื่อถือ มาเป็นกรรมการ ซึ่งโดยมาก กะมักสิเป็นคนพาเล่นนั่นล่ะ... กรรมการนี้ล่ะ เอิ้นว่า “พระอินทร์” … โดยมีข้อแม้ว่า ผู้ที่เป็นพระอินทร์ ต้องเป็นคนที่ฮู้จักชื่อผู้เล่นทุกคน...

การจัดไท : วิธีการ ปาว ปิ่ง ป้ง

การเลือกไทเซิมก่อน : วิธีการ ปาว ปิ่ง ป้ง

วิธีการเล่น :

ทั้งสองไท แยกกันไปอยู่คนละฟาก ไกลๆ กัน... คนที่เป็นพระอินทร์ ไปนั่งอยู่ระหว่างกลาง ของทั้งสองไท แล้วกะกำหนดเขตของพระอินทร์ขึ้นมา อาจสิขีดเส้นเป็นวง รอบหม่องนั่ง หรือถ้านั่งสาด กะอาจสิกำหนดสาด เป็นเขตพระอินทร์กะได้

ไทได้เซิมก่อน ส่งโตแทนคนหนึ่งออกไปเซิม (กระซิบ) หูพระอินทร์.... โตแทนคนนั้น คิดเดาไว้ใจว่า ไทตรงข้ามน่าสิส่งไผออกมา จากนั้นกะย่างไปหาพระอินทร์ เข้าเขตพระอินทร์ พอไปฮอดพระอินทร์ กะก้มลงเซิมบอกพระอินทร์ว่า เอาผู้ได๋... แล้วกะย่างกลับไทเจ้าของ ไปรอเบิ่งผล

ฝ่ายพระอินทร์ กะจำชื่อเอาไว้ แล้วกะคอยให้อีกไทนึงออกมา

อีกไทนึง กะส่งโตแทนคนหนึ่งออกไป... โตแทนคนนั้น คิดเดาไว้ใจว่า ไทตรงข้ามน่าสิส่งไผออกมา จากนั้นกะย่างไปหาพระอินทร์

ฝ่ายพระอินทร์ ขณะที่โตแทนอีกไทนึงออกมา ...ถ้าโตแทนคนนั้น บ่ตรงกับที่ไทก่อนนี้เซิมบอกไว้... โตแทนคนนั้น กะเข้าเขตพระอินทร์ พอไปฮอดพระอินทร์ กะก้มลงเซิมบอกพระอินทร์ว่า เอาผู้ได๋... แล้วกะย่างกลับไทเจ้าของ ไปรอเบิ่งผล

... ถ้าโตแทนคนนั้น ตรงกับที่ไทก่อนนี้เซิมบอกไว้... พอโตแทนคนนั้น ย่างเข้าเขตพระอินทร์ พระอินทร์ กะฮ้องว่า “โป้ง” โตแทนคนนั้น กะตาย เหมิดสิทธิ์เซิม เหมิดสิทธิ์เล่นในรอบนั้น... ผู้ที่ตายแล้ว ให้ไปนั่งท่าอยู่ทางอื่น … จากนั้น ไทที่ตายนั้น กะส่งโตแทนผู้อื่นอีกออกไปเซิมหูพระอินทร์...โตแทนผู้นั้น กะออกไปเซิม แล้วกะกลับไทเจ้าของ รอเบิ่งผล...อีกไทนึง กะส่งโตแทนออกไปเซิม... ผลัดกันเซิมหูพระอินทร์ไปเรื่อยๆ จนกว่าไทได๋ไทนึงสิตายเหมิด ซึ่งไทที่ตายเหมิดก่อน เป็นไทที่แพ้... อาจถืกทำโทษโดยการให้อีกไทหนึ่งขี่หลัง หรือถืกเขกเข่า กะแล้วแต่... จากนั้น กะจั่งค่อยเล่นรอบใหม่

... เพื่อบ่ให้ไทเจ้าของแพ้ ผู้เล่น กะต้องคาดเดาดีๆ ว่า ต่อไป อีกไทหนึ่ง ผู้ได๋สิออกมาเซิม ซึ่งสามารถปรึกษากัน ตกลงกันก่อนออกไปเซิม กะได้... แล้วกะการที่สิส่ง ผู้ได๋ออกไปเซิม กะต้องคาดเดาให้ดีคือกันว่า อีกไทหนึ่งเขาเซิมเอาผู้ได๋... ซึ่งผู้เก่า สามารถออกไป ซ้ำๆ ได้...

กติกา :

• ผู้สิออกไปเซิมหูพระอินทร์ เป็นผู้ได๋กะได้ ที่ยังบ่ตาย ออกไปซ้ำๆ กะได้
• ถ้าผู้ออกไปเซิม ตรงกับที่ไทก่อนนี้เซิมบอกพระอินทร์ไว้ พอย่างเข้าเขตพระอินทร์ ถืกพระอินทร์ “โป้ง” ถือว่า “ตาย” ทันที
• ผู้ที่ “ ตาย ” แล้ว บ่มีสิทธิ์เซิมอีก จนกว่าสิเริ่มเล่นรอบใหม่