---

ขอบคุณภาพจากบ่าวปิ่น


สำบายดีพี่น้องมวลหมู่มิตรสหาย                   จากกันไกลไลลาแต่บ่ลืมไลร้าง
คงสิอยู่ดีบ้างคีงบางสบายพ่าง                     คงสิอยู่ดีบ้างคือเค้าเก่าหลัง (บ่น้อ)

มื้อนี้งานคั่งค้าง หากเบาบางพอหว่าง             พอได้มียามว่างมาจาเว้าเล่าผญา
บทบรรณาธิการน้อยหลายคนคอยคองอ่าน       ปานน้ำหวานเผิ้งน้อยคอยลิ้มรสเลิง

เว้าฮอดเปิงเมืองบ้านอีสานเฮาแต่เก่าก่อน       คิดฮ่ำฮอนฮีตเค้าเก่าครั้งปางนาน
แดนอีสานเมืองบ้านสุขสำราญม่วนซื่น            ผืนแผ่นดินแห้งบ้างฤดูแล้งก็หากมี
แต่วิถีเนายั้งบ่แล้งอย่างในฤดู                       พากันปูแปงถางถากทางบ่ทอนท้อ
บ่ได้งึดได้ง้อของวิไลซ์จากเมืองใหญ่             ปัจจัยสี่หากหาได้ภายพื้นผืนแผ่นดินฯ

ออนซอนเด้ ออนซอนดินออนซอนหญ้า ออนซอนน้ำออนซอนปลา ออนซอนฟ้อนออนซอนแอ่น ออนซอนพิณออนซอนแคน ศิลปะค่ำล้ำวัฒนธรรมก้ำแห่งอีสาน... พี่น้องเอ้ย ฯ

เว้ามาแล้วคิดฮอดบ้านอีสานเก่าเคยเนานอน      คิดฮ่ำฮอนท่งนาป่าดอนต้อนควายเลี้ยง
เปิดตอเฟียงหาเขียดโม้พ่องขุดปูขัวหอยอ่อม      ดอกกะยอมบานแล้วหอมกุ้มทั่วท่งนา
ดอกมันปลาดอกคูนแย้มแกมอาเลาคัดเค้าป่ง      ประดับท่งดอนแล้งภมรมิ้มได้อิ่มหวาน    
เสียงกังวานกะโหล่งก้องจากคองัวเสนาะท่ง      เด็กน้อยลงแล่นเล่นทะยานเต้นตามไฮ่นา
นกกะทา นกอีจู้ แจนแวนฮ้องหาคู่                  นกเขาคูเฮียกเอิ้นขันฮ้องเสพแซม ฯ





       ดอกจานแดงบานแย้ม แต้มแต่งนาดอน     กลีบเจ้างอนโงแงน แอ่นปานอัปสรฟ้อน
     สุริโยฮ้อน สาดเสริมแสงส่อง                    ลมพานต้อง บ่สะท้านยืนทัดทาน
     กลีบดอกจานบานแย้ม แต้มแต่งยังนภา       อ้ากลีบบางอ้างปักษา แสดสีสุรีย์ต้อง
     หวังเทียวท่อง แสวงฝันอันสูงค่า             โบยบินดั่งสกุณา ทั่วโลกาฟ้ากว้าง มโนมั่นปณิธาน
     แสวงฝันอุดมเลิศ สุดสิ่งอุดมฝัน                สิเสกสรรค์ฝันใด๋ บ่คักในฤทัยซ้ำ
     ซ่ำปลายฝันมโนล้ำ สุดฝันมโนแจ่ม            คือได้เติมแต่งแต้ม ประดับบ้านท่งดอกจาน ฯ

ไผผู้คิดฮอดบ้าน อย่าลืมแวะเวียนหา                  ไผผู้คิดฮอดนาอย่าลืมเวียนยามบ้าน
เอาล่ะน้อญาท่านเว้ามานานย้านเพิ่นหน่าย           พอล่ะน้อซ่ำนี้ สุขีมั่นคู่สู่คน เด้อ ขะน้อย ฯ

---