จำนวนผู้เล่น : ๘ คนขึ้นไป

สถานที่และการเตรียม :

เดิ่นหรือบริเวณกว้างๆ... กลองพร้อมคนตี แล้วก็นักร้องทั้งหลาย... ผู้พาเล่น ขีดวงกลมใหญ่พอสมควร ขึ้นมาวงหนึ่ง แล้วกะเอ็ดฮูแย้ ตามขอบเส้นวงกลม โดยขีดวงน้อยๆ ขึ้นมาอีกวงหนึ่ง กะระยะห่างของแต่ละฮู ให้ได้ประมาณเดียวกัน โดยจำนวนฮูแย้ ต้องน้อยกว่าจำนวนคนที่เล่น อย่างน้อยหนึ่งฮู เช่น ถ้าคนเล่นมี ๑๐ คน (บ่รวมกลุ่มตีกลองร้องเพลง) กะเฮ็ดฮูแย้จัก ๗ ฮู ๘ ฮู หรือ ๙ ฮู แล้วแต่ผู้พาเล่นสิต้องการแย้หลงฮูจักคน นั่นล่ะ

วิธีการเล่น :

กลุ่มตีกลองร้องเพลง แยกไปอยู่ต่างหาก ...ผู้เล่นคนอื่นๆ ยืนล้อมวง อยู่ตามขอบเส้นวงกลม จากนั้น กลุ่มตีกลองร้องเพลง กะพากันร้องเพลง ไปเรื่อยๆ ...ผู้เล่นคนอื่นๆ กะย่างเวียนอ้อมวง ไปตามเส้นขอบวงกลม สิเต้น สิย้อนใส่ดนตรีไปนำ กะบ่ว่ากัน

ผู้นำที่อยู่ในกลุ่มตีกลองร้องเพลง (โดยมากสิเป็นคนตีกลอง) พอคนตีกลอง หยุดตีกลอง ปั๊บ ผู้เล่นที่ย่างอ้อมวงอยู่ กะฟ้าวแล่นยาดกัน เข้ายืนประจำฮูแย้ ซึ่งผู้ที่ได้ฮูแย้ ถือว่าผ่าน ส่วนผู้ที่หาฮูแย้บ่ได้ เอิ้นว่า แย้หลงฮู

ผู้ที่เป็นแย้หลงฮู อาจสิมีหนึ่งคน สองคน สามคน.. (หรือจักคนกะแล้วแต่สิกำหนด โดยกำหนดเฮ็ดฮูแย้ขึ้นมาตั้งแต่แรก) … ผู้ที่เป็นแย้หลงฮู กะสิถืกทำโทษ โดยการออกไปฟ้อนกลางวง หรือฟ้อนอ้อมวง กะแล้วแต่สิกำหนดกัน

หลังจากนั้น กะเริ่มเล่นใหม่ ...(ถ้าฮูแย้ลบเลือนไป กะขีดใหม่ให้เห็นชัดๆ)

กติกา :

• ผู้ที่หาฮูแย้ได้ ถือว่าเป็นแย้ปกติ
• ผู้ที่หาฮูแย้บ่ได้ ถือว่าเป็นแย้หลงฮู
• ผู้ที่เป็นแย้หลงฮู ต้องถืกทำโทษ (แล้วแต่สิกำหนด.. โดยมากกะให้ฟ้อนอ้อมวง)