ผู้เป็นเสือ พยายามแล่นไล่ครุบกินผู้เป็นงัว โดยมีฮั้วกั้นไว้อยู่ ซึ่ง มีวิธีการเล่น ๒ แบบ

เสือกินงัวแบบที่๑

จำนวนผู้เล่น : ๑๐ คนขึ้นไป

สถานที่และการเตรียม : เดิ่นหรือบริเวณกว้าง ๆ

การคัดโตหาเสือกับงัว : วิธีการ โอ น้อย ออก หรือ ชี้โตเอาโลด

วิธีการเล่น :

หลังจาก หาผู้ที่เป็นเสือ ๑ คน กับผู้ที่เป็นงัว ๑ คน ได้เรียบร้อยแล้ว คนที่เหลือ ให้ยืนล้อมเป็นวง จับมือกัน ขยายวงออก ให้งัวอยู่ในคอก ให้เสืออยู่นอกคอก

ผู้ที่เป็นเสือ มีหน้าที่ไล่คุมจับเอางัว

ผู้ที่เป็นงัว มีหน้าที่แล่นหลบหนีเสือ

ผู้ที่เป็นฮั้ว มีหน้าที่กันเสือ ลัดเสือไว้ แต่ปล่อยให้งัวเข้า ออก ตามสบาย

เสือกะพยายาม แล่นไล่คุมจับกินงัว พยายามโดดเข้าในคอก บุ๋คันฮั้วเข้าในคอก ป่องนั้น ป่องนี้ ในขณะเดียวกัน ผู้ที่จับมือกันเป็นฮั้ว กะพยายามกัน ลัด บ่ให้เสือเข้าคอกได้... เมื่อเสือเข้าคอกได้ กะแล่นไล่คุบงัว... ฝ่ายงัว เห็นเสือเข้าคอกได้ กะให้แล่นหลบหนีออกนอกคอก ซึ่งผู้ที่เป็นฮั้ว กะอนุญาตให้งัวเข้าออก ได้ตามสบาย... พองัวแล่นหนีออกนอกคอก เสือพยายามโดดออกคอก บุ๋ฮั้วออกนอกคอก.... แล่นไล่คุม เข้า-ออก ป่องนั้น ป่องนี้ จนกว่าสิจับงัวได้

กรณี ใช้เวลาดน กะจับงัวบ่ได้ ...ผู้พาเล่นเห็นสมควรแก่เวลาแล้ว กะให้บอกให้ผู้ที่เป็นฮั้วว่า ให้เปิดฮั้ว... ปล่อยให้เสือแล่นเข้าออกได้ตามสบาย... เสือ กะแล่นไล่จับงัว จนกว่าสิจับได้

หลังจากจับได้แล้ว ถือว่าจบการเล่นรอบนั้น ซึ่งรอบต่อไป กะให้หาผู้ที่เป็นเสือ ผู้ที่เป็นงัว คู่ต่อไป แล้วกะเล่นแบบเก่า

เสือกินงัวแบบที่๒

จำนวนผู้เล่น : ๑๐ คนขึ้นไป

สถานที่และการเตรียม : เดิ่นหรือบริเวณกว้าง ๆ

การจัดไท : วิธีการ ปาว ปิ่ง ป้ง

การหาไทเสือกับไทงัว : วิธีการ ปาว ปิ่ง ป้ง

วิธีการเล่น :

แต่ละฝ่าย หาโตแทนของฝ่ายเจ้าของมาฝ่ายละคน เพื่อเป็นเสือ กับงัว คนที่เหลือ ให้ยืนล้อมเป็นวง จับมือกัน โดยยืนสลับระหว่างไทเสือกับไทงัว กะได้ หรือสิยืนแบบไทงัวสอง ไทเสือสอง สลับกันไปเรื่อยๆ กะได้ ขยายวงออก ให้งัวอยู่ในคอก ให้เสืออยู่นอกคอก

ผู้ที่เป็นเสือ มีหน้าที่ไล่คุมจับเอางัว

ผู้ที่เป็นงัว มีหน้าที่แล่นหลบหนีเสือ

ผู้ที่เป็นฮั้ว ซึ่งเป็นคนไทงัว มีหน้าที่กันเสือ ลัดเสือไว้ แต่ปล่อยให้งัวเข้า-ออก ตามสบาย

ผู้ที่เป็นฮั้ว ซึ่งเป็นคนไทเสือ มีหน้าที่ลัดงัวไว้ ให้เสือจับ แต่ปล่อยให้เสือเข้า-ออก ตามสบาย

เสือกะพยายาม แล่นไล่คุมจับกินงัว พยายามโดดเข้าในคอก บุ๋คันฮั้วไทงัวเข้าในคอก หรือแล่นไล่โดยผ่านฮั้วไทเสือซึ่งเป็นไทเจ้าของ ป่องนั้น ป่องนี้ ... เมื่อเสือเข้าคอกได้ กะแล่นไล่คุบงัว... ฝ่ายงัว เห็นเสือเข้าคอกได้ กะให้แล่นหลบหนีออกนอกคอก ทางป่องฮั้วไทงัวซึ่งเป็นไทเจ้าของ ... พองัวแล่นหนีออกนอกคอก เสือพยายามโดดออกคอก บุ๋ฮั้วออกนอกคอก.... แล่นไล่คุม เข้า-ออก ป่องนั้น ป่องนี้ จนกว่าสิจับงัวได้

สำหรับจุดที่ไทเสือกับไทงัว ยืนสลับกันจับมือกันเป็นฮั้ว ต่างคนกะต้องใช้แฮงแขนของเจ้าของ เพื่อที่สิเปิดหรือปิดฮั้ว กันไทอื่น ปล่อยไทเจ้าของ เข้า-ออก

หลังจากเสือจับงัวได้แล้ว ถือว่าจบการเล่นรอบนั้น ซึ่งรอบต่อไป กะให้สลับกันเป็นไทเสือ ไทงัว แต่ละไทกะหาผู้ที่เป็นเสือ ผู้ที่เป็นงัว คู่ต่อไป แล้วกะเล่นแบบเก่า