จำนวนผู้เล่น : สี่คนขึ้นไป

การคัดโต : ใช้วิธี จ้ำ ปิ่ง จ้ำ ดอง

สถานที่และการเตรียม :

ศาลา ฮ้านหมอลำ หรือว่าหม่องที่มีหลักเสาหลายๆ กะได้ ใช้ต้นไม้ที่อยู่บ่ห่างกัน กะได้ พร้อมทั้งกำหนดหลักที่ใช้เล่น กำหนดจำนวนหลัก ...โดยปกติ ถ้าผู้เล่นบ่หลายคนปานได๋ กะกำหนดหลักให้หน่อยกว่าผู้เล่น ให้ผู้เล่นเศษสองคน โดย ผู้นึงเป็นหนอน อีก ผู้นึง เป็นผู้บ่มีหลัก เช่น มีผู้เล่นหกคน กะใช้ สี่หลัก... หรือหากผู้เล่นหลายคน อาจสิให้เศษสาม เศษสี่กะได้

วิธีการเล่น :

ผู้เล่นที่บ่แมนหนอน แล่นเข้าประจำหลัก หนอนแล่นไล่คุมแต้มผู้ที่บ่มีหลักหรือบ่อยู่หลัก ผู้ที่บ่มีหลัก กะแล่นหนีไปจับหลัก หลังจากจับหลักแล้ว ถือว่าปลอดภัย ... แต่ว่าผู้ที่ประจำหลักอยู่ก่อน ต้องเสียหลักให้ผู้ใหม่ แล้วกะต้องฟ้าวแล่นหนีไปหาหลักใหม่ บ่จั่งซั่นกะสิถืกหนอนแต้มเอา

กติกา :

• หนอน ต้องแต้มถืกผู้อื่น จั่งสิพ้นความเป็นหนอน
• ผู้ที่ถืกหนอนแต้ม ต้องกลายเป็นหนอนแทน
• การแต้ม ห้ามแต้มคืน หรือว่าห้ามแต้มเอาผู้เก่า (ที่เพิ่งพ้นความเป็นหนอน)
• หนอน มีสิทธิ์แต้มได้เฉพาะ ผู้ที่บ่มีหลัก หรือผู้ที่บ่อยู่หลัก ท่อนั้น
• การอยู่หลัก อวัยวะส่วนได๋ส่วนนึง ต้องสัมผัสติดกับหลัก
• ถ้ามีผู้อื่นมาแตะหลักที่เจ้าของอยู่ ต้องเสียหลักให้ผู้อื่นที่มาแตะหลักใหม่นั้น และเจ้าของหลักเก่า กะต้องกลายเป็นผู้บ่มีหลัก
• เจ้าของหลักเก่า ต้องหนีจากหลักนั้น ไปหาหลักใหม่ แตะซ้ำหลักบ่ได้ (ถึงสิแตะซ้ำหลัก กะยังเป็นคนบ่มีหลักอยู่คือเก่า)