กลอนผญาโดย มังกรเดียวดาย


เดือนห้าค้อย ขอยลอยกายผ่าน
เดือนหกคุ้ม หยับย้ายก่ายมา
ฝนฟากฟ้า ครืนคะนองฮำฮด
หยดหยาดโฮย หลั่งละอองลินน้ำ

ฝนตกซ้ำ หลูหลั่งละอองไหล
น้ำโห่งนา ปูปลาเกียกบ้อน
กบเขียดฮ้อง แมงระงำฮวกอ่อน
ลอยล่องเล่น ระบำฟ้อนตื่นฝน

สุริยนย่ำ ยอแสงสาดส่อง
คีค่ำค้อย ลอยเหลื่อมลับลา
ฝนฟากฟ้า หลูหลั่งลินไหล
น้ำเจิ่งนอง นาหนองเจิ่งน้ำ

กล่าวถึงก้ำ อึ่งยางอ่างอึ่ง
ออกจากโผ่ง หาต้อยกินแมง
ยื้อยาดแย่ง แมงเม่าแมงมัน
เสพอาหาร สำราญแซบซ้อย

งอยโพนน้อย ฮ้องเฮเสม่วน
ซวนกันฮ้อง เสียงก้องดั่งกลอง
ฮ้องดังก้อง งื่งง่างตางคำ
ถามกันนำ ตอบคำกันพร้อม

“ฮ่อมทางพุ้น แมงหลายบ่น้อหมู่ (หง่าง ๆ)”
“อยู่ทางพี้ เหมิดแล้วบ่ต้องมา (หงื่ง ๆ)”
“นาทางพุ้น แมงหลายบ่ล่ะพี่ (หง่าง ๆ)”
“นาทางพี้ แมงหน่อยหาบ่มี (หงื่ง ๆ)”
“ตั๋วกันตี้ ขี่ถี่ย้านกินนำ บ้อน้อ (หง่าง ๆ)”
“บ่ได้ตั๋วบ่ได้อำ ให้เซื่อคำเฮาเว้า (หงื่ง ๆ)”

ฝูงอึ่งเผ้า อึ่งยางหงื่งหง่างต่อ
บ้างกอดคอขี่ขึ้น หลังคร่อมก่ายกัน

ฝูงชาวบ้าน พากันหาไต้อึ่ง
ได้ยินงื่งง่างก้อง เดินจ้องจับเอา
จับโตแล้วโตเล่า เผ้าอึ่งบ่เซาหยุด
อึ่งบ่เซาสรวลเส ฮ้องเฮฮาก้อง
จึงถืกจับลงข้อง ของบักริวคนไต้อึ่ง
ตายย่อนฮ้องหง่างหงื่ง อึ่งเว้าฆ่าเจ้าของ

นี่ล่ะน้อพี่น้อง คองผญาเพิ่นจั่งว่า
“อย่าได้ทำเพศเพี้ยงหัวเพียงเพศอึ่ง มันหากเหลือแต่ฮ้องความเว้าฆ่าโต”
“อย่าได้โวคุยเว้าวาจาปากผ่อย ให้สงวนปากเว้าทีถ้อยค่อยจา”

มังกรเดียวดาย