ภูมิลำเนา : ขอนแก่น
เข้าร่วม : 30 พ.ย. 2554
รวมโพสต์ : 35
ให้สาธุการ : 405
รับสาธุการ : 89690
รวม: 90095 สาธุการ
|
ณ โรงเรียนบ้านโคกดอนจาน ตอน..ทัศนศึกษานอกโรงเรียน หลังจากที่ครูหน่อยได้แจ้งข่าวการไปทัศนศึกษาและทำการเรียนการสอนจนเหมิดชั่วโมงแล้ว เด็กนักเรียนทั้งหลายกะพากันจับกลุ่มโสกันเรื่องไปเที่ยวต่อ เฮาสิไปนั่งเบาะหลังกับเพิ่นหน่อ กับเพิ่นไข่ เพราะว่าพวกเฮาสิร้องเพลงคาราโอเกะ สุดสวยสิไปนั่งนำหมู่เฮาบ่ เด็กชายรุทธิ์ลุกขึ้นประกาศพร้อกับหันไปถามสุดสวย เพิ่นรุทธิ์ไปนั่งหม่องได๋ เฮากะไปนำเหมิดนั่นหล่ะ สุดสวยทั้งเว้าทั้งเขิน เอี่ยะๆ ขี้เดียดเด้ เสียงเพื่อนๆทั้งห้องร้องขึ้นพร้อมกัน เอานั่งนำแหน่ได้บ่ เพิ่นรุทธิ์ เฮากะอยากร้องเพลงคือกัน เสียงเด็กหญิงซ้างฮ้องถามขึ้น เฮาเบิ่งซงโตสิเป็นตาวินรถเด้..ซ้าง.. เฮาว่าโตไปนั้งทางหน้ากับพวกเพิ่นตั้มสิดีกั่ว มันจั่งบ่วินรถ เด็กชายรุทธิ์บอกปัดพร้อมอ้างเหตุผลให้ดูดี ทางฝั่งเด็กชายแมงแคงน้อยหรือเด็กชายน้อย หลังจากที่เด็กชายปิ่นกับเด็กชายใหญ่เอิ้นเอาเพิ่นมานั่งนำจนว่าครูหน่อยสอนจบแล้ว กะบ่ทันกล้าเว้านำหมู่จนว่าเด็กชายใหญ่เกิดอาการหมั่นไส้กะเลยเว้าขึ้น มาซงท่าใหญ่แท้ล่ะลูกพี่ นั่งบ่ปากบ่ติงเลยเนาะ บ่ได้ท่าใหญ่ แต่ว่าบ่ทันกล้าเว้านำซือๆบ่รู้สิเริ่มแบบได๋ เด็กชายน้อยตอบพร้อมทำตาปริบๆ เฮาซื่อปิ่น เพิ่นนั้นซื่อว่าใหญ่ โตเด้ซื่อเล่นว่าจั่งได๋ เด็กชายปิ่นที่กำลังนั่งฟังอยู่แนะนำตัวขึ้น เฮาซื่อว่าน้อย ย้ายมาตั้งแต่เมืองพล มาอยู่นำยาย พ่อกับแม่เพิ่นสิไปทำงาน เย็นวันนั้นครูหน่อยได้นำเอกสารขออนุญาตผู้ปกครองมาแจกให้กับนักเรียนพร้อมกับชี้แจงว่า ให้นักเรียนนำเอกสารฉบับนี้ไปให้ผู้ปกครองเซ็นก่อนนะคะ ว่าท่านอนุญาตให้นักเรียนไปหรือเปล่า.. ถ้าไม่อนุญาติก็จะไม่ได้ไปกับเพื่อนๆ..และเย็นนี้ครูจะขอแรงเด็กนักเรียนหญิงทั้งหมดมาช่วยงานครูนะคะ หลังจากเลิกเรียน ครูหน่อยกับเด็กนักเรียนหญิงก็พากันเตรียมทำอาหารที่จะเอาไว้กินตอนเช้าและเที่ยงในวันที่ไปเที่ยว สุดสวย สา กับโอท็อป มาช่วยกันแพ็คหมูใส่ถุงเด้อ ครูสิทอดให้ ส่วนที่เหลือให้หั่นตะไคร้ ใบบักกรูด กับเครื่องต่างที่อยู่ในถาดไว้เด้อ ครุสิตำแจ่วบอง ส่วนข้าวเหนียวครูสิลุกนึ่งเองตอนเช้า ครูหน่อยแบ่งงานให้กับนักเรียน ค่าแม่ครู นักเรียนพากันรับคำแล้วจึงพากันทำหน้าที่ของตัวเอง เช้าตรู่ของวันศุกร์แห่งชาติ อ่อนช้อย อ่อนช้อย โตแต่งโตแล้วไป่มาฟ้าวไปเถาะมันสิบ่ทันนั่งเบาะหลัง สิบ่ได้ร้องคาราโอเกะเด้ เด็กชายปิ่นส่งเสียงเอิ้นมาตั้งแต่ไกลๆ ฮ่วย.! แม่นผู้ได๋ซางมาเอิ้นเอาแต่นามสกุลแท้ ซื่อมีกะคือบ่เอิ้น เสียงเด็กชายน้อยฮ้องลงมาแต่เทิงเฮือน เอ๋า..ว่าแม่นไผ เพิ่นปิ่นซั้นเบาะ มาซงสิฟ้าวคักแท้ กะฟ้าวล่ะเนาะ ย่านบ่ได้ร้องเพลง เฮาแฮ่งย่านซุม 3 เสือนั้นไปนั่งก่อนอยู่ ไวๆแนโตนั่น เด็กชายปิ่นเร่ง ฟ้าวอยู่หมอ เฮากำลังห่อปิ้งหม่ำกับข้าวเหนียวอยู่ เอาไว้กินเทิงรถยามหิว เอ้อว่าตั้งแต่แม่นไผ ซุม 3 เสือที่โตว่านั่น เด็กชายน้อยถามพร้อมทำหน้างงๆ เอ๋า...กะซุม เพิ่นรุทธิ์ เพิ่นหน่อ กับเพิ่นไข่นั้นเด้ มาฟ้าวไปเถาะ โตแล้วไป่ แล้ว..แล้ว ปะๆ โตไปจูงเอาจักรยานอยู่ใต้ล่างเฮือนถ่าเฮาก่อน เพิ่นใหญ่เด้ บ่มานำติ เพิ่นใหญ่สิไปรออยู่โรงเรียนเลย เฮือนอยู่คนละทางกัน เด็กชายปิ่นบอกพร้อมกันก้าวขาคร่อมจักรยานถ่า ไปเลย...ยย อันนี้ลองเบิ่งใหม่ ฮาเทื่อมันได้ |
| ขึ้นบน ลงล่าง |
