| |
มหาเซียน
ภูมิลำเนา : ขอนแก่น
สมาชิกภาพ : สมาชิกชมรมฯ
เข้าร่วม : 03 มี.ค. 2550
รวมโพสต์ : 3,640
ให้สาธุการ : 8,145
รับสาธุการ : 6,180,930
รวม: 6,189,075 สาธุการ
|
|
กล่าวถึง อินทาไท้จอมธรรมเทวราช เนาอยู่ผาสาทก้วงเทิงชั้นอยู่สวรรค์
วันคืนค้อยเพลาผันผ่าย หลายปีเข้าเนาค่ายอยู่สบาย
งายแลงเซ้าเสวยโภชน์แนวทิพย์ มโหรีบรรเลงเสพงันเทิงซั้น
สาวสวรรค์พร้อมทาสาหลายหลาก คำมากล้นแสนตื้อโลกลือ
ทุกเผ่าเซื้อแนวหมู่สรรพสัตว์ อินทาแนมส่องเวรบ่มีเว้น
เข็ญหรือฮ้ายเฮโฮฮ้อนฮ่ำ พระหล่ำเยี่ยมแนมพื้นทั่วผืน.......... ( ต้องแล่ง )
มื้อนี้มืนตาได้แยงลงโลกหลุ่ม เห็นหมู่ชุมส่ำเชื้อคนหลายแตกหล่าย
นับมื้อแต่ขี้หล้ายไปหน้ากว่าเดิม มองเห็นคนก่อเริ่มแตกฝ่ายหลายภาย
ความอนตายฉิบหายสิเกิดมีในโลก จักได้เกิดโศกเศร้าไฟเผาล้างเผ่า
ย้อนว่าชุมหมู่เจ้าบ่ฟังแท้ต่อกัน มันก็ยึดถือหมั้นบ่ยอมกันกล้ากลั่น
วันเวลานับมื้อเมืองบ้านวุ่นวาย ย้อนหลายคนหลายอ้างถือเอาคนอย่าง
ต่างว่าโตก็ถูกแท้ความเห็นนั้นว่าจริง พระก็หลิงดูแล้วสิซ่อยได้จั่งได๋
ใจเอยมนุษย์น้อยถอยลงทางต่ำ จำต้องทำกลล่อพอสิเตือนให้ฮู้เหงื่อน
ปีเดือนนับมื้อจ้อสังเทียวส้อวุ่นวาย ความตายนำแขวนข้องสังบ่ฮู้เมื่อตน
คนก็คนกันแท้หลายหลวงคนหล่วง มีทั้งลวงหลอกล่อลมลายล้มหล่าย หลายแต่ลมจาเว้าบ่มียั้งต่อหยัง
ทำให้ชังกันขึ้นวันคืนขมขื่น (คืนและมื้อจาจ้ำต่อคำ) .....( จารย์ใหญ่ )
พระล่ำเยี่ยมเคียมท่งหนองแสง แงงเบิ่งทางเขตผาเคียมฟ้า
เชิงผาล้านเขตเขาดอนเหล่า ล่วงเขตเข้าดงไม้เบิ่งไพร
พระจึ่งได้ฮู้เหตุความทุกข์ อุกทางในฮ้อนแฮงเห็นแจ้ง
หลายขวบแล้งเทวบุตรองค์อาจ เชื้อชาติท้าวกุดจี่เบ้าอยู่เลา ......... ( ต้องแล่ง )
กุดจี่เบ้าโตหนุ่มพวมแวง พวมสิแปงทางฮักตามแนนจ่องแน่น
แนนจ่องน้าวสาวมาพวมหม่อ พ้อหนามเสี้ยนคาข่องค่าดอง
ทองคำมากมวลหมู่มณีนิล ทั้งสินทรัพย์โภคภัณฑ์ขวางกั้น
สายแนนจั้นจ่องนำนี้หน่ำ บุญกรรมสร้างภายพุ้นบ่สูญ
บุญสร้างไว้ให้เคียงคู่แพงตา วาสนาให้ฮ่วมหมอนเคียงซ้อน
ให้ได้นอนเคียงฮ่วมแพงตาทุกทุกชาติ ท้าวเคยปรารถนาไว้ในครั้งเก่าหลัง
เอาล่ะ..
เฮาต้องซ่อยถางท้างแปงทางให้เกี้ยงม่อน ซ่อยถูถอนหนามเสี้ยนให้เนียนเกี้ยงหล่ำเพียง.. ก่อนนา (มังกรเดียวดาย)
|
|
|
