| |
ยอดปรมาจารย์
ภูมิลำเนา : ร้อยเอ็ด + ขอนแก่น
สมาชิกภาพ : สมาชิกทั่วไป
เข้าร่วม : 17 มี.ค. 2553
รวมโพสต์ : 787
ให้สาธุการ : 45
รับสาธุการ : 1,587,520
รวม: 1,587,565 สาธุการ
|
|
เขาก็พานางเข้าพักเซาให้หายเซ่า ฮอดมื้อเซ้าสิพาย้ายทอดถวาย
ขังนาถไว้บ่อนเก่าเคยเนาหลัง หนองแสงวังโผ่งหลวงโฮงก้วง
หลวงหลายแท้ทาสามันแต่ง แยงนาถน้อยคอยแจ้งค่ำแลง
แมงแดงกล้าหทารหลวงตนอาจ ปานซาติแฮ้งโตฮ้ายอยู่ภาย
นางกะบายแขนหล่าทาสาสนมท่าว เซื้อชาติเจ้าแนวเบ้าดั่งเฮา
เขาสิเอาเอื้อยเข้าถวายหลวงตนใหญ่ ซ่อยเอื้อยไว้พาลี้ลักหนี แน่ถ่อน
แล้วเฮาพากันลี้หนีจากหนองแสง แยงป่าเลาเขตเขาดงข้าว
ไปหาเจ้าเบ้าคำเขยใหญ่ อย่าสิอยู่เป็นข่อยแนวแฮ้งป่าแดง
สาวสนมแจ้งแถลงตอบแพงตา แม่นว่าเป็นทาสากุดแดงซุมแฮ้ง
บ่ว่าแลงหรือเซ้าเนาโฮงกลางท่ง บ่อาจหลงซาติเซื้อแนวเบ้าหมู่เฮา
แลงหรือเซ้าเขาแนมคักแน่ แม่นว่าแวไปหม่นนำก้นสู่คน
ขอให้พระแม่เจ้าทนเอาสาก่อน ตอนนี้นั้นเสด็จเข้าพักเซา ก่อนถ่อน
เงาจันทร์แจ้งนวลแสงแงงทั่ว แต่ในหัวอีน้องมัวเศร้านั่งเหงา
แสงจันทร์เจ้าเย็นละเมียดโลมใจ แต่ทางในพนางคิดฮ่ำฮอนเทิงฮ้อน
ดึกสงัดข่อนเสียงวอนวอนเอิ้นกู่ ยินเสียงกู๊กกี่กู๊พรายฝั่นเอิ้นขวัญ
จิตกระสันฮ้อนใจวอนวีว่อน ดึกออนซอนฮ้องจั้นใจฝั่นเบิ่งจันทร์
มื้ออื่นนั้นมวลหมู่แมงแดง สิใช้แฮงแก่ดึงลากถวายเทิงค่าย
คงสิตายคราวนี้เฮียมเอ้ยฮู้บ่ นางสิขออยู่ซ้อนนอนเกี้ยวแต่ผู้เดียว
เทียวภพหน้าขอเกิดฮ่วมบา บาทจาริกาของซายผู้เดียวนอนเกี้ยว
ขาตินี้เทียวสุดเส้นทางฝันย่างฮ่วม พวมสิสุดท่อนี้พ้อหน้าชาติสิมา อ้ายเอ้ย
น้องนี้ลูกกำพร้าพรากแม่มารดา พ่อกะมาตายเสียจากหนีไกลลี้
มีแต่อวนองค์อ้ายซายเดียวเทียวเบิ่ง คือดังเทิงฟากฟ้าฝนแล้งหยาดแลง
สรรพแมงทั่วค่ายซายหยาดฝนทิพย์ สิบสมุทรซาวนทีเปรียบซายคืออ้าย
มื้อนี้สายใจข่อยกำพลอยใจผ่อย สิขอถอยสืบยั้งนอนฝั่นคู่จันทร์ ก่อนแหล่ว
ว่าท่อนั้นแพงนาถบายเอา แพรไหมคำห่มคิงสไบอิ้ง
หลิงดูผ้าแพรงามผืนเก่า บาคานท้าวประทานให้ห่มใจ
น้องสิใช้แพรผูกพันศอ ระหงงามผูกเคียนให้ตายเมี้ยน
เคียนตางอ้ายซายงามแขนโอบ โลมลูปน้องเคียนฝั่นจ่องสวรรค์ ........ (ต้องแล่ง)
คนิงส่ำนั้นนางนาถโดยเสด็จ ยัวระเยียเดินโผ่งหลวงโฮงก้วง
ทรวงอกไหม้ภัยหลวงจ้อจูด ภูตเฮียกเอิ้นสาวเข้าม่อเอา
เซาจอดยั้งโผ่งใหญ่ทางใน ใจเฮียมคิดผูกตนแขวนโย่น
โทนกำพร้าแพงตาลาก่อน ตอนอื่นเซ้าแพรสิแน่นจ่องแถน พุ้นเด้อ ..... (ต้องแล่ง)
|
|
|
