| |
เซียน
ภูมิลำเนา : สกลนคร
สมาชิกภาพ : สมาชิกชมรมฯ
เข้าร่วม : 16 มี.ค. 2553
รวมโพสต์ : 2,213
ให้สาธุการ : 180
รับสาธุการ : 5,440,870
รวม: 5,441,050 สาธุการ
|
|
พ่อตู้ค้ำ นั่งมวนยาเส้น ที่เลาปลูกเอง ยามเฮ็ดนาแล้ว เลากะปลูกยาสูบ ริมหาด แม่น้ำยาม
กระดาษมวน กะบ่ต้องไปซื้อหา ตัดเอาใบตองกล้วย ทะนีออง มาตากไว้ ๓ แดด ตัดเป็นท่อนๆ
ขนาดพอเหมาะ ซำนี้กะ สุขโขแล้ว
พ่อตู้ค้ำ เลาปลูกต้นงิ้วไว้หลายต้น รอบๆ เฮือน เคยถามเลาว่า
ปลูกต้นงิ้วไว้หลายแถะพ่อตู้
ต้นงิ้วคู่กับคนอีสาน ตามเฮือนซานให้หาปลูกไว้
มีประโยชน์หยังแน พ่อตู้ ผู้ถาม หม่นซูซี บ่เลิก
ปลูกไว้ให้แม่ใหญ่ศรี ยัดหมอน ยัดสื่อ ยัดผ้าห่ม
แกว่าพลางชำเลืองไปทาง แม่ใหญ่ศรี กำลังงกง่วน ต่ำหูก อยู่ใต้ตาล่างเฮือน
ปลูกยามหลานแอ่ว อยากเล่นของเล่น กะเอาไม้งิ้ว มาเฮ็ดรถ เอ็ดปืน เฮ็ดดาบไม้งิ้ว ให้มัน
ปลูกไว้ ยามเด็กน้อย อยากกิน ขนมไข่ขี้เจี้ยม กะต่อยเอาหมากแก่ เอาไปแลก ขนม
ปลูกเอาไว้ ล่อ อีเจีย ดังวีก มันมากินดอกงิ้ว ยามแลง
ปลูกเอาไว้ ให้เด็กน้อย เอาหมากงิ้วอ่อน มาเล่นยิงบั้งโผ๊ะ
ปลูกไว้ถ่าเจาะเอาด้วงงิ้ว กับ แมงหัวแข็งจี่ กิน ยามผิงไฟ หน้าหนาว
ปลูกไว้ ยามเฮ็ดบุญ เฮ็ดทาน กะเอาไม้งิ้ว ไปเอ็ด โฮงเทียน โฮงเผิ่ง , หัวทุง ถวายพระ
ต้นใด มันแก่แล้วกะเอามาเฮ็ดฟืน หุงหาอาหาร
พืชพันธ์เพื่อชีวิต ของคนถิ่น...............................................................
สิบปีต่อมา พ่อตู้ค้ำ สิฮู้บ่น้อ อ้ายคำสอน ลูกชายแก ตัดต้นงิ้ว ทิ้งหมดแล้ว
อ้ายสอน เจ้าตัดต้นงิ้วออก สิปลูกอีหยัง
โอย มันฮกเฮือน ดอก กูเลยตัดถิ่ม บักโต้น มึงนี่ บ่ทันสมัย เลย ทุกมื้อนี่ เขาต้องปลูกพืชเศรษฐกิจ
ต้นหยัง หว่า พืชเศษทะกิด เจ้า
นี่ ๆ ต้นตะกูยักษ์ มึงเคยได้ยินบ่
หึ ! บ่เคย
ปลูกง่าย โตเร็ว ได้กำไรดี
ไผบอกเจ้า ว่าปลูกแล้วดี ผมถามด้วยความอยากรู้
เหวย เขาส่า เขาลือ กันโจ้งๆ ว่าไทหนองคาย ไทขอนแก่น ปลูกแล้ว ร่ำแล้วรวย
มึงไปหาซื้อมาปลูกติละ เบี้ยละ ห้าสิบบาท
ข่อย คิดเบิ่งก่อนเด้อ ว่าแล้วก็เดินจากมา
........... คิดฮอดคำเว้า พ่อตู้ค้ำ..................................
ต้นงิ้วคู่กับคนอีสาน ตามเฮือนซานให้หาปลูกไว้
ปลูกไว้ เอานวนมัน ยัด หมอน ยัดผ้าห่ม ( ไม่จำเป็น มี ผ้าห่มโตโต้แล้ว * ของต่างประเทศ)
ปลูกไว้เฮ็ดของเล่นให้ลูกหลาน ( บ่จำเป็น มีเกมส์คอม ฯ เกมส์ คอนโซล แล้ว * ของต่างประเทศ)
ปลูกไว้แลก ขนม ให้ลุกหลาน ( บ่จำเป็น มีไอติมวอลท์ ขายแล้ว * ของต่างประเทศ )
ปลูกไว้ให้ อีเจีย กิน ( บ่จำเป็น ต้องเผื่อสัตว์สายพันธ์อื่น ที่ดินของเฮา เฮาเสียภาษี อีเจีย นกหนู
มันบ่ได้เสียภาษีซ่อยเฮา เผื่อมันเฮ็ดหยัง )
ปลูกไว้เฮ็ด เครื่องประกอบเฮ็ดบุญ เฮ็ดทาน ( บ่จำเป็น มันอยู่ที่ใจ บ่แม่นต้นไม้)
ปลูกไว้กิน แมงหัวแข็ง , ด้วงงิ้ว ยามผิงไฟ หน้าหนาว ( .เดี๋ยวนี้เขากินสุกี้.. * ของต่างประเทศ)
ปลูกไว้เฮ็ดฟืนหุงหาอาหาร ( บ่จำเป็น เฮามีร้านแก๊ส เจ็กอู๋ * นำเข้าจากพม่า )
.......ปลูกเฮ็ดหยัง........???????.. ( พืชเศรษฐกิจ จากปากต่อปาก (ข่าว)... )
ด้วยความขัดข้องใจ จึงต้นหวนกลับไปถาม อ้ายคำสอนใหม่
แล้ว ต้นตะกูยักษ์ มันมาจากใส หละ ไผเอาเบี้ยมาขาย
ต้นกำเนิดอยู่ ต่างประเทศ เจ็กอู๋ รับจาก นายใหญ่ค้าพันธุ์ไม้ ในเมือง มาขาย
.........พืชเศรษฐกิจ.........
|
|
|
