ชมรมศิลปวัฒนธรรมอีสาน จุฬาฯ www.isan.clubs.chula.ac.th --- เว็บบอร์ดอีสานจุฬาฯ

คห.ที่532) [ไปที่ความเห็นนี้ ในกระทู้นี้]

ศิษย์น้องเล็ก

ภูมิลำเนา : ร้อยเอ็ด
เข้าร่วม : 08 พ.ค. 2551
รวมโพสต์ : 24
ให้สาธุการ : 90
รับสาธุการ : 112570
รวม: 112660 สาธุการ

สุขเสมอหมั่น เสมอมันเครือเก่า
ขอสวัสดีโตเจ้า อ้ายเซียงน้อยผู้หล่อเหลา
อยากสิถามเจ้า สำบายดีอยู่บ่..อ้ายเอ้ย
กินเกลือยังหวาน กินน้ำตาลยังเค็ม คือเก่าบ่ล่ะอ้าย
จั่งได๋กะขออวยพรให้ สุขสมหวังทางสร้างก่อ
ความทุกข์อย่าได้พ้อ โรคภัยอย่ามาแหว่..เด้ออ้าย

สำบายดีน้อครับอ้ายพึ่งสิกลับจากไปออกไซท์ต่างจังหวัดมาพอดี
เป็นจั่งได๋ฝนดีบ่น้อทางบ้าน

สาธุการบทความนี้ : 757 ครั้ง
จากสมาชิก : 1 ครั้ง
จากขาจร : 756 ครั้ง

08 ก.ค. 2551 เวลา 19:16:05

โพสต์โดย

คห.ที่516) เชิญชมบุญบั้งไฟล้าน (อำเภอพนมไพร) [ไปที่ความเห็นนี้ ในกระทู้นี้]

ศิษย์น้องเล็ก

***ใกล้เดือนเจ็ดเพ็งเข้ามาแล้ว...อ้ายเซียงน้อย
ได้ยินเสียงแซวแซว  เตรียมงานเอาไว้ม่วน
ผู้ข้าขอเชิญชวน  มวลพี่น้องลุงป้าอาหลาน
เชิญชมประเพณีพื้นบ้าน  งานใหญ่ประจำปี
เมืองพนมไพรเฮามี  สืบสานเอาไว้
ร่วมกันจรรโลงสร้าง  ประเพณีให้คงอยู่
ประกาศให้รับรู้  งานนี้หากม่วนหลาย....

  ผู้ข้าขอเชิญชวนพี่น้องไปเที่ยวงานบุญบั้งไฟล้านพนมไพรนำกันเด้อครับ
อยากบอกว่าม่วนหลาย...แต่โตผู้ข้านี่หากบ่ได้ไปนำดอกทำงานครับผม

สาธุการบทความนี้ : 739 ครั้ง
จากสมาชิก : 1 ครั้ง
จากขาจร : 738 ครั้ง

17 มิ.ย. 2551 เวลา 11:37:37

โพสต์โดย

คห.ที่498) [ไปที่ความเห็นนี้ ในกระทู้นี้]

ศิษย์น้องเล็ก

มีเฮือนบ่มีฝาแอ้ม  ลมมาสิหนาวหน่วง
ยามหนาวบ่มีผ้าตุ้ม  สิไปเอ้าอุ้มบ่อนได๋
มีเฮือนบ่มีค่าวไว้  สิเอากลอนไปพาด..ไสน้อ
มีค่าวบ่มีตอกผูกไว้  สิไปหมั่นบ่อนได๋
มีเฮือนบ่มีเสาค้ำ  ลมสิตีไกวแกว่ง
มีถงครั้นบ่มีบ่อนห้อย  วางไว้กะบ่ควร

สาธุการบทความนี้ : 730 ครั้ง
จากสมาชิก : 1 ครั้ง
จากขาจร : 729 ครั้ง

20 พ.ค. 2551 เวลา 17:13:14

โพสต์โดย

คห.ที่481) อย่าลืมโตเด้อน้องหล่า [ไปที่ความเห็นนี้ ในกระทู้นี้]

ศิษย์น้องเล็ก

*ครั้นเจ้าได่ขี่ซ่าง  กั้งฮ่มเป็นพระยา
เจ้าอย่าลืมชาวนา  ผู้ขี่ควายคอนกล้า
*ครั้นได่เป็นหัวหน้า  นายคนอย่ามาดใหญ่
ได่กินแกงไก่โจ้น  อย่าสะลืมแจ่วจิ้มผัก...เด้อนางเด้อ
กินภาช์เงินภาช์คำ  อย่าสะลืมกะเบียนฮ่าง
*ครั้นเจ้าได่นอนห้อง  คอนโดตึกใหญ่
อย่าสะลืมเถียงนาน้อย  ที่คอยอยู่ปลายนา
บัดว่าฮาเครื่องบินนั่น  มันบินซนตึกคอนโดใหญ่
ทุกข์ยากฮ้าย เจ้ายังสิได่อ่าวหาเถียงนาน้อย...อยู่เด้อ
มันพอสิให้เจ้าได่หลบซ่น  เทิ่งแดดฮ้อนและฝนฮำ
เจ้ายังสิได่คลายฮ้อนและซุ่มเย็น...อยู่เด้นางเอ้ย

*ควมผญาผู้ข่ายังมีน้อย บ่พอสิได่ลาบและก้อย
หากแต่พอสิได่เฮ้ดป่นและแจ่ว  พอได่เอาคำข้าวจ้ำ
หากญาพี่ฯ  บ่ชี้แนะสิได่ก้อยน้อจั่งได๋

สาธุการบทความนี้ : 722 ครั้ง
จากสมาชิก : 1 ครั้ง
จากขาจร : 721 ครั้ง

14 พ.ค. 2551 เวลา 18:30:35

โพสต์โดย

คห.ที่499) ไปอยู่ไสน้อ [ไปที่ความเห็นนี้ ในกระทู้นี้]

ศิษย์น้องเล็ก

ผู้เพิ่นหนีไปค้า  ทางไกลยังฮู้ข่าว
ครั้นบ่กลับต่าวบ้าน  ยังดอกได้ข่าวสาร
อันว่าการตายนี่  บ่มีทางสิเห็นไหง่
จักว่าตกเขตก้ำ เหนือใต้ที่ได๋..บ่ฮู้แล้ว
จักว่าไปดีฮ้าย  ทางได๋บ่เห็นเงื่อน
ฝูงหมู่ญาติพี่น้อง  เฮไห้จ่มนำ

สาธุการบทความนี้ : 711 ครั้ง
จากสมาชิก : 1 ครั้ง
จากขาจร : 710 ครั้ง

20 พ.ค. 2551 เวลา 17:20:49

โพสต์โดย

คห.ที่501) [ไปที่ความเห็นนี้ ในกระทู้นี้]

ศิษย์น้องเล็ก

หล้านางเอ้ย ครั้นน้องคึดฮอดอ้าย
ให้แนมเบิ่งเดือนดาว  อันว่าสายตาเฮา  สิสบกันอยู่เทิ่งฟ้า
ถึงสิบ่ได้เห็นหน้า  เห็นหน่วยตากะพออยู่
ยามได๋แนมดวงดาวนั่น  พอปานได้นั่งเคียง..พุ้นแหล้ว

สาธุการบทความนี้ : 665 ครั้ง
จากสมาชิก : 1 ครั้ง
จากขาจร : 664 ครั้ง

21 พ.ค. 2551 เวลา 00:17:33

โพสต์โดย

คห.ที่486) [ไปที่ความเห็นนี้ ในกระทู้นี้]

ศิษย์น้องเล็ก

* ไกลขอให้ไกลแต่บ้าน  ฮั้วไฮ่นาสวน
ไกลขอให้ไกลแต่มวล  หมู่เฮือนกับเล้า
ส่วนว่าวาจาเจ้า  สองคนเฮาอย่าได้ห่าง
ต่างคนแม่นสิอยู่ต่างบ้าน  ควมเว้าอย่าห่างกัน...นางเอ้ย
* ไกลขอให้ไกลแต่หน้า  สิไปมาบ่ให้ห่าง
ส่วนจิตข่อยกะอยู่นี้  ใจข่อยกะอยู่นี่
ความฮักข่อยกะอยู่นี่  สิไปพุ้นแต่ห่างคีง...ดอกหนา
* ไกลไปหน้า  บ่คืนมาของเก่า
เฮ็ดผิดกะแม่นเจ้า  เว้าบ่ฟังกะแม่นเจ้า
เอาแต่ใจกะแม่นเจ้า  อยากเห็นข่อยให้เบิ่งหมอน...น้องเอ้ย

ชีวิตนี่อ้ายคงสิขาดเจ้าบ่ได้  จากกันมาบ่กี่มื่อยังคิดฮอดส่ำนี่...นางสาวเอ้ย

โดยสำลี  รักสุทธี

สาธุการบทความนี้ : 600 ครั้ง
จากสมาชิก : 1 ครั้ง
จากขาจร : 599 ครั้ง

16 พ.ค. 2551 เวลา 18:53:09

โพสต์โดย

คห.ที่502) ฉันชั่วเพราะใคร [ไปที่ความเห็นนี้ ในกระทู้นี้]

ศิษย์น้องเล็ก

เคยเป็นชายที่ใจกล้า  จนมาเหมิ้ดปัญญา
กินเหล้าจนเสียท่า
หล้านางเอ้ย  มีแต่เหล้ากับน้ำตา
พอเป็นเพื่อนแก้กลุ้ม  ยามอ้ายเข้าบ่อนนอน
ลางเทื่อแดดฮ้อนฮ้อน  อ้ายยังพักเพราะผิดหวัง
ซัวเพราะหยังคนเฮา  แม่นไผ๋ผู้ตั๋วอ้าย...นางเอ้ย

สาธุการบทความนี้ : 599 ครั้ง
จากสมาชิก : 1 ครั้ง
จากขาจร : 598 ครั้ง

22 พ.ค. 2551 เวลา 00:47:36

โพสต์โดย

คห.ที่460) ฮักกันไว้ [ไปที่ความเห็นนี้ ในกระทู้นี้]

ศิษย์น้องเล็ก

พี่น้องเอ้ย...ฮักกันไว่ดีกั่วซังกัน
ฮักกันไว่คือข้าวเหนียวปั้นใหญ่
อย่าสะเพแตกม้างคือน้ำถืกข้าวเหนียว
ขอให้มวนพี่น้องฮักกันไว่คือสายแม่น้ำใหญ่
น้ำอาศัยขี่ฝ่านทีกว้างจั่งบ่เขิน...สั่นแหล่ว

ผู้ข้าขอฝากโตนำแหน่ครับ...จากบ่าวสำน่อยี่หลงมนต์ผญา

สาธุการบทความนี้ : 511 ครั้ง
จากสมาชิก : 1 ครั้ง
จากขาจร : 510 ครั้ง

08 พ.ค. 2551 เวลา 16:04:35

โพสต์โดย

คห.ที่496) สันหลังของชาติ [ไปที่ความเห็นนี้ ในกระทู้นี้]

ศิษย์น้องเล็ก

เดือนห้าเดือนหกวนมาแล่ว  ต่างเตรียมแนวข้าวปลูกไว้ตกกล้า
พระยาแถนเพิ่นซอยให้ฝนตกมา  ซอยโท่งนาเฮานันได้ซุ่มเย็น..สั่นแหล่ว
บ้างนั่นกะไถฮุด  บ้างนั่นกะตกกล้า  บางคนนั่นกะเข็นฝุ่นลงนา
สู้กันต่อเด้อพี่น้องตามประสา แนวว่าอาชีพเก่าหมู่เฮาชาวนา
สมคนให้สมญาว่าสันหลังน้อของชาติ...พุ้นเด้
พี่น้องเอ้ยได้ฟังแล่ว  มาซางภูมิใจโตเจ้าของคักขนาด
ว่าเฮานั่นมีส่วนผลักดันประเทศชาติ  ซอยผลิตข้าวนั่นส่งออกสู่ตลาด
ไปยื้อแย่งแข่งขันมวลประชาชาติ  เฮ็ดผลกำไรปีละหลายแม่นล้านบาท...พุ้นแหล่ว
ย่อนไผน้อพี่น้อง  ครั้นบ่แม่นหมู่เฮาและมวลญาติ
ซอยกันเด้อพี่น้อง  ซอยกันสร้างเมืองสยามชาติเฮาอยู่
ครั้นแม่นเฮาบ่ซอยกันยู่ เมืองสยามนั่นอยู่จั่งได๋...พี่น้องเอ้ย


           * อาชีพชาวนาเฮานี่เป็นอาชีพที่สุจริตและกะน่าภูมิใจทีสุดแล่ว
          บ่มีพี่น้องเกษตรกรประเทศเฮาคือิอยู่บ่ได้ดอก...แม่นบ่ครับอ้ายเซียงน้อย

สาธุการบทความนี้ : 457 ครั้ง
จากสมาชิก : 1 ครั้ง
จากขาจร : 456 ครั้ง

18 พ.ค. 2551 เวลา 05:20:47

โพสต์โดย

คห.ที่487) การเมืองสู่มื่อนี่ [ไปที่ความเห็นนี้ ในกระทู้นี้]

ศิษย์น้องเล็ก

* นักการเมืองทุกมื้อนี้  ไกลห่างคุณธรรม
เข้าไปในสภา  หวังกินแต่เมืองบ้าน
บ่มีกลัวเกรงย่าน  ปวงประชาสิเห็นเงื่อน
พากันเวียนเปลี่ยนเข้า  คอยเป็นเจ้านั่งเมือง
* พวกที่ใส่เสื้อนอก  มีชื่อว่า ส.ส.
นั่งซูคอในสภา  ท่าเอาแต่เงินล้าน
บ่คิดอ่านการสร้าง  แปลงเมืองให้เฮืองฮุ่ง
ใจพวกมาดมุ่ง  หาเงินเข้าใส่กระเป๋า...นั่นแหล่ว
* เป็นตาซังตั้งแต่พวก  ยื้อแย่งเป็นรัฐมนตรี
กัดกันเองในสภา  ปานกันกับหมาว้อ
บ้างพ้องมีเงินทุ่ม  บางพ้องลุมแบบหมาหมู่
ไผคนจนได้แต่นั่งกีกู้  ดูเขาเล่นแต่งละคร...นั่นแหล่ว

โดยสำลี  รักสุทธี

สาธุการบทความนี้ : 423 ครั้ง
จากสมาชิก : 1 ครั้ง
จากขาจร : 422 ครั้ง

16 พ.ค. 2551 เวลา 19:10:56

โพสต์โดย

คห.ที่463) ฮำฮอนผู้สาวเก่า [ไปที่ความเห็นนี้ ในกระทู้นี้]

ศิษย์น้องเล็ก

บ่าวเมืองร้อยเกินถืกเมินจากสาว...
อกผู้บ่าวสำน้อยน้อปวดร้าว  น้ำตาเปื้อนใส่หมอน
ย่อนว่าหลงวาจาอ้อนสาวผู้งามก้ำขอนแก่น
ซือว่าเมืองขอนแก่นแล้ว  ใจน้องหากบ่แก่นคือขอน..แท้น้อ
เจ้าซางไลลืมถิ่มคำสองเฮาที่เว้าว่า
สิฮักกันท่อแผ่นฟ้าบ่มีมื้อสิเปลี่ยนแปลง
ครั้นแม่นไผ๋ผิดคำมั่น สัญญาเนาะกันก่อน
ขอให้จงน้อเดือดฮ้อนเสมอด้ามดั่งกัน
อันเวลานั่นยังผ่านมาบ่เถิ่งปี
ความฮักที่เคยมี ความหวังดีอ้ายเคยให้ เจ้านั่นกะซางลืม..แท้น้อ

สาธุการบทความนี้ : 411 ครั้ง
จากสมาชิก : 1 ครั้ง
จากขาจร : 410 ครั้ง

08 พ.ค. 2551 เวลา 17:53:24

โพสต์โดย

คห.ที่791) คนบ้านเดียวกันแค่มองตากันก็เข้าใจอยู่ [ไปที่ความเห็นนี้ ในกระทู้นี้]

ศิษย์น้องเล็ก

ผมนี่คือจั่งจอกอยู่น้ำ ฮากหยั่งบ่เถิงดิน
ไหลวนไปเวียนมา กะบ่มีเครือเกี้ยว
ครั้นแม่นไหลไปเกี้ยว เครือลุ่มเพิ่นกะถาง
ครั้นแม่นไหลไปเกี้ยว เครือบางเพิ่นกะถาก
ว่าสิขอฝากเจ้า เอาข่อยเป็นคู่ใจแหน่เด้อนาง

สำบายดีครับพี่น้อง ผมบ่าวพนมไพรขอรายงานโตครับผมเป็นจั่งได๋น้อครับอ้ายเซียงน้อยสำบายดีรึบ่ อยากเข้ามาอ่านผญากะบ่ค่อยสิมีเวลาครับอ้ายงานยุ่งหลาย เดียวกะไปจังหวัดนั่นจังหวัดนี่ น้ำท่วมแหน่บ่น้อทางจังหวัดเลย...กะดาย

สาธุการบทความนี้ : 399 ครั้ง
จากสมาชิก : 1 ครั้ง
จากขาจร : 398 ครั้ง

14 ก.ย. 2551 เวลา 00:27:52

โพสต์โดย

คห.ที่552) [ไปที่ความเห็นนี้ ในกระทู้นี้]

ศิษย์น้องเล็ก

งานผีตาโขนบ้านอ้ายเซียงน้อยคือเป็นตาม่วนคักอยู่ดอกเนาะครับ เห็นจั่งสี้แล่วอดคิดฮอดบ้านเฮาบ่ได้ จักว่าอีกโดนปานได๋สิได้กลับบ้าน อ้ายเซียงน้อยเอ้ย...อยู่ไสกะบ่คืออยู่บ้านเฮาเนาะครับ ครั้นคิดฮอดบ้านยามได๋ได้เข้ามาอ่านผญาหมู่อ้ายเขียนกะพอทุเลาแหน่ สิล่ะอ้ายเอ้ยคนอีสานอยู่ไสกะบ่ลืมบ้าน ช่วงนี่บ่ได้เล่นเน็ทโดนแล่ว กะฝากความคิดฮอดไปหาอ้ายเซียงน้อย หมู่อ้ายทุกคนเด้อครับ สำบายดีสู่คน...

สาธุการบทความนี้ : 383 ครั้ง
จากสมาชิก : 0 ครั้ง
จากขาจร : 383 ครั้ง

21 ก.ค. 2551 เวลา 16:37:33

โพสต์โดย

คห.ที่500) [ไปที่ความเห็นนี้ ในกระทู้นี้]

ศิษย์น้องเล็ก

ใจประสงค์ส่ง  กางเกงกะจั่งได้ ซื้อนุ่งตั๊วล่ะนาง
ใจประสงค์นางน้อง  นางหล้า พี่จั่งมาพี้แล่ว
ใจประสงค์สร้าง  กลางดงกะว่ากลางบ้าน
ครั้นว่าใจบ่คิดต่อตั้ง  กลางบ้านกะว่ากลางดง

สาธุการบทความนี้ : 368 ครั้ง
จากสมาชิก : 1 ครั้ง
จากขาจร : 367 ครั้ง

20 พ.ค. 2551 เวลา 23:54:24

โพสต์โดย

คห.ที่508) ผู้เพิ่นคล่องควมผญา [ไปที่ความเห็นนี้ ในกระทู้นี้]

ศิษย์น้องเล็ก

***โอ๋น้อ...อ้ายเซียงน้อยเอ้ย
ผมอยากฮู้ว่าเจ้า  กินข้าวกับอี่หยัง
กินจ้ำป่น จ้ำแจ่ว คือกันอยู่บ้ออ้าย
หรือว่าโตอ้ายนั่น  กินข้าวกับต้มเอี่ยน
กินน้ำมันเครื่องดอกแทนน้ำ ขอถามเจ้าโปรดว่ามา...แหน่เด้อ
คือจั่งเฮ็ดให้ ควมผญาที่ว่านั่น มันลื่นไหลดอกจั่งเอี่ยน
แม่นสิเขียนแนวได๋  คือเป็นตาฟังฮ้าย
ออนซอนเด้ควมผญาอ้าย  เซียงน้อยเพิ่นคือคล่อง
ผมในฐานะดอกรุ่นน้อง  นับถือเจ้าแม่นอี่หลี
ควมผญาของผมนี่  มันหากยังบ่ค่อง
ยังเขียนบ่ทันคล่อง  ไกลโตเจ้าแม่นอี่หลี
ครั้นได้เฮียนอีกหลายปี  ได้หัดเขียนหลายขวบมื้อ
สิคือเจ้าแม่นอยู่ตี้...อ้ายเซียงน้อยเอ้ย

** ครั้นผมล่วงเกินแนวได๋กะกราบขออภัยแหน่เด้อครับ...อ้ายเซียงน้อย

สาธุการบทความนี้ : 366 ครั้ง
จากสมาชิก : 0 ครั้ง
จากขาจร : 366 ครั้ง

25 พ.ค. 2551 เวลา 10:45:07

โพสต์โดย

คห.ที่593) สิ่งที่ผู้ข้าดีใจหลาย [ไปที่ความเห็นนี้ ในกระทู้นี้]

ศิษย์น้องเล็ก

*** ผมได้เข้ามาอ่านผญายามใด๋แล้วฮู้สึกดีใจหลาย  ที่มูนมังอันดีงามของอีสานเฮายังคงอยู่  กะด้วยความร่วมมือกันของชาวอีสานเฮากลุ่มน้อยๆ กลุ่มหนึ่ง บ่ว่าสิเป็นสมาชิกทุกๆ คน ซึ่งที่ขาดบ่ได้เลยกะคือนิสิตจุฬาฯ เพิ่นที่ได้เฮ็ด website นี่ขึ้นมา  มันหากสิเป็นอีกแนวทางหนึ่งที่สิได้ซ่อยกันอนุรักษ์ไว้ซึ่งศิลปวัฒนธรรมอีสานเฮาให้คงอยู่สืบไป

*********************************
  อยากสิเห็นหนุ่มสาวบ้านเฮาหันมาให้ความสำคัญกับศิลปวัฒนธรรมบ้านเจ้าของจักหน่อยแหน่ครับ  อย่าสิไปนิยมแต่เพลงสตริง เพลงสากล  รึว่าญี่ปุ่น เกาหลีหลาย
กะซอยกันสืบสานเอาไว้แหน่แนวได๋ที่เป็นของเฮา  พอสิให้ผู้เกิดใหม่ใหญ่ลุนได้ฮู้จักแหน่ครับ

            จากผู้ข้า บ่าวพนมไพร วัยรุ่นที่มีหัวใจลูกทุ่ง
***  ถ้าเกิดบ่สมควรจั่งได๋ผมกราบขออภัยหลายหล๋าย...ครับผม

สาธุการบทความนี้ : 348 ครั้ง
จากสมาชิก : 0 ครั้ง
จากขาจร : 348 ครั้ง

01 ส.ค. 2551 เวลา 12:21:57

โพสต์โดย

คห.ที่478) คาถาหาเมีย [ไปที่ความเห็นนี้ ในกระทู้นี้]

ศิษย์น้องเล็ก

*หญิงใดเว้าปากเกลี้ยง แกมหัวเสียงม่วน
หญิงนั่นมีลูกเต้า  ความฮ้ายแม่นบ่มี
ควรที่เอามาซ้อน  เนินมิ่งเมียขวัญ
บุญนางมีหลาย  จักบ่เคืองความฮ่อน...แท้แหล่ว
*หญิงใดเสียงปากต้าน  หวานหูเว้าม่วน
ตาเชิดซ้าย  คอปล้องฮูปงาม
เกสาผมยาวได่  วาปลายคืบหนึ่ง
หญิงนั่นควรค่าล้น  คำฮ้อยชอบธรรม
*หญิงใดคอตกปล้อง  หางตาแดงพอสหน่อย
เมื่อนางยกย่างย้าย  พอด้ามเกิ่งเสมอ
แม่นว่าไผได่เข้าอยู่ซ้อน  เฮียงฮ่วมเป็นเมีย
มีแต่ทางความสุข  นั่งปองเป็นเจ้า
*หญิงใดตีนูนขึ้น  คือหลังดองเต่า
หญิงนั่นใจซื่อแท้  ประสงค์ตั้งต่อผัว
กะบ่มักเล่นซู่  ชายอื่นมาชม
กะท่อจงใจฮัก  ต่อผัวคีค้อย
แม่นิทำการสร้าง  แนวใด๋กะเฮืองฮุ่ง
แสนสิจมอยู่พื้น  มาแล่วกะหากฟู
*หญิงใดบาดย่างกว้าง  ตีนควงธรณี
อันว่าตนโตนางภายใน  ก็หากเป็นลังล้าว
บ่อาจมีใยเพี้ยง  เฮือนซานทุกขมอด...แท้แหล่ว
*หญิงใดฝ่าตีนกว้าง  กกขาทึมแค่งใหญ่
หญิงนั่นไผเข้าอยู่ซ้อน  สอนได่กะบ่ฟัง
มันกะคึดถี่แท้  โถงโลกโลกีย์
อันแต่ในสงสาร  บ่อาจทันเทียมได่

* ผญา โดยสำลี  รักสุทธี

สาธุการบทความนี้ : 341 ครั้ง
จากสมาชิก : 1 ครั้ง
จากขาจร : 340 ครั้ง

14 พ.ค. 2551 เวลา 17:31:29

โพสต์โดย

คห.ที่507) [ไปที่ความเห็นนี้ ในกระทู้นี้]

ศิษย์น้องเล็ก

** ผู้ฟังเอ้ย...ตกพอสอสองพันห้า
ประชาไทยมาใจต่าง...แท้น้อ
เพลงฝรั่งเปิดเปรี้ยงปร้าง  พิณแคนฮ้างแม่ใหญ่เอ้ย
พากันหัวเว้าเย้ย  ธรรมเนียมเก่าแต่คราวหลัง
พากันซังมูนมังโต  ไปเห่อโซแต่ของนอก
เพลงสตริงสตอก  บอกว่าม่วนทันสมัย
เปิดหมอลำเพิ่นอยากอาย มันต่ำหลายเบิ้ดลายโก้
เห็นของโตเป็นของถิ่ม  ไปหลงซิมกินของใหม่
เบิ้ดแต่บุญตายาย  ลายอีสานที่อ่อยเว้า
สิเหลือเค้าแหน่บ่น้อ...

** อ้างอิง  บ่าวประยูร ใบบัว  ดีเจชื่อดังทางจังหวัดยโสธร
          ทุกมื้อนั่นวัยรุ่นบ้านเฮากำลังหลงวัฒนธรรมกันหลาย  พากันลืมเพลงลูกทุ่ง  หมอลำรึว่าผญากะดี ซึ่งเป็นวัฒนธรรมประเพณีที่มีคุณค่าของบ้านเฮา  ผมในฐานะวัยรุ่นคนหนึ่งกะขอเชิญชวนน้องๆ  ให้หันกลับมาเบิ่งแยงสิ่งเหล่านี่กันแหน่เด้อ...พี่น้อง

สาธุการบทความนี้ : 341 ครั้ง
จากสมาชิก : 1 ครั้ง
จากขาจร : 340 ครั้ง

25 พ.ค. 2551 เวลา 08:30:30

โพสต์โดย

คห.ที่461) [ไปที่ความเห็นนี้ ในกระทู้นี้]

ศิษย์น้องเล็ก

เพิ่นว่า...ครั้นบ่ออกจากบ้าน บ่เห็นด่านแดนไกล
ครั้นบ่ไปฮำเฮียนกะบ่มีความฮู้
จั่งได่ตัดสินใจไปเฮียนฮู้ นครหลวงแขวงเพิ่น
ไปได่หลายขวบมื้อความฮู้หากบ่หลาย
ได่แต่พอมาต้มผสมคนน้ำป่น
ครั้นสิลาบและก้อย แกงส้มแม่นบ่พอ

----- ผิดพลาดประการได๋ชี้แนะแหน่เด้อครับ

สาธุการบทความนี้ : 340 ครั้ง
จากสมาชิก : 1 ครั้ง
จากขาจร : 339 ครั้ง

08 พ.ค. 2551 เวลา 16:51:22

โพสต์โดย

คห.ที่497) [ไปที่ความเห็นนี้ ในกระทู้นี้]

ศิษย์น้องเล็ก

***โบราณเพิ่นว่าไว้  ผู้ได๋นั่นมีสองซ้อนบ่อน
มีดอกหลายคู่นอน  มีดอกหลายคนซ้อน
แนวนี่แม่นบ่ควร...
ครั้นแม่นมีอยู่แล่วนั่น  แนวได๋จั่งหาตึ่ม..ลูกหล้าเอ้ย
แม่เคยสอนเจ้าไว้นั่น  คำนี่ซางบ่จำ...แท้น้อ

สาธุการบทความนี้ : 325 ครั้ง
จากสมาชิก : 1 ครั้ง
จากขาจร : 324 ครั้ง

19 พ.ค. 2551 เวลา 11:31:05

โพสต์โดย

)

คห.ที่3) [ไปที่ความเห็นนี้ ในกระทู้นี้]

ศิษย์น้องเล็ก

***ไกลกายเจ้า  ใจกะอยู่นำนาง
บ่มีทางไกลกัน  ให้พรากหนีข้าง
แม่นสิอยู่ฟากฟ้า  สิหย่อเป็นแผ่นดินเดียว
คราวสิบคืนซาวคืน  สิหย่อเป็นคราวมื่อ
ครั้นความมักความฮักมันคือข้าว  สิขอกินให้มันอิ่ม
ครั้นความมักความฮัก  มันคือน้ำบ่อแก้ว
สิลงล้างอาบสรง...น้องเอ้ย
ไกลมื่อนี่  มื่ออื่นสิมาหา
ครั้นแม่นชีวายัง  สิหมั่นมาหาเจ้า
ไกลไปหน้า  บ่มีวันสิมาจวบ
มื่อสืบมื่  ไปหน้าผัดแห่งไกล

สาธุการบทความนี้ : 263 ครั้ง
จากสมาชิก : 0 ครั้ง
จากขาจร : 263 ครั้ง

18 พ.ค. 2551 เวลา 09:04:36

โพสต์โดย

)

คห.ที่2) เชิญเที่ยวงานบุญบั้งไฟล้าน อ.พนมไพร [ไปที่ความเห็นนี้ ในกระทู้นี้]

ศิษย์น้องเล็ก

มาเด้อ...อ้ายเซียงข้องเอาบุญนำกัน

***ผมนี่เนาหนห้องร้อยเอ็ดคำก้ำบ้านอยู่
มีไผแหน่บ่ฮู้ เมืองร้อยเกินนั่นแม่นบ่มี
เพิ่นว่าถิ่นผ้าไหมชั้นดี  แถมยังมีสตรีโสภาผ่อง
ขอเชิญพวกพี่น้อง  มาเยี่ยมยามกัน..แหน่เด้อ
เมืองพนมไพรนั่น  เป็นอำเภอดอกม่องอยู่
ขอประชาสัมพันธ์ให้รับรู้  เสมอด้ามดั่งกัน
แนวที่ขึ้นซื่อนั่น  เป็นงานบุญบั้งไฟใหญ่
บุญบั้งไฟล้านพุ้นตั้วอ้าย  พี่เซียงน้อยเชิญชมกัน
วันเพ็ญเดือนเจ็ดทุกปีนั่น  จัดกันเป็นงานใหญ่
คนมาจากทั่วฟ้าเมืองไทย  เทิ่งเหนือกลางอีสานใต้
โฮมกันไว้ดอกม่องเดียว  เชิญมาเที่ยวเบิ่งกะได้
บั้งไฟหลายคักแหน่  สมใจดอกแท้ๆ  เมื่อบ้านแม่นอิ่มใจ
มันหากเป็นตาย่านฮ้าย  คนใด๋นั่นแม่นบ่เคย..พี่น้องเอ้ย
  ร่วมสืบสานกันเอาไว้  ประเพณีบุญบั้งไฟให้คงอยู่
ให้ชาวโลกเพิ่นรับรู้  จรวดอีสานนั่นคักปานใด๋...พี่น้องผม

   ***บุญบั้งไฟล้านพนมไพรจัดกันทุกวันเพ็ญเดือนเจ็ดของทุกปี  มื่อจุดนั่นบั้งไฟหลายที่สุดในโลกครับพี่น้อง  จุดกันตั้งแต่บ่ทันแจ้งเลยที่เดียว ขอประชาสัมพันธ์สำหรับเซียนบั้งไฟเด้อครับ  หรือว่าพี่น้องที่ชื่นชอบกะดีปีนี่ตรงกับวันที่ 18-19 มิ.ย. ครับ  จั่งได๋กะระมัดระวังกันแหน่สำหรับผู้ที่ไปเที่ยวงานเพื่อความปลอดภัย

สาธุการบทความนี้ : 244 ครั้ง
จากสมาชิก : 0 ครั้ง
จากขาจร : 244 ครั้ง

18 พ.ค. 2551 เวลา 08:51:37

โพสต์โดย

)

คห.ที่1) คิดฮอดบ้านเฮาเนาะ (คิดฮอดอี่พ่ออี่แม่เด้) [ไปที่ความเห็นนี้ ในกระทู้นี้]

ศิษย์น้องเล็ก

   ฝนตกมาแล่วคือคิดฮอดบ้านแถ่น้อ...อี่พ่ออี่แม่เอ้ย
บ่ฮู้ว่าทุกมื่อนี่บ้านเฮานั่นเป็นจั่งได๋
อยากกลับเด้อยากสิกลับไปบ้าน
กลับอีสานเฮือนซานบ่อนเคยเนา
อี่พ่อเอ้ยอี่แม่เอ้ยลูกคิดฮอดตั้งแต่เจ้า
ปานนี่อยู่จั่งได๋...พ่อแม่เอ้ย
บ่ได้กลับเมือยามเจ้า  ได้ถามข่าวแต่ทางสาย
แนวว่ามาอยู่ไกล ก้ำฝ่ายเมืองหลวงพี้
ได้มาทำการสร้าง ฮำเฮียนเขียนอ่าน
จำใจต้องจากบ้าน ผมนั่นคิดนำหลาย
ย่อนว่าอี่แม่ลาวนั่นบ่สำบาย...สั่นดอก
อี่แม่เอ้ย..อย่าสะโหมงานหลาย กายเจ้านั่นแฮ่งอ่อนแฮง
แนวว่าโรคหัวใจที่เป็นนั่น มันสิผันเป็นแฮงดอกกว่าเก่า..แม่เอ้ย
ลูกซายแม่เป็นห่วงเจ้า  ผู่เถ้าแม่นแก่กาย
ลูกได้ขยันเฮียนเขียนสร้าง  จนจบมาแล่วอี่แม่
วิศวกรไฟฟ้าดอกคักแท้  ผมนั่นดีใจหลาย
เฮ็ดสำเร็จไปอีกขั้น  อันความฝันของพ่อแม่
กว่าสิได้มาน้อกะย่ำแย่  พ่อแม่นั่นเบิ้ดนำหลาย
อดไว้ก่อนพ่อแม่ข่อย  ลูกสิค่อยทะยอยหา
สิค่อยเก็บดอกเงินตรา  ส่งมาดอกทางบ้าน
คือสิพอน้อสร้างบ้าน  เฮือนซานหลังเก่า
อีกบ่โดนดอกหมู่เจ้า  คงสิได้แม่นสำบาย...อยู่ดอก
ลูกเขียนไปน้ำตาย้อย  อันโตข่อยห่วงเจ้าหลาย..แท้น้อ
เทิ่งเขียนไปคิดฮอดไป  ซางห่วงใยแต่ทางบ้าน
เทิ่งผู้สาวน้ออ้ายนั่น  แม่นลืมกันแล่วล่ะไป๊
คำสัญญาที่ว่าไว้  เจ้าจำได้อยู่บ่น้อ...น้องหล้าเอ้ย
ต้องขอเซาผญาน้อเอาไว้  ทางในใจอ้ายหดหู่
บ่อาจกลั้นเอาไว้อยู่  ขอทุกคนจงรับรู้ผมนั่นคิดฮอดหลาย
มื่อหลังจั่งสิได้  โทรหาดอกถามข่าว
ขออวยพรให้หมู่เจ้า  เทิ่งผู้เถ้าและผู้แก่
อี่แม่อี่พ่อสำคัญแท้  ควรยกขึ้นไว้เหนือหัว
ขอให้มีความสุขล้น  เกินเมืองคนผมคิดว่า
แนวโรคฮ้ายอย่าพบพ้อ  มาใกล้ดอกย่างกราย...สาธุๆ

   * พ่อแม่ลำบากย่อนเฮามาคักแล่วถึงเวลาที่เฮาต้องแทนบุญคุณเพิ่น
เพิ่นว่าผู้ใดลืมคุณพ่อแม่แล่วแม่นสิทำการสร้างแนวใดกะบ่มีเจริญได้
คุณพ่อคุณแม่ควรยกไว้เหนือหัว

สาธุการบทความนี้ : 228 ครั้ง
จากสมาชิก : 0 ครั้ง
จากขาจร : 228 ครั้ง

18 พ.ค. 2551 เวลา 07:33:22