มาเว้าผญากันเด้อพี่น้องเด้อ --- เว็บบอร์ดอีสานจุฬาฯ

คห.ที่287) คืนเดือนหงายอ้ายเศร้า [ไปที่ความเห็นนี้ ในกระทู้นี้]

ยอดปรมาจารย์

ภูมิลำเนา : ขอนแก่น
เข้าร่วม : 11 เม.ย. 2551
รวมโพสต์ : 731
ให้สาธุการ : 795
รับสาธุการ : 3504320
รวม: 3505115 สาธุการ

     เหลียวขึ้นไปเทิงฟ้า  เห็นแต่ดวงจันทราหงายแจ้งแสงส่อง
อ้ายนี้คึดฮอดน้อง  นางหล่าอยู่บ่เซา
ค่อยสำบายดีอยู่บ่น้อน้องเจ้า  นงคราญตาหวานพี่
ส่วนว่าโตอ้ายนี้  ทุกวินาทีมีแต่เศร้า หย่อนคึดนำเจ้าอยู่สู่ยาม...ซั่นแล้ว นางเอ้ย

                                               เซียงน้อย หนองข้อง

สาธุการบทความนี้ : 1057 ครั้ง
จากสมาชิก : 1 ครั้ง
จากขาจร : 1056 ครั้ง

16 เม.ย. 2551 เวลา 14:01:54

โพสต์โดย

คห.ที่378) คิดจะเอามันก็หนัก [ไปที่ความเห็นนี้ ในกระทู้นี้]

ยอดปรมาจารย์

     คันเฮามีแต่คึดสิเอาน้อพ่อตู้  สิปานหยู้ครกขึ้นปีนภูเขา
อย่าฝันเลยทางสิเบา  ภาระเฮาสิหนักตึ้ง
มีแต่มันสิดึงเฮาเข้า  ในอัคคีเปลวทองกองบักใหญ่
ไฟโลภะสิจูดไหม้  เผาใจเจ้าอยู่สู่ยาม
ใจเฮาให้เย็นคือน้ำ  โลภะไฟให้ปะปล่อย
อันความอยากใหญ่ๆ เทิงความโลภน้อยๆ สิหายไปจ้อย ทุกข์บ่มี...ญาติธรรมเอ้ย

                                         เซียงน้อย หนองข้อง

สาธุการบทความนี้ : 1055 ครั้ง
จากสมาชิก : 2 ครั้ง
จากขาจร : 1053 ครั้ง

20 เม.ย. 2551 เวลา 22:04:18

โพสต์โดย

คห.ที่1027) อ้ายมาส่งลูกไปเรียนต่อ [ไปที่ความเห็นนี้ ในกระทู้นี้]

ยอดปรมาจารย์

     บ่าวแคนเอ้ย...อ้ายหากมาฟ้าวฟ้าว  มาส่งลูกสาวไปเรียนต่อ
ลูกสาวแอ่วอ้อนพ่อ  ว่ามาส่งลูกบ้างไปข้างหน้าสิบ่เหงา
อ้ายมาฮอดตั้งแต่เช้า  มาพักเซาหม่องปลอดโปร่ง
พักอยู่แขวงพระโขนง  เขตคลองเตยที่เคยยั้ง
มื้อแลงอ้ายคอยต่อตั้ง  ไปส่งลูกสาวผู้ยังหนุ่ม
ขึ้นเครื่องบินสุวรรณภูมิ  ลัดไปเมืองจิงโจ้เคลื่อน ไปเฮียนฮู้อยู่ต่างแดน...ซั่นดอก บ่าวแคน

แดนจิงโจ้

ที่ติดต่ออ้าย 364 หมู่ 3 จุดปฏิบัติการเรียนรู้วิทยุชุมชนคนด่านซ้าย  ถนนด่านซ้าย-เลย
หมู่ 3 บ้านเดิ่น ต.ด่านซ้าย อ.ด่านซ้าย จ.เลย 42120
เซียงน้อย  หนองข้อง

สาธุการบทความนี้ : 978 ครั้ง
จากสมาชิก : 1 ครั้ง
จากขาจร : 977 ครั้ง

05 ก.ค. 2552 เวลา 08:56:37

โพสต์โดย

คห.ที่322) หยอกสาวนักเรียนยุกต์ใหม่ [ไปที่ความเห็นนี้ ในกระทู้นี้]

ยอดปรมาจารย์

     ปิดโรงเรียนผัดพากันเฮ็ดหัวแดงย้อม  ย่างคอมมอมโชว์ร่างตามทางปานฝา-รั่ง
จักว่าหยังเป็นหยัง  ภาษาอังกฤษกะบ่ได้พอก้อย โอ้ย..นางน้อยเว้าบ่เป็น
มากรรมเวรแท้น้อสังมาอยากอวดโอ้  แต่งโตโชว์อ้างของเก่า
ฝาหนมครกกะบ่เท่า โอ้ย...ข้อยมาอุกอั่งเอ้า   หมู่นักเรียน...แท้น้อ   พี่น้องเอ้ย

                                  "หยอกเล่นซื่อๆเด้อ น้องหล่าเอ้ย"

                                         เซียงน้อย หนองข้อง

สาธุการบทความนี้ : 968 ครั้ง
จากสมาชิก : 1 ครั้ง
จากขาจร : 967 ครั้ง

17 เม.ย. 2551 เวลา 16:39:51

โพสต์โดย

คห.ที่908) นอนแล้วยังน้อ [ไปที่ความเห็นนี้ ในกระทู้นี้]

ยอดปรมาจารย์

     มีบ่น้อคนนอนเดิกคือเซียงน้อย  ฮอดเที่ยงคืนกะตาแข็งแก่แด่
คึดฮอดอีพ่อเทิงคึดฮอดอีแม่  ชมรมอีสานจุฬาแท้หย่อนโตข่อยแม่นอยู่ไกล
อยู่แดนไทย-ลาวพุ้น  เมืองเลยแม่นหม่องอยู่
คึดฮอดอีพ่อตู้แม่ตู้  ผู้อยู่ทางก้ำถิ่นจุฬา
คงสุขสำบายทุกถ้วนหน้า  ชมรมอีสานจุฬาฯลุงป้าคงค่อยอยู่
เดิกปานนี่คงนอนขดขี่คู้  เสียงกรนก้องดั่งรถไฟแล้วตี้...พี่น้องเอ้ย

คึดฮอดพี่น้องหลายเลยลุกขึ้นมาเขียนผญาครับ
เซียงน้อย หนองข้อง

สาธุการบทความนี้ : 952 ครั้ง
จากสมาชิก : 1 ครั้ง
จากขาจร : 951 ครั้ง

22 ก.พ. 2552 เวลา 01:00:44

โพสต์โดย

คห.ที่667) ขอบคุณอ้าย โอปปอติกะ [ไปที่ความเห็นนี้ ในกระทู้นี้]

ยอดปรมาจารย์

ขอบคุณ อ้ายโอปอติยะ หลายๆครับ

เซียงน้อย หนองข้อง อยากให้กำลังใจทัพนักกีฬาไทยทุกคน ที่ไปแข่ง โอลิมปิก ที่ปักกิ่ง ทุกคนครับ

สาธุการบทความนี้ : 926 ครั้ง
จากสมาชิก : 0 ครั้ง
จากขาจร : 926 ครั้ง

13 ส.ค. 2551 เวลา 10:34:07

โพสต์โดย

คห.ที่645) เอาหน้าประเทศชาติไว้ก่อน [ไปที่ความเห็นนี้ ในกระทู้นี้]

ยอดปรมาจารย์

��

     นายจอร์จดับเบิ้ลยูบูช เข้ามาเยี่ยมเมืองบ้าน เพื่อปรึกษาราชการทางเมืองบ้านถ้วนถี่
เรื่องทวิภาคี ที่ตึกสันติไมตรีไทยคู่ฟ้า� ทำเนียบรัฐบาล
นายกฯสมัคร สุนทรเวชเด้อท่าน� เป็นประธานคอยต้านกล่าว
ผู้สื่อข่าวใหญ่น้อย� ให้เรียบร้อยอย่าฮ้อนฮน
เทิงบุคคลภายนอกเพิ่นให้ด้น�� ผู้บ่มีหน้าที่ทุกคนให้ออกไปพ้นทำเนียบก่อน
ก่อนสิบเจ็ดนาฬิกาถ่อน� อย่าได้ย้อนแม่นด่วนคืน
ทหารรักษาความปลอดภัยเพิ่นหากแตกวื่นๆ� เทิงเวนคืนบ่พักผ่อน
เอาหน้าประเทศไทยไว้ก่อน� เรื่องกำลังเดือดฮ้อน� ให้เพิ่นกลับย้อนจั่งค่อยจา��
�
       �� หน้าตาของประเทศชาติสำคัญยิ่ง เรื่องอื่นๆทุกสิ่งค่อยคุยกัน��
��
                                                ด้วยความเคารพ
                                             เซียงน้อย หนองข้อง

สาธุการบทความนี้ : 924 ครั้ง
จากสมาชิก : 1 ครั้ง
จากขาจร : 923 ครั้ง

06 ส.ค. 2551 เวลา 20:41:29

โพสต์โดย

คห.ที่299) สติไม่เป็นระเบียน ตาลาย ตายเร็ว [ไปที่ความเห็นนี้ ในกระทู้นี้]

ยอดปรมาจารย์

   คันแม่นเมาเหล้าแล้ว สติบ่เป็นระเบียบเซเสียท่า ตากะลายบ่เห็นฮุ่ง
ขับรถพุ่งแล่นเลี้ยว  เฉี่ยวเสาไฟฟ้ากะพ่องชน
ชีวิตตนสิตายถิ่ม  ทางทรัพย์สินกะเพมุ่น
เทิงชีวิตผู้อื่นพุ้น  กะตายทิ้มแม่นบ่ยัง...พี่น้องเอ้ย

                                            เซียงน้อย หนองข้อง

สาธุการบทความนี้ : 917 ครั้ง
จากสมาชิก : 1 ครั้ง
จากขาจร : 916 ครั้ง

16 เม.ย. 2551 เวลา 20:24:35

โพสต์โดย

คห.ที่649) ส่งใจเชียร์ คุณจันทร์เพ็ง นนทะสิน [ไปที่ความเห็นนี้ ในกระทู้นี้]

ยอดปรมาจารย์

     คุณจันทร์เพ็ง  นนทะสิน   เพิ่นกะหากพร้อมแล้วสิเข้าแข่งจักรยาน
เพื่อประสานสัมพันธ์  ในการแข่งขันกีฬาโลก
ขออวยพรให้คุณจันทร์เพ็ง นนทะสิน ประสบโชค  คว้าเหรียญทอง คล้องคอใส่
เป็นขวัญใจของชาวไทย  เทิงพ่อแม่ลุงป้า  ผู้คอยถ่า อยู่สกลฯ ...คุณจันทร์เพ็งเอ้ย

                          ชาวไทยทุกคนส่งใจ ร่วมเชียร์คุณจันทร์เพ็งครับ

สาธุการบทความนี้ : 913 ครั้ง
จากสมาชิก : 1 ครั้ง
จากขาจร : 912 ครั้ง

08 ส.ค. 2551 เวลา 08:55:56

โพสต์โดย

คห.ที่275) ความอดทน [ไปที่ความเห็นนี้ ในกระทู้นี้]

ยอดปรมาจารย์

     ความอดทนสินำให้  ไปเป็นหงศ์สูงส่ง
บ่ได้ลดต่ำลงเป็นอีกาเกือกกั้ว  ไปเข้าหมู่เน่าเหม็น
คนบ่เห็นเทวดาเพิ่นกะสิ่ง  หลิงนำเงาทุกเซ้าค่ำ
อันได๋สูงอันได๋ต่ำ  เพิ่นกะแยกแยะได้ ในใจนั้นบ่กล่าวจา
เทวดาเพิ่นกะตุ้ม  นำคุ้มครองคนสูงเด่น
คนเน่าเหม็นจั่งอีแฮ้ง  อย่านำก้นสิหม่นหมอง...พี่น้องเอ้ย

                                           เซียงน้อย หนองข้อง

สาธุการบทความนี้ : 876 ครั้ง
จากสมาชิก : 1 ครั้ง
จากขาจร : 875 ครั้ง

16 เม.ย. 2551 เวลา 10:35:39

โพสต์โดย

คห.ที่975) โพธิ์ชัยแห่งความหลัง [ไปที่ความเห็นนี้ ในกระทู้นี้]

ยอดปรมาจารย์

     เทศบาลโพธิ์ชัย อำเภอเมือง เซียงน้อยกะเคยยกย่างย้าย ไปหนองคายเที่ยวท่อง
ไปหาเลาะซื้อของดีดีส่งจากต่างประเทศ ท่าเสด็จพุ้นหม่องตรวจคน
ชาวลาวเพิ่นดั้นด้น  มาหนองคายต้องตรวจก่อน
สืบประวัติให้แน่นอนเป็นคนดีคักแท้ เพิ่นจั่งให้แวะมา
ท่าเสด็จมีสินค้า  นานาแนวคล่องแคล่วจ่าย
ของกิน-ใช้โพดแม่นหลาย  ทางโพธิ์ชัยบ้านเจ้าอ้ายทิดเป้าผู้รูปงาม
หากินลาบก้อยอยู่ฝั่งน้ำ  ริมแม่ของหม่องเจ้าอยู่
ไปเที่ยวอุทยานเทวลัยแก้วกู่  พุทธภูมิหากมีมาก พญานาคแม่นเด่นงาม....พุ้นแล้ว ทิดเป้าเอ้ย

ไปหนองคาย เบิ่งบั้งไฟพญานาค หากินลาบกินก้อย อ่อมน้องงัวแซบๆเลาะโขง
เซียงน้อย หนองข้อง

สาธุการบทความนี้ : 871 ครั้ง
จากสมาชิก : 0 ครั้ง
จากขาจร : 871 ครั้ง

09 พ.ค. 2552 เวลา 15:54:03

โพสต์โดย

คห.ที่289) คิดถึงความหลัง [ไปที่ความเห็นนี้ ในกระทู้นี้]

ยอดปรมาจารย์

     ฟังเสียงกบเขียดฮ้อง  น้ำตานองไหลหลั่ง
มาคึดฮอดความหลัง  ครั้งอยู่เถียงนาน้อยพุ้น นางหนุนตักอ้ายฮ่ำฮอน
สัญญากับอ้ายว่าอย่าสุมีใหม่ซ้อน  นอนนำกันอยู่กลางท่ง
ถึงสิแก่ชราลง  สองคนเฮาให้ฮักหมั่น ใจอ้ายนั้นอย่าเปลี่ยนไป...เด้อ อ้ายเอ้ย

                                            เซียงน้อย หนองข้อง

สาธุการบทความนี้ : 860 ครั้ง
จากสมาชิก : 1 ครั้ง
จากขาจร : 859 ครั้ง

16 เม.ย. 2551 เวลา 14:14:40

โพสต์โดย

คห.ที่404) คางคกขึ้นวอ [ไปที่ความเห็นนี้ ในกระทู้นี้]

ยอดปรมาจารย์

    ผู้มีอำนาจอวดโอ้  หากลืมโตได้ง่ายๆ
เพราะว่าคนทั้งหลาย  มีแต่คนนบนอบหมอบเข้าใส่คลาน
เทิงทางคำจาต้าน  บ่เคยย่านเพิ่นผิดใจ
ถือว่าตนเป็นนาย  อำนาจหลายเหลือล้น
ผิดใจคนบ่สนจ้อย   ใช้วาจาอวดเบ่ง
เป็นนักเลงขึ้นสู่มื้อ   สังมาคือคันคากน้อย ได้บืนขึ้นหละขี่วอ  งึดหลายเด้  หัวใจคนเอ้ย

                                       มีอำนาจวาสนาวาจาสิทธิ์
                                       พูดสิ่งใดไม่ผิดเพราะฤทธิ์ขลัง
                                       ที่พูดผิดกำหมัดซัดลงปัง
                                       กลายเป็นพูดถูกจังไปทั้งเพ
                                        เซียงน้อย หนองข้อง

สาธุการบทความนี้ : 858 ครั้ง
จากสมาชิก : 1 ครั้ง
จากขาจร : 857 ครั้ง

23 เม.ย. 2551 เวลา 11:04:57

โพสต์โดย

คห.ที่665) สมจิตร จงจอหอ คือความหวังเหรียญทอง โอลิมปิกอีกเหรียญ [ไปที่ความเห็นนี้ ในกระทู้นี้]

ยอดปรมาจารย์

�� สมจิตรเอ้ย ขอให้เจ้าชนะได้� ชาวไทยเอาใจส่ง
ให้เจ้าสมประสงค์� เจตน์จำนงค์ที่วาดไว้ในใจเจ้ากู่สู่อัน
เข้าในรอบชิงเหรียญทองนั้น� ให้เจ้าดุดันกัดฟันต่อ
เพื่อความสุขของอีพ่อ เพื่อความสุขของอีแม่� และชาวไทยเทิงพี่น้อง ผู้คอยจ้องถ่าฮ้องเฮ
สมจิตร จงจอหอ สู้ สู้
เซียงน้อย หนองข้อง ��

��

��

สาธุการบทความนี้ : 849 ครั้ง
จากสมาชิก : 1 ครั้ง
จากขาจร : 848 ครั้ง

12 ส.ค. 2551 เวลา 20:09:33

โพสต์โดย

คห.ที่274) สื่อลามกทำงามหน้า [ไปที่ความเห็นนี้ ในกระทู้นี้]

ยอดปรมาจารย์

     สื่อลามกเฮ็ดงามหน้า  เป็นแนวพาสังคมเสื่อม
บ้านเมืองกำลังสิฮุ่งเฮืองเหลืองเหลื่อม  แต่สื่อเสื่อมนั้นผัดหลั่งมา
พากันเฮ็ดงามหน้า  เอาสื่อลามกมากระจายแพร่
ผลกระทบสิเกิดกับไผกะแล้วแต่  เขาบ่ได้เกี่ยวข้อง เพราะสิ่งต้องการนั้นกะแม่นเงิน...ซั่นแล้ว พี่น้องเอ้ย
                                          เซียงน้อย หนองข้อง

สาธุการบทความนี้ : 841 ครั้ง
จากสมาชิก : 1 ครั้ง
จากขาจร : 840 ครั้ง

16 เม.ย. 2551 เวลา 10:19:45

โพสต์โดย

คห.ที่686) ตายแทนได้ [ไปที่ความเห็นนี้ ในกระทู้นี้]

ยอดปรมาจารย์

     ฮักเจ้าหลาย  จนสิตายแทนได้   ดวงฤทัยตาหวานพี่
คึดจิปิ  จี่ปี้  คึดข่อหล่อแข่แหล่  แต่ใจอ้ายบ่ซ่วงดี
คึดนำหลายคึดนำดวงใจพี่  คึดอยากมีเฮียนให้อยู่
คึดอยากนอนขดขี่คู้  นอนเฮียงเจ้าอยู่สู่ยาม  นางเอ้ย

ฮักเจ้าหลายคึดอยากอยู่นำเจ้าสู่ยาม
เซียงน้อย หนองข้อง

สาธุการบทความนี้ : 840 ครั้ง
จากสมาชิก : 1 ครั้ง
จากขาจร : 839 ครั้ง

16 ส.ค. 2551 เวลา 10:22:28

โพสต์โดย

คห.ที่452) ความจริงเป็นสิ่งไม่ตาย [ไปที่ความเห็นนี้ ในกระทู้นี้]

ยอดปรมาจารย์

  สามัคคีกันไว้ไทยเฮาให้หมั่นแก่น
อย่าได้แล่นพุ้นพี้  หลบลี้เรื่องบ่จริง
คันเป็นลิงหลอกเจ้า  ไผๆเขาสิมาเซื่อ
มีแต่สิเบื่อขี้หน้า หย่อนวาจาเว้าบ่อยู่คอง
สิ่งได๋ที่ถืกต้อง  ฮีตคองอย่าวางปล่อย
สังคมสิสงบเรียบร้อย  หย่อนไทเฮาเจ้าข่อยเว้าแต่จริง...นี้แล้ว พี่น้องเอ้ย

                                 ความจริงเป็นสิ่งไม่ตาย
                                  เซียงน้อย หนองข้อง

สาธุการบทความนี้ : 839 ครั้ง
จากสมาชิก : 1 ครั้ง
จากขาจร : 838 ครั้ง

06 พ.ค. 2551 เวลา 22:07:40

โพสต์โดย

คห.ที่538) ม่วนซื่นผีตาโขน [ไปที่ความเห็นนี้ ในกระทู้นี้]

ยอดปรมาจารย์

      ผีตาโขนเมืองด่านซ้าย   หากหลากหลายเด้อญาท่าน
ผีหากมีอยู่เต็มบ้าน   โฮฮ้องพ่องส่งเสียง
บุญเผวสบ่เคยเลี่ยง  ผีเต็มเมืองคนแน่นอั่ง
เทิงคนป่าทั่งบั้ง   ครึกครื้นแม่นลื่นคน
ผีตาโขนโฮฮ้อง  เป็นทำนองอีสานม่วน
มีแต่ผีล้วนๆ  สนุกย้อนฟ้อนใส่เพลง...ซั่นแล้ว  พี่น้องเอ้ย

                    ผีบ่ย้านแสงอาทิตย์กะแม่นผีตาโขนนี้แล้วผีน้องเอ้ย
                                     เซียงน้อย  หนองข้อง

สาธุการบทความนี้ : 833 ครั้ง
จากสมาชิก : 1 ครั้ง
จากขาจร : 832 ครั้ง

11 ก.ค. 2551 เวลา 00:23:38

โพสต์โดย

คห.ที่520) บุญเดือนเจ็ด [ไปที่ความเห็นนี้ ในกระทู้นี้]

ยอดปรมาจารย์

     บุญเดือนเจ็ดซำฮะบ้านให้ลูกหลานได้จำจื่อ
ปู่ย่าเพิ่นสอนไว้สู่มื้อ  ให้ลูกหลานน้อยค่อยจื่อจำ
พากันทำดีไว้  ปฏิบัติไปตามฮีต
นี่คือจารีตบ้าน  ลูกหลานหล่าอย่าสู่ไล
ให้พากันบูซาบรรพบุรุษได้  เซ่นสรวงหลักเมือไว้เด้อท่าน
พร้อมกับเทิงหลักบ้าน  ปู่ตาแฮกผู้รักษา
ผีพาราเพิ่นกะเอ้น  ผีเมืองเพิ่นกะว่า
ปาดฮ่าไปข้างหน้า  สิสมอุราเจ้ากู่สู่แนว พี่น้องเอ้ย

                              ปฏิบัติตามฮีต บ้านเมืองสิเป็นสุข
                             สิบ่มีความทุกข์ มีแต่ฮุ่งเฮืองไปหน้า
                                      เซียงน้อย หนองข้อง

สาธุการบทความนี้ : 825 ครั้ง
จากสมาชิก : 1 ครั้ง
จากขาจร : 824 ครั้ง

25 มิ.ย. 2551 เวลา 21:13:41

โพสต์โดย

คห.ที่687) กินข้าวบ่ลง [ไปที่ความเห็นนี้ ในกระทู้นี้]

ยอดปรมาจารย์

   อ้ายนี่คึดฮอดเจ้า  เหงาใจจับไข้สั่น
หย่อนคึดฮอดตาหวาน การงานบ่อยากสร้าง  ยืนอ้างว้างอยู่ผู้เดียว
ใจห่อเหี่ยวบ่อยากเหลียวเบิ่งข้าว  หย่อนมันเหงาบ่คลายซ่วง
ข้าวปลาน้ำบ่มีห่วง  อยากมาหาแต่เจ้า  กินข้าวแม่นบ่ลง

ฮักหลายคึดฮอดหลายครับ
เซียงน้อย หนองข้อง

สาธุการบทความนี้ : 824 ครั้ง
จากสมาชิก : 1 ครั้ง
จากขาจร : 823 ครั้ง

16 ส.ค. 2551 เวลา 10:36:31

โพสต์โดย

คห.ที่370) ที่มาของหนองข้อง [ไปที่ความเห็นนี้ ในกระทู้นี้]

ยอดปรมาจารย์

     หนองข้องเด้อ คือชื่อของหมู่บ้าน เฮือนซานหม่องเซาอยู่
เปรียบดั่งอู่ข้าว อู่น้ำ หนองใหญ่เฟื่องเลี้ยงหมู่คน
หนองหม่องซุกหม่องซ้น  สัตว์น้ำน้อย-ใหญ่อาศัยเย็น
เป็นคือเฮียนคือซาน  หมู่ ปู ปลา หอย เทิง ซิวกุ้ง
ในน้ำน้อ..มีจอกแหนหลายมันเลยหยุ่ง  รุงรังฝั่น พันกายตนคนลอยผ่าน
กะเลยตั้งชื่อเป็นหมู่บ้านว่า  หนองข้อง  หละอู่คำ...ซั่นแล้ว  พี่น้องเอ้ย

                                          เซียงน้อย หนองข้อง

สาธุการบทความนี้ : 823 ครั้ง
จากสมาชิก : 2 ครั้ง
จากขาจร : 821 ครั้ง

19 เม.ย. 2551 เวลา 14:20:55

โพสต์โดย

คห.ที่248) โมโหไม่ดี [ไปที่ความเห็นนี้ ในกระทู้นี้]

ยอดปรมาจารย์

     อันว่าความโมโหนี้  สิพาโตตกต่ำ
เฮ็ดให้เฮาหน้าก่ำ เปิดราศรีกะพ่องนั้นยามเฮาท้าด่าตี
คันแม่นเป็นจั่งซี่  พวกคนเฮานี้อย่าสุได้เอาอย่าง
มันสิเพแตกม้าง  ครอบครัวฮ้างแตกกระจาย
ยามเมื่อพ่อแม่ฮ้าย  ลูกกะใจสั่นขวัญเสีย
ผัวกับเมียตบตีกัน  สิสุขสันติ์จั่งได๋ได้
มีแต่มันสิพาให้  ครอบครัวเฮาหมองเก่า
เทิงราศรีกะสิเศร้า  ชาวบ้านกะเย้ยหยัน...ซั่นแล้ว  พี่น้องเอ้ย

                                          เซียงน้อย หนองข้อง

สาธุการบทความนี้ : 822 ครั้ง
จากสมาชิก : 1 ครั้ง
จากขาจร : 821 ครั้ง

14 เม.ย. 2551 เวลา 19:22:52

โพสต์โดย

คห.ที่402) จิตมนุษย์นี้ไซร้ ยากแท้หยั่งถึง [ไปที่ความเห็นนี้ ในกระทู้นี้]

ยอดปรมาจารย์

     อันว่าใจคนนี้  แสนเต็มทีสุดลำบากยากสิอ่าน
ต่างพันธุ์เผ่าวงศ์วาน  ส่องใจกันบ่ได้ว่าโหดฮ้ายฮักหอม
บึดเดี่ยวตรงบึดเดียวอ้อม  บึดเดียวชั่วบึดเดียวดี
มาเต็มทีแท้น้อใจคน  สังสับสนหลายซั้น
หยากสินำทันได้  ใจของคนมันบ่ง่าย มาวุ่นวายแท้ๆ...หาทางแก้กะบ่มี...พี่น้องเอ้ย

                                   ดีกะอยู่หนี่ ฮ้ายกะอยู่หนี่ แนวจั่งซี่เอิ้นว่าคน
                                                เซียงน้อย หนองข้อง

สาธุการบทความนี้ : 820 ครั้ง
จากสมาชิก : 2 ครั้ง
จากขาจร : 818 ครั้ง

23 เม.ย. 2551 เวลา 10:24:17

โพสต์โดย

คห.ที่797) หัวขาด [ไปที่ความเห็นนี้ ในกระทู้นี้]

ยอดปรมาจารย์

     ถึงเวลาหาผู้นำมาชี้  ทางที่ดีให้เดินหย่าง
ผู้นำสิเฝ้าเบิ่งทาง  ชี้ว่าดีหรือฮ้ายหมายได้ให้อยู่ดี
การปกครองในระบอบประชาธิปไตยนี่  เฮาต้องมีผู้นำเก่ง
เพิ่นสิพารีบเร่ง  พัฒนาบ้าน  ให้ฮุ่งเฮือง  พี่น้องเอ้ย

ระยะทางพิสูจน์ม้า  กาลเวลาพิสูจน์คน
เซียงน้อย  หนองข้อง

สาธุการบทความนี้ : 817 ครั้ง
จากสมาชิก : 1 ครั้ง
จากขาจร : 816 ครั้ง

17 ก.ย. 2551 เวลา 09:42:25

โพสต์โดย

คห.ที่530) เป็นห่วงบ่าวลูกแม่โขงคนกล้า [ไปที่ความเห็นนี้ ในกระทู้นี้]

ยอดปรมาจารย์

เดิกๆมาจั่งซี่  คงหนาวเหน็บจนกายสั่น
รั้วของชาติคงพากันหนาวสะบั้น ขันสู้หมู่ไพรี
แนวหลังทุกคนนี้   ขออวยพรให้  รั้วของไทยคนเก่ง
ได้พากันรีบเร่ง  ทนสู้หมู่ไพรี เด้อ พี่น้องทหาร หาญ เอ้ย

                       สุขเถิดมวลประชา ทหารกล้าจะคุ้มครอง
                                เซียงน้อย หนองข้อง

สาธุการบทความนี้ : 811 ครั้ง
จากสมาชิก : 1 ครั้ง
จากขาจร : 810 ครั้ง

04 ก.ค. 2551 เวลา 21:35:56

โพสต์โดย

คห.ที่648) เชิญธงชาติไทยขึ้นสู่ยอดเสาแล้ว [ไปที่ความเห็นนี้ ในกระทู้นี้]

ยอดปรมาจารย์

     ธงชาติไทยหากถูกเชิญขึ้นสู่ยอดเสาแล้ว  การเข้าร่วมโอลิมปิก
ร่วมแข่งขันกีฬาสมาชิก  เข้าแข่งขันร่วมกันไว้
ธงชาติไทยเฮาได้  ปลิวไสวงามเด่น
ชาวไทยเห็นแล้วสดชื่น  เริงรื่นกันทั่วเมือง  พี่น้องเอ้ย
                  ๗ สิงหาคม ๒๕๕๑

สาธุการบทความนี้ : 808 ครั้ง
จากสมาชิก : 1 ครั้ง
จากขาจร : 807 ครั้ง

08 ส.ค. 2551 เวลา 08:25:28

โพสต์โดย

คห.ที่288) กลัวเปลี่ยนใจ [ไปที่ความเห็นนี้ ในกระทู้นี้]

ยอดปรมาจารย์

     เหลียวขึ้นไปเทิงฟ้า  เห็นแต่ดวงจันทราเจิดจ้าแสงสว่าง
อ้ายนี้คึดฮอดนาง อยากมานั่งใกล้ๆ พอให้ได้หละอุ่นกาย
แต่หากจนปัญญาของบักอ้าย  หย่อนเฮาอยู่ใกล้กันแสโยช
ใจอ้ายโลดสิขาดสะบั้น  ย้านแต่นางนั้นหละเปลี่ยนใจ...ซั่นแล้ว นางเอ้ย

                                           เซียงน้อย หนองข้อง

สาธุการบทความนี้ : 804 ครั้ง
จากสมาชิก : 1 ครั้ง
จากขาจร : 803 ครั้ง

16 เม.ย. 2551 เวลา 14:08:47

โพสต์โดย

คห.ที่400) ขันธ์ห้า [ไปที่ความเห็นนี้ ในกระทู้นี้]

ยอดปรมาจารย์

  รูป   พาเฮาตั้งกายอยู่เป็นคน
เวทนา ทุกข์ทนขัดสนฮนฮ้อน
สัญญา จำอดีตย้อนส่งใส่ปัจจุบัน
สังขาร คนเฮาพลันแต่งปรุงกันบำรุงไว้
วิญญาณ  นำมาให้เป็นคนนำหมู่ พร้อมทั้งบอกให้ฮู้ ดี-ฮ้าย-ต่ำ-สูง
คนเฮากะเลยหยุ่ง  นำวิญญาณทุกเช้าค่ำ

ขันธ์ห้า แตกหนีไปคนละก้ำ สินำคนบ่เห็นไง่
ใหญ่ปานได๋กะต้องม่วย รวยล้นกรมล้นค่าย สิวอนไหว้กะบ่ยัง...คนเฮาเอ้ย

                                         รูป เวทนา สัญญา สังขาร วิญญาณ รวมเป็น ขันธ์ห้า
                                                             เซียงน้อย หนองข้อง

สาธุการบทความนี้ : 804 ครั้ง
จากสมาชิก : 2 ครั้ง
จากขาจร : 802 ครั้ง

22 เม.ย. 2551 เวลา 20:03:38

โพสต์โดย

คห.ที่533) ตอบบ่าวพนมไพร [ไปที่ความเห็นนี้ ในกระทู้นี้]

ยอดปรมาจารย์

     เซียงน้อยหากสำบายหมั่น  สุขสำราญคือเก่า
จั่งได้จาปากเว้า  นำเจ้าผู้อยู่ไกล
บ่าวพนมไพรคนโก้  โรคาคงไกลห่าง
คงมีแต่สุขสมหวัง  สนุกนอนนั่งเทิ่งเริงรื่นอยู่สู่ยาม
ถึงเฮาอยู่ไกลกันคนลำก้ำว่านั้น  ความสัมพันธ์อย่าได้ห่าง
ส่งผญามาเว้าจากันบ้าง  พอได้ซื่นอุราแน่เด้อ บ่าวพนมไพรเอ้ย

                    ขอบคุณหลายๆเด้อที่ถามข่าว บ่าวพนมไพรเอ้ย
                                    เซียงน้อย หนองข้อง

สาธุการบทความนี้ : 804 ครั้ง
จากสมาชิก : 1 ครั้ง
จากขาจร : 803 ครั้ง

08 ก.ค. 2551 เวลา 23:44:14

โพสต์โดย

คห.ที่537) Halloween ด่านซ้าย [ไปที่ความเห็นนี้ ในกระทู้นี้]

ยอดปรมาจารย์

    มาดของอ้ายเซียงน้อย  ผู้ทำหน้าที่พิธีกร
มาออนซอนหลายงานผีตาโขน  ให้หมู่คนได้ชมเที่ยว
มีแห่งเดียวในโลก  คือเมืองเลยด่านซ้ายถิ่น
ฮาโลวีนไทยแท้ๆ  เชิญมาแม่แวะเที่ยวชม
ตัวกระผมอ้ายเซียงน้อย  พิธีกรชายบรรยายกล่าว
เว้าเกี่ยวกับเรื่องราวผีตาโขนให้คนฮู้  ผู้จาต้านให้ท่านฟัง
บ่เคยเมื่อยบ่เคยยั้ง  บรรยายให้เพิ่นฟังจนว่าแจ้งจ่างป่าง
เทิงชาวไทย-ชาวฝรั่ง  ผู้เพิ่นมาถามส่อพอได้ฮู้เรื่องผี(ตาโขน)ซั่นดอก พี่น้องเอ้ย

                     อยากเห็นผี(ตาโขน)เชิญไปเที่ยวด่านซ้ายเด้อข้าน่อย
                                       เซียงน้อย หนองข้อง

สาธุการบทความนี้ : 804 ครั้ง
จากสมาชิก : 1 ครั้ง
จากขาจร : 803 ครั้ง

10 ก.ค. 2551 เวลา 21:19:21

โพสต์โดย

คห.ที่536) มาดของอ้ายเซียงน้อยกับงาน Halloween [ไปที่ความเห็นนี้ ในกระทู้นี้]

ยอดปรมาจารย์

     มาดของอ้ายเซียงน้อย  ผู้ทำหน้าที่พิธีกร
มาออนซอนหลายงานผีตาโขน  ให้หมู่คนได้ชมเที่ยว
มีแห่งเดียวในโลก  คือเมืองเลยด่านซ้ายถิ่น
ฮาโลวีนไทยแท้ๆ  เชิญมาแม่แม่นเที่ยวชม
โตกระผมอ้ายเซียงน้อย  พิธีกรชายบรรยายกล่าว
เว้าเกี่ยวกับเรื่องราวผีตาโขนให้คนฮู้  ผู้จาต้านให้ท่านฟัง
บ่เคยเมื่อยบ่เคยยั้ง  บรรยายให้ฟังจนว่าแจ้งจ่างป่าง
เทิงชาวไทยชาวประเทศต่าง  ผู้เพิ่นมาถามส่อ พอได้ฮู้แม่นเรื่องผี ซั่นดอก พี่น้องเอ้ย

                       ผีหลายที่สุดในโลกกะแม่นเมืองด่านซ้ายนี่แล้วพี่น้องเอ้ย(ผีตาโขนดอกว้า)
                                           เซียงน้อย หนองข้อง

สาธุการบทความนี้ : 802 ครั้ง
จากสมาชิก : 1 ครั้ง
จากขาจร : 801 ครั้ง

10 ก.ค. 2551 เวลา 20:26:11

โพสต์โดย

คห.ที่1029) อยากซวนเผิ่นไปอยู่บ้านนำ [ไปที่ความเห็นนี้ ในกระทู้นี้]

ยอดปรมาจารย์

     อ้ายเซียงน้อยมาฮอดใกล้ลุงป้า  ชาวอีสานจุฬาโตผู้ข้าอยากมาแว่
เซียงน้อยมายืนแท้แหล้   อยู่PARAGON บ่อนสยาม
มีแต่คนงามล้ำ  คึดอยากซวนเมื่อนำไปอยู่ก้ำทางเมืองด่าน
เอาไปซ่อยเวียกบ้าน  เมื่อหุงข้าวเป่าไฟ
คงเป็นไปบ่ได้  ด่านซ้ายน้อ แม่นเมืองป่า
สาวส่ำน้อนส่ำหล่า   คงบ่กล้าไปเสี่ยงตาย ดอกตี้
เซียงน้อยเลยลัดที่หลี้  ไป AIRPORT หม่องจอดเครื่องบินใหญ่
จักเผิ่นสิพากันไปไส มาเป็นตางึดง้อ  ย่างไปไสพ้อตั้งแต่คน ...กะยังวะ บ่าวแคนเอ้ย

ป้าด.iiii ผู้สาวส่ำน้อยกรุงเทพฯ มีแต่ผู้เป็นตาฮักเน๊าะ
เซียงน้อย หนองข้อง

สาธุการบทความนี้ : 802 ครั้ง
จากสมาชิก : 1 ครั้ง
จากขาจร : 801 ครั้ง

05 ก.ค. 2552 เวลา 14:21:01

โพสต์โดย

คห.ที่510) แนวทางเขียนผญาของเซียงน้อย [ไปที่ความเห็นนี้ ในกระทู้นี้]

ยอดปรมาจารย์

บ่าวพนมไพรเอ้ย
     ให้บ่าวพนมไพรกำหนดหัวข้อไว้  แล้วทำใจให้ว่าง วางงานเบิดสู่อย่าง
เมื่อจิตของเฮาแปนเปล่าว่าง  จั่งหาถ้างป่องสิไป
คำผญาสิไหลเรื่อย  บ่มีเฟือยมาข้องเกี่ยว
บ่มีคดบ่มีเลี้ยว  จั่งสิถึงหม่องบ่อนสิเอา...ซั่นดอก  บ่าวพนมไพรเอ้ย

                   ทำจิตให้ว่าง แล้วค่อยกำหนดทางเดิน เราจะเพลินกับกับคำกลอน
                                           เซียงน้อย หนองข้อง

สาธุการบทความนี้ : 800 ครั้ง
จากสมาชิก : 1 ครั้ง
จากขาจร : 799 ครั้ง

25 พ.ค. 2551 เวลา 11:45:26

โพสต์โดย

คห.ที่531) ลูกแม่โขงคนเก่ง [ไปที่ความเห็นนี้ ในกระทู้นี้]

ยอดปรมาจารย์

     เกิดมาเป็นฮั้วบ้าน  แสนสำราญสุขยิ่ง
ไพรีมาบ่เคยนิ่ง  เร็วรี่สู้หมู่มาร
เป็นฮั้วแล้วบ่เคยย้าน  พวกศัตรูต้องสู้ต่อ
อันตรายบ่มีท้อ  บ่มีย้านหวั่นเกรง
สุขประชาต้องรีบเร่ง  ฟ้าวบำรุงมุ่งสานก่อ
แสนลำบากกะบ่ท้อ  ลูกแม่โขงจ้อสู้หมู่โจร พี่น้องเอ้ย

                             รั้วสู้ทนเป็นคนกล้า ชาวประชาก็ร่มเย็น
                                         เซียงน้อย หนองข้อง

สาธุการบทความนี้ : 795 ครั้ง
จากสมาชิก : 1 ครั้ง
จากขาจร : 794 ครั้ง

07 ก.ค. 2551 เวลา 21:09:01

โพสต์โดย

คห.ที่293) กระดูกสันหลังของชาติ [ไปที่ความเห็นนี้ ในกระทู้นี้]

ยอดปรมาจารย์

     ชีวิตชาวนาเฮานิ่น  เพิ่นเปรียบเป็นกระดูกสันหลังของชาติ
เฮาหากมีวาส-สนาแท้ๆ  ได้หาเลี้ยงคนให้ใหญ่สูง
ชาวไฮ่ ชาวนา เฮามันกะลูกทุ่ง  อยู่นำท่งกินกะปู
อีกกบเขียด ปลาไหล อยู่ในฮู  ปลา กุ้ง หอยลอยในน้ำ
สังมางามสมบูรณ์แท้  เมืองไทยเฮาดีกว่าเพิ้น
บ่เคยขาดเคยเขิน เฮามีของกินตลอด ชีวิตรอดฮอดได้ขาย...พุ้นเด้ พี่น้องเอ้ย

                                         เซียงน้อย หนองข้อง

สาธุการบทความนี้ : 794 ครั้ง
จากสมาชิก : 1 ครั้ง
จากขาจร : 793 ครั้ง

16 เม.ย. 2551 เวลา 15:06:35

โพสต์โดย

คห.ที่401) ระยะทางพิสูจน์ม้า กาลเวลาพิสูจน์คน [ไปที่ความเห็นนี้ ในกระทู้นี้]

ยอดปรมาจารย์

     ระยะทางพิสูจน์ม้า  กาลเวลาคือคำตอบ
บอกว่าซังหรือชอบ  ชั่ว ดี ฮ้าย มนุษย์คน
สาระวนนำลิ้น  หากกลับปิ่นแปรปรวน
คือสำนวนโบราณ  กาลเวลาพาเฮาฮู้
เป็นคำสอนของพ่อตู้แม่ตู้  ตายายแต่เก่าก่อน
อย่าสุฟ้าวใจฮ้อน  ตัดสินได้ว่าชั่วดี
พิจารณาให้ถี่-ถ่วน  ครบกระบวนจั่งค่อยเอ่ย
อย่าหวังเลยว่าสิฮู้  คำหวานๆนั้น ว่าเท็จ-จริง...ฮิ่ตรองก่อนเด้อ  พี่น้องเอ้ย

                                     ด่วนตัดสินใจก่อน จะเดือดร้อนภายหลัง
                                                เซียงน้อย หนองข้อง

สาธุการบทความนี้ : 791 ครั้ง
จากสมาชิก : 2 ครั้ง
จากขาจร : 789 ครั้ง

23 เม.ย. 2551 เวลา 10:17:45

โพสต์โดย

คห.ที่377) ยาวดีล้อม ป้อมดีหาย [ไปที่ความเห็นนี้ ในกระทู้นี้]

ยอดปรมาจารย์

     อย่าได้มัวเทียวอวดโอ้  เอาดีใส่โตให้ร้ายเพิ่น
เฮาสิได้ขาดเขินทางญาติ-ติ พี่น้อง   บริวารนั้นกะบ่มี
อันปิยะวาจานี้ให้เฮามีเอาไว้  แนวมัดใจพี่น้องเพิ่น
สิเจริญก้าวหน้า  ลุงป้ากะฮักหอม
อย่าได้เฮ็ดอ้อมป้อม  ล้อมดีทาง คือหางน้อกระต่าย
ให้ยาวคือสาย-   โทรเลขพุ้นถ่อน  ยามเดือดร้อน  ค่อย ฮัลโหล...พี่น้องเอ้ย

                                           เซียงน้อย หนองข้อง

สาธุการบทความนี้ : 787 ครั้ง
จากสมาชิก : 2 ครั้ง
จากขาจร : 785 ครั้ง

20 เม.ย. 2551 เวลา 20:57:47

โพสต์โดย

คห.ที่407) กินบนเรือน ขี้รดบนหลังคา [ไปที่ความเห็นนี้ ในกระทู้นี้]

ยอดปรมาจารย์

      อย่าไปเสียเวลาวุ่น  ทำคุณคนใจบาป
เขาบ่ทราบดี้ดี้  ดีชั่วบ่คะนิง
ทำดีเขากะนิ่ง  ทำชั่วเขากะเสย
บ่ฮู้เลยทางบุญคุณ  บาปบุญบ่เคยพ้อ
มีแต่สิงอโงโค่ง  เนรคุณหนุนโทษใส่
สบโอกาสแล้วกะได้  ทำลายให้หมุ่นเพ
โอ้ย..ข้าน้อยมางึดใจเด้   งึดหลายเด้คนใจขุ่น
เนรคุณเพิ่น ช่างเฮ็ดได้   บาปกรรมฮ้ายช่างบ่กลัว...คนเฮาเอ้ย

                                 ทำดีกับคนเนรคุณ เหมือนทำบุญกับพระไม่มีศีล
                                                 เซียงน้อย หนองข้อง

สาธุการบทความนี้ : 787 ครั้ง
จากสมาชิก : 2 ครั้ง
จากขาจร : 785 ครั้ง

23 เม.ย. 2551 เวลา 14:15:18

โพสต์โดย

คห.ที่296) พระคุณของพระแม่คงคา [ไปที่ความเห็นนี้ ในกระทู้นี้]

ยอดปรมาจารย์

    แม่คงคาเพิ่นหากมีพระคุณล้ำ  ทำให้ชีวียืนยาวยหยิ่ง
ของสกปรกทุกสิ่ง  พระแม่คงคาเพิ่นหากล้างสรงให้ สรรพสิ่งได้สะอาดงาม
พระคุณของแม่น้ำ  จั่งยิ่งใหญ่มหาศาล
สุดประมาณคณานับ  หากมากมายหลายล้น
ให้คนได้ดื่มกินเทิงใช้  เทิงหดผักหดหมี่
ต้องอาศัยแม่วารี  จั่งสิเย็นซุ่มฉ่ำ  พระคุณแม่น้ำหากแม่นหลาย...พี่น้องเอ้ย

                                          เซียงน้อย หนองข้อง

สาธุการบทความนี้ : 784 ครั้ง
จากสมาชิก : 1 ครั้ง
จากขาจร : 783 ครั้ง

16 เม.ย. 2551 เวลา 15:38:58

โพสต์โดย

คห.ที่406) กระต่ายกับเต่า [ไปที่ความเห็นนี้ ในกระทู้นี้]

ยอดปรมาจารย์

     เต่ามันไปซ้าๆ  ตามเวลาบ่หยุดหย่อน
บ่มีทางรีบร้อน  ใจฮ้อนด่วนพะลัน
แต่มีใจมุ่งหมั่น  ในงานที่รับมอบ
ชอบบ่ชอบกะสู้  ดุดันได้ด่วนเพียร
อย่าไปเวียนวนเว้า  ดูถูกเขาว่าต้อยต่ำ
แม่นแนวทำขายหน้า  ลุงป้าสิเย้ยหยัน
เกิดผิดพลาดขึ้นมานั้น  ไผเด้น้อสิมาซ่อย
สิได้นั่งเหงาหงอย  แหงนหน้าเบิ่งแท้แล้...หาทางแก้แม่นบ่มี...พี่น้องเอ้ย

                              มั่นใจไปอย่างเต่า  จะไม่เศร้าอย่างกระต่าย
                                               เซียงน้อย หนองข้อง

สาธุการบทความนี้ : 778 ครั้ง
จากสมาชิก : 1 ครั้ง
จากขาจร : 777 ครั้ง

23 เม.ย. 2551 เวลา 14:03:41

โพสต์โดย

คห.ที่278) ใช้ถนนให้ระวัง [ไปที่ความเห็นนี้ ในกระทู้นี้]

ยอดปรมาจารย์

    ถนนหนทางทุกมื้อนี้  มันแน่นอั่งเหลือคณา
การสัญจรไปมา  ให้ระวังน้อกันบ้าง
เกิดอุบัติเหตุขึ้นแล้วกะสิเพแตกม้าง  สูญเสียทรัพย์เปล่าๆ
จำไว้แน่เด้อพวกหมู่เจ้า  ยามเฮาเข้าสู่ถนน...พี่น้องเอ้ย

                                        เซียงน้อย  หนองข้อง

สาธุการบทความนี้ : 777 ครั้ง
จากสมาชิก : 1 ครั้ง
จากขาจร : 776 ครั้ง

16 เม.ย. 2551 เวลา 11:05:12

โพสต์โดย

คห.ที่405) อย่าข่มเขาโคขืน [ไปที่ความเห็นนี้ ในกระทู้นี้]

ยอดปรมาจารย์

     งัวบ่กินหญ้า  อย่าไปข่มเขาขืน
เขาสิกลืนบ่ลง  อั่งคาคอแค้น
เพิ่นบ่เต็มใจแล้ว  บ่แม่นแนวไปยัดเยียด
เขาสิเกียจหนังหน้า  ว่าเป็นบ้าอำนาจแฮง
คันเพิ่นแจงประสงค์ชี้  ทางแนวดีให้รีบตอบ
จั่งสิชอบตามฮีต   อดีตพุ้น เพิ่นสั่งสอน...ลุงป้า เอ้ย

                                     อย่าขืนใจให้เขาทำ จะระกำเมื่อภายหลัง
                                                เซียงน้อย  หนองข้อง

สาธุการบทความนี้ : 775 ครั้ง
จากสมาชิก : 1 ครั้ง
จากขาจร : 774 ครั้ง

23 เม.ย. 2551 เวลา 12:41:54

โพสต์โดย

คห.ที่283) เบอร์โทรเจ้าชู้ [ไปที่ความเห็นนี้ ในกระทู้นี้]

ยอดปรมาจารย์

     เบอร์โทรของอ้ายนั้น  สังมาหลายแท้น้อพี่
บอกว่าน้องโชคดีเป็นผู้มีความสำคัญแท้ๆ  นางหลงยิ้มแท้แล้อยู่ผู้เดียว
อ้ายหากเทียวแจกเบอร์ให้  กับสาวงามทุกข์คุ้งค่วง
นางสิเป็นบ้านป่วงโทรหายามได๋สายบ่ว่าง  พออยากม้างเครื่องทิ้มบ่อยากยิ้มใส่พี่ชาย...แท้เด้ พี่เอ้ย

                                          เซียงน้อย หน้องข้อง

สาธุการบทความนี้ : 774 ครั้ง
จากสมาชิก : 1 ครั้ง
จากขาจร : 773 ครั้ง

16 เม.ย. 2551 เวลา 12:39:26

โพสต์โดย

คห.ที่688) ปานโรงสีใหญ่ [ไปที่ความเห็นนี้ ในกระทู้นี้]

ยอดปรมาจารย์

     นางเอ้ยตั้งแต่อ้ายได้น้องเป็นคู่ครองนี่  ปานอ้ายมีโรงสีใหญ่
โรงสีไฟประจำบ้าน  ยามนอนนั่นสนั่นเฮือน
หัวสะเทือนนอนบ่ได้  ยามขวัญใจได้พ่นถั่ง
กรนเสียงดังปานฟ้าฮ้อง   เสียงดังก้อง แม่นทั่วเฮียน. ซั่นแล้ว.ทองคำเอ้ย

ได้เมียนอนเสียงดัง อบอุ่นบ่เงียบเหงา
เซียงน้อย หนองข้อง

สาธุการบทความนี้ : 774 ครั้ง
จากสมาชิก : 1 ครั้ง
จากขาจร : 773 ครั้ง

16 ส.ค. 2551 เวลา 11:56:50

โพสต์โดย

คห.ที่663) ลูกแม่ [ไปที่ความเห็นนี้ ในกระทู้นี้]

ยอดปรมาจารย์

     ยามเมื่อลูกนั่นได้  การงานทำแม่ใจซื่น
หัวเราะร่าเริงรื่น  ซื่นใจยิ้มกระหยิ่มงาม
ลูกแม่เอ้ย  แม่ยอมทุกข์หย่อนลูก  กะหวังเพิ่งยามชรา
แม่ฮ้องไห้โศกา  ยามลูกมาหลงทางฮ้าย
ลงเกือกกั้วสิ่งเลวร้าย  ฝันของแม่สลาย ในดวงใจแม่ขมขืน
ทุกวันคืนแม่หากนั่งฮ้องไห้  ยามลูกได้  แม่นไฝ่เลว  ลูกเอ้ย

ลูกเป็นคนดีแม่ชื่นใจ ลูกเหลวไหลแม่อกตรม
เซียงน้อย หนองข้อง

สาธุการบทความนี้ : 772 ครั้ง
จากสมาชิก : 1 ครั้ง
จากขาจร : 771 ครั้ง

11 ส.ค. 2551 เวลา 23:28:00

โพสต์โดย

คห.ที่684) คึดฮอดนางหลาย(มอบให้อ้ายบุญหลายสายยาว) [ไปที่ความเห็นนี้ ในกระทู้นี้]

ยอดปรมาจารย์

     นางเอ้ย  อ้ายนี่คึดฮอดเจ้า  เหงาใจบ่คลายซ่วง
คึดขึ้นมายามได๋อ้ายนี่วินค่วงๆ  เป็นบ้าป่วงละเมอ
เป็นงงๆเซ่อๆ  นั่งอยู่ไสใจวีหว่อน
คิดเห็นหน้างามงอน ถึงยามนอนกะแฮ่งบ้า  คึดเห็นหน้า อยู่บ่เซา  ซั่นแล้ว นางเอ้ย

ที่ใดมีรักที่นั่นมีสุขจริงหรือ
เซียงน้อย หนองข้อง

สาธุการบทความนี้ : 772 ครั้ง
จากสมาชิก : 1 ครั้ง
จากขาจร : 771 ครั้ง

16 ส.ค. 2551 เวลา 09:45:10

โพสต์โดย

คห.ที่246) เดือนสติไฟไหม้ [ไปที่ความเห็นนี้ ในกระทู้นี้]

ยอดปรมาจารย์

     การเสียบปลั๊กไฟหรือจุดธูปไหว้พระนั้น  กะหวังเพิ่งให้เป็นสุข
เป็นหยังน้อต้องมาทุกข์  เกิดอัคคีภัยไฟไหม้บ้าน
เพราะว่าเฮาขี้คร้าน เผลอเลอโลดบ่เอาใจใส่
ไฟจั่งได้ลุกไหม้เมืองบ้านจนวอดวาย
ให้ใส่ใจแน่เด้อท่าน หลังไหว้พระวิงวอน
นี่เป็นอุธาหรณ์ นั่งขอพรแล้วเหมิดเกลี้ยง
เพียงแค่เฮานั่งไหว้ภาวนาขอสุแนว  แล้วบ่เอาใจใส่
ไฟจั่งได้ลุกไหม้  เฮียนซานเจ้าเป็นเถ้าผง...พี่น้องเอ้ย

                                         เซียงน้อย หนองข้อง

สาธุการบทความนี้ : 767 ครั้ง
จากสมาชิก : 1 ครั้ง
จากขาจร : 766 ครั้ง

14 เม.ย. 2551 เวลา 18:21:22

โพสต์โดย

คห.ที่668) เหนือ-อีสาน ฝนตกหนัก [ไปที่ความเห็นนี้ ในกระทู้นี้]

ยอดปรมาจารย์

     ฝนตกบ่หยุกยั้งเหนือ-อีสาน   หว่านคลุมทั่ว
น้ำหลากมาถ้วยทั่ว  ไหลลวดฮวดท่งนา
ท่วมสระปลาท่วมข้าวกล้า  ชาวนาน้ำตาหลั่ง
ข้าวกำลังงามสะพรั่ง  น้ำผัดท่วมบ่ยั้ง  ข้าวตายถิ่มแม่นบ่เหลือ..ซั่นแล้ว ที่น้องเอ้ย

น้อยเกินกะบ่ดี  มากไปกะเดือดร้อนน้อ น้ำนี่กะดาย
เซียงน้อย หนองข้อง

สาธุการบทความนี้ : 765 ครั้ง
จากสมาชิก : 1 ครั้ง
จากขาจร : 764 ครั้ง

13 ส.ค. 2551 เวลา 10:40:57

โพสต์โดย

คห.ที่295) วันลอยกระทง [ไปที่ความเห็นนี้ ในกระทู้นี้]

ยอดปรมาจารย์

     วันเพ็ญเดือนสิบสองมาฮฮดแล้วเด้อพี่น้อง  น้ำกะนองเต็มตลิ่ง
ชาวไทยเฮาบ่ว่าชายหรือหญิง  เพิ่นกะลอยกระทงไว้ ให้ภัยฮ้ายได้ห่างหนี
ไหลไปตามวารีกว้าง  ฝูงเคราะห์เข็ญได้ลอยล่อง
ไหลไปตามลำคลอง  ลงไปทางฝ่ายใต้  ภัยฮ้ายให้ห่างหนี
เหลือแต่ความสุขีหมั่น  ความสุขสันติ์  นั้นคงอยู่
พวกพ่อตู้แม่ตู้ เพิ่นหากสอนลูกหลานไว้บ่ให้ลืม
พากันแตกตื้มๆ  นำกระทงลงน้ำท่า
ไปกันเบิดทุกถ้วนหน้า   ลงท่าน้ำไปล่องลอย...พี่น้องเอ้ย

                                           เซียงน้อย หนองข้อง

สาธุการบทความนี้ : 761 ครั้ง
จากสมาชิก : 1 ครั้ง
จากขาจร : 760 ครั้ง

16 เม.ย. 2551 เวลา 15:31:42

โพสต์โดย

คห.ที่601) คึดฮอดอดีต [ไปที่ความเห็นนี้ ในกระทู้นี้]

ยอดปรมาจารย์

      เดิกๆข่อน  นอนบ่หลับลุกขึ้นนั่ง
เปิดลายแคนแล้วนั่งฟัง  เทิงลายใหญ่ลายน้อยโตข่อยได้ฮ่ำฮอน
คึดเห็นทางอดีตย้อน  คราวเฮาเรียนมัธยมปีที่สี่
หวนคึดหาคนดี  คนผู้งามม้อต้อละออหล้าผู้ไค
จากกันไปคนละก้ำ  นำบ่เห็นฮอดไง่
ต่างคนกะต่างไล  จากกันไปอยู่คนละหม่อง อ้ายนี่คึดนำน้องอยู่สู่ยาม แท้น้อ คนไคเอ้ย

            หอมดอกจิกมาคึดฮอดความหลัง หอมดอฮังมาคึดฮอดความเก่า
                    อ้ายมีแต่นั่งเศร้า  คึดนำเจ้าอยู่สู่ยาม นางเอ้ย
                                  เซียงน้อย หนองข้อง

สาธุการบทความนี้ : 759 ครั้ง
จากสมาชิก : 1 ครั้ง
จากขาจร : 758 ครั้ง

02 ส.ค. 2551 เวลา 00:47:56