เพลงหวานของบ้านทุ่ง --- เว็บบอร์ดอีสานจุฬาฯ

คห.ที่2101) [ไปที่ความเห็นนี้ ในกระทู้นี้]

ศิษย์พี่

ภูมิลำเนา : ร้อยเอ็ด
เข้าร่วม : 03 ก.ย. 2554
รวมโพสต์ : 51
ให้สาธุการ : 60
รับสาธุการ : 193550
รวม: 193610 สาธุการ

ใจประสงค์สร้าง จั่งได้ย่างมาหา
ใจประสงค์นำพา จั่งผ่าบู๋มาพ้อ
มากินกอเกลือจ้ำ มากินนำภาชน์ฮ่วม
อยากมาพ้อพบหน้า อีสานบ้านหมู่เฮา
เป็นน้องใหม่เด้อเจ้า ขอฝากตนโต
หากทำการบ่สมควร โปรดเตือนอภัยให้
ขอเป็นไททางเจ้า สิขอเนาอาศัยฮ่วม
คาระวะทุกท่าน สงสารข่อยผู้พลอย แหน่เด้อ ท่านเอ้ย...

สาธุการบทความนี้ : 292 ครั้ง
จากสมาชิก : 2 ครั้ง
จากขาจร : 290 ครั้ง

03 ก.ย. 2554 เวลา 21:03:14

โพสต์โดย

คห.ที่2102) [ไปที่ความเห็นนี้ ในกระทู้นี้]

คุณจารย์ใหญ่:
ทุกข์ยากล้ำปากก่ำกินมันหมก เหิ่งปานใดเด้น้อสิได้กินมันต้ม

ทุกข์บ่มีเสื้อผ้าอยากป๋าหำ แล่นข่วมท่งพุ้นแหล้ว จารย์ใหญ่เอ้ย
ทุกข์บ่มีเมียอยู่ซ้อน อยากนอนลื้อยู่ฮู ยังว่า55555ฮิ้วๆๆ

สาธุการบทความนี้ : 231 ครั้ง
จากสมาชิก : 1 ครั้ง
จากขาจร : 230 ครั้ง

03 ก.ย. 2554 เวลา 21:23:27

โพสต์โดย

คห.ที่2104) [ไปที่ความเห็นนี้ ในกระทู้นี้]

คุณจารย์ใหญ่:

คุณยาว ผญาย่อย:
ใจประสงค์สร้าง จั่งได้ย่างมาหา
ใจประสงค์นำพา จั่งผ่าบู๋มาพ้อ
มากินกอเกลือจ้ำ มากินนำภาชน์ฮ่วม
อยากมาพ้อพบหน้า อีสานบ้านหมู่เฮา
เป็นน้องใหม่เด้อเจ้า ขอฝากตนโต
หากทำการบ่สมควร โปรดเตือนอภัยให้
ขอเป็นไททางเจ้า สิขอเนาอาศัยฮ่วม
คาระวะทุกท่าน สงสารข่อยผู้พลอย แหน่เด้อ ท่านเอ้ย...

ใจประสงค์สร้างย่างมาบ่ย้านเหมื่อยบ่น้อ
สังบ่ขี่รถจ้างแอร์พร้อมฉ่ำเย็น
ว่าอยากเห็นพบหน้า มากินปลาภาชน์ฮ่วม
บุญมีหากสิพ้อ กินก้อยฮ่วมกัน

สบายดีเด้อเจ้าน้องใหม่ผู้มาหลัง
อยู่สุขังสุขีอย่าป่วยโซเด้อเจ้า
ขอฮับเอาพี่น้องผู้เซาเเวเข้ามาฮ่วม
ยินดีต้อนรับไว้มาสรรสร้างซ่อยกัน ท่านเอย พะนะ...

ว่าสิโดยสารซ้าง มายาม ย้านตกแหย่ง ท่านเอ้ย
คันสิขี่ม้าบักจ้อน ย้านมันเต้นแล่นสะยาน
สิโดยสารเรือบินหรื่อ ทรงบ่คือชั่วสิฮอด
Airportอยู่ห่างบ้าน โดนนานมื้อสิย่างเถิง
ว่าสิทอดถะเนิ้ง เบาะอ่อนอ่อน สหพันธ์ทัวร์
เงินในถงกระเป๋าแปน ค่าโดยสารกะแพงฮ้าย
กะเลยดายเดียวดั้น เดินทาง มาคือว่า
แม่นสิเมื่อยสิล้า กะยอมแหล่ว ย้อนอยากเห็น จารย์ใหญ่เอ้ย...

สาธุการบทความนี้ : 312 ครั้ง
จากสมาชิก : 3 ครั้ง
จากขาจร : 309 ครั้ง

05 ก.ย. 2554 เวลา 16:23:17

โพสต์โดย

คห.ที่2107) ตอบมังกรเดียวดายครับ [ไปที่ความเห็นนี้ ในกระทู้นี้]

ถิ่นลำเนาผู้ข้า นามพาราเมืองใหญ่
สีแก้วเป็นถิ่นบ้าน ตำนานเค้าเก่าหลัง
ตั้งแต่ครั้ง องค์เอกพระยาขอม
ยอมเอาบุตรีนาง ไอ่คำดวงแก้ว
เอามาเป็นรางวัลให้ ไผชนะบั้งไฟ สมัยนั้นได้เป็นคู่
ชาวสีแก้วได้รวมหมู่ เฮ็ดบั้งไฟฮ่วมบ้าน นางน้องไอ่คำ
มีหมอลำหมอร้อง แคนพิณแหนแห่
ซุมผู้เฒ่าผู้แก่ สืบตำนานพิ้นบ้าน สมัยนั้นต่อมา
เดี๋ยวนี้เพลาผ่าย กลายมานับล่วง
ปวงประชาใหญ่น้อย สีแก้วได้ฮุ่งเฮือง
เรื่องตำนานดนตรีนั้น แคนเป็นเอกประจำใจ
บ่มีไผบ่ฮู้จัก เฒ่าพ่อเคน ฝีมือสร้าง
เป็นแนวทางสินค้าโอท้อปสิขอบอก
ส่งออกนอกสุมื้อ จนเงินล้นอั่งกระเป๋า
อยากได้บ่ละเจ้า เอาไปม่วนทางเมืองขอน
ออเดอร์มา เร็วทันใจ สิส่งไปถึงเฮือนเจ้า
หรืออยากมากินข้าว ตางมายามเยี่ยมถิ่น
ยินดีต้อนรับท่าน เซิญถ่อนอย่าเกรง..ท่านเอ้ย

สาธุการบทความนี้ : 405 ครั้ง
จากสมาชิก : 3 ครั้ง
จากขาจร : 402 ครั้ง

05 ก.ย. 2554 เวลา 19:34:32

โพสต์โดย

คห.ที่2109) ตอบจารย์ใหญ่ [ไปที่ความเห็นนี้ ในกระทู้นี้]

จารย์ใหญ่เอ้ย อันว่าแนวสินค้า ตีราคาตามฮีต เนาะท่าน
บ่อาจตอบดอกท่าน ต้องถามเฒ่าอีพ่อเคน
คันเพิ่นเห็นดีด้วย กับจารย์อาจแจกจ่าย
คันแม่นยาวนี้เฮ็ดได้ อยากยอม้วนแบ่งปัน พุ้นล่ะ
อันว่ายาวคนนี้ มีแต่ไปหาล่อง
โอ่ใส่แคนหม่องหั่น โอ่ใส่แคนหม่องนี้ พอม้วนซื่นใจ
คันจารย์ใหญ่อยากได้ ลองแว่ไปถาม เบิ่งเด้อ
เฒ่าพ่อเคน สมจินดา ซื่อนาม ของท่าน
คันแม่นจารย์ไปทางนั้น โอกาสดี เซิญเยี่ยมแว่
ทั้งพ่อแก่แม่เฒ่า ยินดีต้อนรับรอง ท่านเอ้ย

55555โอ้ยกว่าสิโพสได้ ไฟกะดับเอ้าดับเอา เน็ตกะกาเต่ายังว่าท่านเอ๋ย 5555

สาธุการบทความนี้ : 276 ครั้ง
จากสมาชิก : 2 ครั้ง
จากขาจร : 274 ครั้ง

05 ก.ย. 2554 เวลา 20:39:00

โพสต์โดย

คห.ที่2111) [ไปที่ความเห็นนี้ ในกระทู้นี้]

ข้าวสากผ่าย พรรษากาล พวมสิผ่าน
อีกบ่โดนบ่นาน หมู่พระสงฆ์ องคเจ้า สิไลผ้า ห่มวสันต์
ออกด้นดั้น ผายโผด ศาสนิก
จาริกบุญบำเพ็ญ แห่งวิถี โคดมท่าน
คึดฮอดจารย์ไปไสน้อ โดนแล้วน้อยังบ่ซอด
หรือนอนกอดเมียอยู่บ้าน หรืองานยาก จั่งบ่เห็น
เลาะหาเล่นแวเวียน มาถามข่าว ซือดอกหวา
ผมผู้ยาวคนขี่คร้าน หากวนบ้าน ให้เพิ่นซัง ซือดอกขะน้อย ฮ่าฮ่าฮ่า ฮิ้วๆๆๆๆ

สาธุการบทความนี้ : 442 ครั้ง
จากสมาชิก : 2 ครั้ง
จากขาจร : 440 ครั้ง

16 ก.ย. 2554 เวลา 20:55:39

โพสต์โดย

คห.ที่2117) ยินดีต้อนรับ พลายแก้ว หนุ่มหล่อจากตักศิลานครเด้อครับ [ไปที่ความเห็นนี้ ในกระทู้นี้]

โอนอ ...เจ้าผู้พลายสารซ้างโตงาม คุณประเสริฐ
เห็นเบิดเจ๋อเบิดเจ้ย เข้ามาเว้า ต่อกลอน
ออนซอนเด้อคำเว้า เจรจา ซ่างมาม่วน แท้น้อ
แม่นผะอวน เกิดมาพร้อมผญาน้อยโม่มกิน มาฤๅ
หรือเฒ่าแม่ รินเอาน้ำ พจมาน ตาลอ่อย
มาป้อนแลงป้อนเช้า คำเว้า เจ้าจั่งหวาน ว่าฤๅ
จารย์เอ้ยจารย์ ให้เจ้ารับเอาน้อง ทองคำ ล้านค่า ไว้แหน่เด้อ
พลายแก้วบา ผู้เพิ่นเป็นปราชญ์กล้า ของชาวบ้าน ถิ่นอี่สาน
มหาศาลค่าความเว้า อีสานจุฬาเฮา ขอต้อนรับ ผู้สูงค่า
เอาไว้เป็นปราชญ์ผญา พอได้เป็นแบบเบื้อง ภายลุนพุ้นสิสืบครอง
ท่านเอ้ย...
ยินดีต้อนรับ พลายแก้ว เด้อครับ มาพาพี่น้องจ่ายผญาเล่นพอเป็นแบบอย่าง สืบสานวัฒนธรรม ฮีตครอง ของบ้านเฮาไว้แหน่ซั่นดอกหวา 55555

สาธุการบทความนี้ : 705 ครั้ง
จากสมาชิก : 2 ครั้ง
จากขาจร : 703 ครั้ง

06 ต.ค. 2554 เวลา 15:33:34

โพสต์โดย

คห.ที่2135) [ไปที่ความเห็นนี้ ในกระทู้นี้]

หยิกหยอกเว้าเย้าหยอกภาษากลอน
ตาออนซอนเสียงผญากล่าวสนทนาเว้า
พ่องเซิญซวนกันกินข้าวไปมาหาแว่
นี้ล่ะแหมกะจั่งคือพี่น้องไทบ้านหมู่อีสาน
บ่ว่าสิอยู่บ้านหรือสิอยู่แดนไกล
ไทอีสานบ่เคยลืมฮีตคลองเดิมเค้า
ไปเฮือนโตกินข้าวมาเฮือนเฮากินน้ำท่า
บ่เคยป๋าปล่อยถิ่มเตรียมต้อนรับรอง
ฮักกันเด้อพี่น้องท้องถิ่นดินอีสาน
อย่าให้นักการเมืองมาจ่องดึงดังได้
อย่าให้เขามาให้ยุแยงตะแคงแหย่
แตกฮอดพ่อฮอดแม่แยกฮอดญาติพี่น้องเสียเซื้อเผ่าพันธุ์
ไทยสิอยู่ได้นั้น อาศัยฮักมาเป็นแกน
บ่แม่นแล่นนำเงินสิ่งมายาเล่ห์
บ้านสิเพพังม้างเสียไทยเสียชาติ
เสียญาติติพี่น้องเสียฮีตฮ่องควร พี่น้องเอ้ย

สาธุการบทความนี้ : 351 ครั้ง
จากสมาชิก : 1 ครั้ง
จากขาจร : 350 ครั้ง

16 ธ.ค. 2554 เวลา 17:30:39

โพสต์โดย

คห.ที่2148) คึดฮอดจารย์ใหญ่ [ไปที่ความเห็นนี้ ในกระทู้นี้]

ปีใหม่กลายมาหลายมื้อ หัวตะต่าวคืนเฮือน พี่น้องเอ้ย
ยากนำการนำงาน ยุ่งปาน ฝอยขัดหม้อ
ฟ้าวกุลีกุจอจ้ำ ตำกระดาน เขียนอ่าน
จ่ายผญาคำหวานหวาน มาผสานโสตท่าน กานท์กลอนเค้า เผ่าอีสาน
คึดฮอดจารย์(ใหญ่)ผู้เพิ่นเฝ้า เนาว์เฮือน ต้อนรับแขก
มื้อนี้ได้พบพ้อ จั่งยอไหว้ฝ่ายกร
ขออวยพรมาล้าล้า ให้จารย์รับเอาสา พรดีของปีใหม่
ให้สดใส ซาบซ่า โคล่ากะบ่ปาน
อายุนานยืนมั่น พันปี อย่าได้มีมื้อเหี่ยว เด้อ
แนวจารย์เคยเอาเยี่ยว ให้มันซันเท้อเล้อ อย่ามีมื้ออ่อนคอ
งอเอินเงินว่านั้นให้เต็มถงเต็มไถ่ ใช้บ่อเหมิดเจ้าจั่งเควี้ยงไปให้ผุซื่อยาว เนาะ 555
อันผุสาวขอให้มีเป็นร้อย สนุกโคมสนุกขี่
เหมิดแฮงแล้วกะจั่งวี ฟาดแฮงแฮงไปฮอดบ้าน เฮือนข่อยผุซื่อยาว อีกเนาะ 555
คันแม่นเจ้ากินเหล้า กินเมาเมา แล้วกะเว้าม่วนม่วน
ซวนสาวแอ๋แอ่นฟ้อน แล้วซาวคว้าใส่...555
ดมกะให้ดมหน่อยหน่อย แก้มเขาสิเป็นฮอย ยามฮอดบ้าน พ่อเขาสิถามข่าว
มันสิเถิงหว่างคราว ไปฮอดเฮือนผู้ใหญ่บ้าน เสียแบ๊งค์ค่าใหม
อันพรชัยเหมิดนี้ ขอยกให้ฟรีฟรี บ่คิดค่าราคาส่ง
ให้ประสงค์มาดแม้งคือแท้ดั่งหมาย เด้อ จารย์ใหญ่เอ้ย 555ฮิ้วๆๆๆๆๆ

สาธุการบทความนี้ : 335 ครั้ง
จากสมาชิก : 2 ครั้ง
จากขาจร : 333 ครั้ง

20 ม.ค. 2555 เวลา 19:34:51

โพสต์โดย

คห.ที่2153) ผญา บั้นตัดพ้อน้อยใจ [ไปที่ความเห็นนี้ ในกระทู้นี้]

ไกลเกินฝัน คันคิดหวัง อยากมีน้อง มาประคอง เคียงคู่
ย้านได้เป็นแค่ซู้ บุญบ่ยู้ ให้ฮ่วมหมอน
ทุกคืนนอน ฝันเห็นหน้า นึกว่าน้องมาหา ซาวมือไปผั่นว่างเปล่า
บัดใด๋แท้ เพิ่นลักมีผุบ่าว ตั๋วให้หลง คิดอ้อนต้อน เสียรู้ลูกผุญิง
กกบ่ติง ทำทรงกวยแต่ก้าน พ่นหว่านแต่คำตั๋ว
ลวงเจ้าหัว ปลดผ้าเหลือง แล่นคุงกะไดบ้าน
สงสารชาย แหน่เปี๋ยงหล่า อย่ามาตด ล้อหมา ให้นำก้น หวังท้องอิ่ม
เจ้าผู้พิมค่าล้าน สงสารอ้ายผู้ฮักจริง แหน่เด้อหล่าเอ้ย

สาธุการบทความนี้ : 309 ครั้ง
จากสมาชิก : 2 ครั้ง
จากขาจร : 307 ครั้ง

07 ก.พ. 2555 เวลา 21:08:52

โพสต์โดย

คห.ที่2157) ของขวัญวาเลนไทน์ [ไปที่ความเห็นนี้ ในกระทู้นี้]

บ่มีหยังสิมอบให้ มีเพียงแต่หัวใจ ของคนที่ไร้ค่า นางเอ้ย
วาสนา ซินซาตาต่ำต้อย แม่นงอยฟ้า กะบ่สูง
อยากพยุงตนขึ้น ให้เทียมนาง ผั่นบ่เกิ่ง หล้าเอ้ย
มือซาวเถิง ขาผั่นหวิดดินซ้ำ คะมำล้ม คาบขี่ดิน
แนวว่าซินบ่พาเกี้ยว สายแนน บ่พาจ่อง
ได้แค่มอง บ่อาจเอื้อม ดึงเจ้า เข้าฮ่วมชม
บ่สมแห อย่าพายข่อง ปูปลาบ่สมหนอง อย่าบืนดิ้น หวังได้อยู่
บุญบ่สมนารถซู้ แม่นดันยู้บ่เกิ่งซา ดอกหล่า
สิบสี่กุมภา ขอให้ตาหวานฉ่ำ อ่านลำนำของพี่ แหน่เด้อนาง
แทนกุหลาบไร้สี มามอบแทนให้เจ้า เข้าใจอ้ายว่าฮักจริง แหน่เด้อ

สาธุการบทความนี้ : 440 ครั้ง
จากสมาชิก : 2 ครั้ง
จากขาจร : 438 ครั้ง

15 ก.พ. 2555 เวลา 19:41:53

โพสต์โดย

คห.ที่2160) [ไปที่ความเห็นนี้ ในกระทู้นี้]

คุณจารย์ใหญ่:
เฮียมนี้ ถือศีลห้าปลานาบ่ต้มป่น คนจั่งข้อยสิกินได้ตั้งเเต่หอย

เฮียมนี่ถือ...ศิลสองร้อย ยี่สิบเจ็ด ปานนักบวช จารย์เอ้ย
แนวสวดสวดบ่กล้าใกล้ย้านศิลม้างมุ่นทลาย ซั่นดอกหวา 555ฮิ้วๆๆๆๆๆ

สาธุการบทความนี้ : 318 ครั้ง
จากสมาชิก : 0 ครั้ง
จากขาจร : 318 ครั้ง

28 ก.พ. 2555 เวลา 22:01:12

โพสต์โดย

คห.ที่2168) [ไปที่ความเห็นนี้ ในกระทู้นี้]

คุณบักผีผ่วน:
Virusในหัวใจอ้าย นั้นคือหมายถึงคิดฮอด
ที่มาหยอดให้ทุกครั้ง และยังเว้าอยู่ดั่งเดิม
มีตั้งแต่สิเพิ่ม เติมตื่มต่อมความฮัก
ปานปักหลักความถวิล ทั่วแดนดินบน Windows
ขึ้นมาโชว์ Moniter ปานหน้าเธอในใจพี่
แม่นข่มใจใช้ Anti กี่ Version กะบ่หาย
ความเหงาแหวกแทรกใจอ้าย Scanได้กะบ่อยู่
ต้องทนบู๋พ่องหม่น ทนคิดฮอดบ่ส่างซา
MSN Online อยู่เด้อหล่า หรือโทรหาอ้ายได้บ่
ขอได้ยินเสียงเจ้า พอเบาบ้างหว่างคิดถึง
สักมื้อหนึ่งคันเป็นได้ โปรดแนบใจ Send File ส่ง
สิ Save ลงตรงใจอ้าย Rename ไว้ชื่อว่า “แฟน”....จ้า

คุ้น ๆ ว่าได้อ่านของไผหวา

สาธุการบทความนี้ : 664 ครั้ง
จากสมาชิก : 0 ครั้ง
จากขาจร : 664 ครั้ง

06 มี.ค. 2555 เวลา 23:05:49

โพสต์โดย

คห.ที่2175) กาเจ็ดสบ [ไปที่ความเห็นนี้ ในกระทู้นี้]

***กาเจ็ดสบเทิงต้นหว้า ทิดบุญมา เพิ่นเว้าบอก
นางบุญสีจื่อได้ กะเลยเว้า ต่อขยาย
ทุกข่วงค่าย กะตาตื่น ตาโต
ปาดถีโธกาอีหยัง มาต่างสัก กุณีเซื้อ ..แท้หือ
พากันลือไปเหมิดแคว้น โสกันไป หลายป่อง
หือแม่นน้ำสิท่วมฟ้า โลกากว้าง สิมุ่นพัง
หรือแม่นสัตว์กลีบ้าน เป็นสารส่ง แนวขวาง
นำเอาความกลียุค มาครอบเมือง ให้แฮงฮ้อน
ทุกคนนอนปานไฟจี้ นางบุญสี มาแจ้งข่าว
บ๋า...เฒ่าทิดยาวอยู่บ่ได้ กะเลยฟ้าว ฮ่ำฮอน
มื้อนี้... ตอนสิไปจอบบ้อน  ลองถามข่าว อาวบุญมา เบิ่งนา
มันสิจริงดั่งคำลือ จั่งบุญสี เอามาพ่น  บ่หนอ
ยาว...กะลงเฮือนได้ พายเอาแห สิบสองศอก
กะเลยออกจากเหย้า เฮือนน้อย กระท่อมตอง
มื้อนี้ลมพัดต้อง ใบไม้หล่น ลงโผเผ
ใจกะโลเลคิด หือสิจริง ดั่งคนต้าน
มันสิเป็นไปได้  ฤๅ...อันกาดำ รูปก่ำ
มีเจ็ดสบดั่งต้าน มันสิงอก หว่างจั่งได๋..ซั่นเดะ
ยาวกะสงสัยแท้ อีแม่เอ้ย ท่านนักปราชญ์
จ่งแปลงสาส์นให้ฮู้ พอแจ้งหว่างใจ แหน่เปี๋ยง อัญญาเอ้ย...

สาธุการบทความนี้ : 600 ครั้ง
จากสมาชิก : 1 ครั้ง
จากขาจร : 599 ครั้ง

04 พ.ค. 2555 เวลา 22:50:00

โพสต์โดย

คห.ที่2178) [ไปที่ความเห็นนี้ ในกระทู้นี้]

*** กวีศิลป์แต่งแต้ม เสนาะโสต สนานเสียง
เว้าสำเนียงชาวอีสาน ให้ม่วนยิน บ่วายเว้น
แม่นเข็ญจน ยังทนสู้ คู่อีสาน ให้ยืนยิ่ง
สิ่งควรค่าเลิศล้ำ ให้คงมั่น คู่อีสาน ท่านเอ๋ย

สาธุการบทความนี้ : 261 ครั้ง
จากสมาชิก : 2 ครั้ง
จากขาจร : 259 ครั้ง

09 มิ.ย. 2555 เวลา 12:16:56

โพสต์โดย

คห.ที่2187) [ไปที่ความเห็นนี้ ในกระทู้นี้]

คุณจารย์ใหญ่:
เหลียวเห็นภูผาหล้อนสอนลอนซ้อนกันอยู่ พี่อยากไปเว้าชู้ชอนเล่นดั่งหน่วยภู

***พี่จารย์เอ้ย สิมาจาเว้าเล่น ขอซอน ซ้อนบ่อน
สิมาขอ เข้าซ้อน ซอนเล่น ดั่งหน่วยภู จั่งใด๋น้อ
แนวผุซายเจ้าซู้ กะเว้าง่าย ตามลาย น้อพี่น้อ
น้องนี่อาย คันบ่จริง หมู่คน สิหยันเย้ย
อ้ายอย่าเลยครองเค้า ฮีตเก่า แต่เป็นมา
คันว่าจริงให้มาจา นำพ่อนาง ผู้เพียรเลี้ยง
ขันหมากพลู เตรียมมาพร้อม พงศ์พันธุ์ พร้อมพร่ำ
บ่แม่นมาหยอดเว้า ผญาน้อย พอคึดนำ พี่เอ๋ย 5555ฮิ้วๆๆๆ
(ขอเว้าแทนผุสาวแหน่ 5555คันแข่ว)

สาธุการบทความนี้ : 917 ครั้ง
จากสมาชิก : 5 ครั้ง
จากขาจร : 912 ครั้ง

24 มิ.ย. 2555 เวลา 09:08:02

โพสต์โดย

คห.ที่2193) [ไปที่ความเห็นนี้ ในกระทู้นี้]

คุณจารย์ใหญ่:
บุญชู คันสิเมือนำเจ้าเต็มทีหัวใจอยู่ ย้านเเต่แม่นั้นน้องว่า ย้านเเต่ป้าเจ้าฮ้าย ย้านเเต่อ้ายเจ้าเว้า โลดผัวเจ้าสิไล่ฟัน
คีงขวัญ คันเจ้าเว้าจั่งซั้น ขอให้กลั่นเป็นคำคัก ขอให้นางนั้นมาทักเเห่งกันพันอ้าง
น้อนาง น้องมาสัญญาหมั้น นำพี่ชายเว้ากลั่นๆ อกกระสันต์ปวดร้าวหนาวฮ้อนห่มใน
อ้ายนี้ คันได้วาจาเว้าต้องเอาจริงหรอกเป็นเเหน่ ความปากจาได้ว่าเเล้ว ต้องเอาแท้หรอกเเน่นอน

เดียวนี้ อ้ายกะว่ามักน้อง น้องกะว่านั้นมักอ้าย เเน่นเเหน่บ่แปรผัน คนมักกันบ่ควรเเพง เเข้งขากะบายได้
น้อนาง บายในไสกะบ่ฮ้าย น้อนางคันว่าเเหน่ ขอบายเเพรนั้นเเผ่นผ้าของน้องเจ้าห่มมา

เดียวนี้ คันว่าเจ้าบ่กล้า จักเจ้าเกิดมาหยัง ส่างบ่ตายคาฮู ดั่งกะปูยามเเล้ง
นางเอ้ย อดพอแปลงกระบวนให้เห็นลายหน่องนิเเหน่ง ให้นางเว้านั้นเเน่นๆแฟนอ้ายว่าจังใด๋

อกอุ่น มาเอากันให้มันเเล้ว เบิ๊ดสู่เเนวน้องอย่าปล่อย อายุเฮาบ่ฮอดร้อยสิอดได้ฮอดย่านใด
คนไค ไผสิอดหรอกทนได้ ให้น้องฮ่ำหรอกฮอนคิด คันได้ชมเต็มใจ หากแม่นตายกะพอเเล้ว

นางเอ้ย เเนวเฮาเป็นคนสร้าง โลกานั้นโลกหลุ่ม ตัณหามันนั้นห่อหุ้มเเสนตื้อติ่วอสงข์
พี่น้อง องค์พระพุทธเจ้าใช้ชาตินั้นกรรมเวร ก็เป็นนำตัณหาโลดจ่องดึงนั้นตันไว้

คนไค ขอให้สายใจน้องสาวคำนางให้จาต่อ คันเเม่นเว้าถืกข้อ สิขอน้องเข้าเเต่งงาน จั่งว่าเเก้มปั่นหวั่น สวรรค์อยู่ในใจเอย..่

***ฮ้วย พอพอพอ นางนี่บ่เอาแหล่ว พี่จารย์เอ้ย เจ้าอย่าล่วง
แนวของรัก ของหวง น้องนี่ขอ ขอดเมี้ยน มูลเค้า อี่แม่ปัน
สิมาบีบมาคั้น เอาง่ายง่าย ตามใจชาย
ป้าด น้องนี่อายอย่ามาซูน สิหม่นรา คีน้อง
มืออย่าวอง ใจอย่าฟ้าว จาวา อ้ายอย่าล่วง ตี้ล่ะ
อันของหวง อ้ายอย่ารั้น ดันยู้ ตู่สิเอา
ส่างสิมาหาเว้า เอากันสา แบบง่ายง่าย พะน้า
อายชาวเมือง แหน่ล่ะพี่ แนวนี่ เพิ่นบ่เสริญ
ความเพิ่นเอินมาเว้า เกิดมาหยัง คันขี่ขลาด พะนะ
ป้าด จารย์หยังน้อ บาดนี่ สังหาญเว้า ว่าเป็น
คันพี่จารย์อยากล่องเล่น ง่ายง่าย สบายใจ
เสาไฟอยู่ ติดเฮือน เขากะเจาะ ฮูไว้
แหย่ไปตี้ล่ะจ้า จักสามคืน ไผสิว่า
เอาจนขาซี้ฟ้า สมใจเจ้า อี่พ่อจารย์ ตั้วพี่เอ้ย 55555 ฮิ้ว ๆๆๆ

สาธุการบทความนี้ : 242 ครั้ง
จากสมาชิก : 2 ครั้ง
จากขาจร : 240 ครั้ง

26 มิ.ย. 2555 เวลา 19:32:44

โพสต์โดย

คห.ที่2199) [ไปที่ความเห็นนี้ ในกระทู้นี้]

คุณจารย์ใหญ่:

คุณยาว ผญาย่อย:

น้อนาง คันว่ามักคือบ่ให้พี่ใกล้ จับไหล่บายแขน
ว่าจั่งใดน้อแฟนสิแม่นบ้อแนวนี้
เดียวนี้ มักอีหลีบ้อน้องหล้า สิเอาชายอีหลีบ่
ขอเห็นใจแหน่ล่ะน้อง พี่ขอต้องหน่วยบักนาว

น้อสาว มันสิจางหรือส้ม ขมเค็มเด้น้องอุ่น
ยามขอซูนน้องพัดฮ้าย ขอซูนซ้ำด่าพี่ชาย

แฟนเอ้ย เลยสิบ่ได้ล่ำ เห็นบ่อนเบาหนัก
บ่าวพี่ชายจาคำคัก หากเล่ามายทางน้อง

น้อนาง เว้านำใจแม่ญิงนี้ บ่มีจริงเจ้าจักอย่าง
เว้าแต่ปากอยากแต่ท้องใจน้องบ่แน่นอน

นางเอ้ย แนวว่าเฮือคาแก้ง ถอยคืนมันบ่ง่าย
คันว่าน้องเจ้ามักอ้าย ต้องยอมให้พี่นี้บาย

เดียวนี้ ขอให้สายใจน้องตัดขาดสีนเพียง
พี่สิคอยฟังเสียง หม่อมพะนางสิจาเว้า
พี่สิเซาลงไว้ สาวคำนางให้จาต่อ พี่ชายเด้อคำเอย...

***หึย หึย หึย ! เว้าท่อได๋ ผั่นหั่งหม่น แนวว่าคน หน้ามึนใหญ่
พี่จารย์เอ้ย ว่าท่อได๋ ผั่นหั่งหยับเข้าใกล้ บ่อายบ้าน เพิ่นสิเห็น
เว้าเอาเป็น เห็นแก่ได้ บ่เห็นใจ คนอื่น
ขืนอยู่นำ คงสิบ่ซอดแจ้ง เสร็จจารย์แท้ แน่นอน
พี่เอ้ย เจ้าอย่าฟ้าวใจฮ้อน รีบล่วง เกินกาล
หากมันเถิงเวลา น้องสิยอ ถวายม้วน
บ่สมควรตอนนี้ มันบ่ดีพ่อแม่น้อง สิด่า
หากผิดพลาดขึ้นมา น้องคนเดียวท่อนั้น สิทนสู้ รับกรรม
คันอยากคลำ อดบ่ได้ สิปรึกษา กะได้อยู่ พี่เอ้ย
ควายอี่ตู้ อยู่ไต้เล้า นมมันโต้น เต่งตึง
ไปคลึงสาตี้อ้าย คงเต็มมือ บักนาวใหญ่
หน่ำลงไป หม่องหนักเบา คันอยากเมี้ยน เซิญอ้าย ขื้นขี่โคม พี่จารย์เอ้ย 5555 ฮิ้วๆๆๆๆๆๆ

สาธุการบทความนี้ : 496 ครั้ง
จากสมาชิก : 1 ครั้ง
จากขาจร : 495 ครั้ง

28 มิ.ย. 2555 เวลา 22:35:15

โพสต์โดย

คห.ที่2203) [ไปที่ความเห็นนี้ ในกระทู้นี้]

คุณป้าหน่อย:
คักขนาด มวยถืกคู่ สูสีแล้ว
แนวผู้ชม สังมาม่วน ...แท้เด้
ทั้งฮาเฮกะผ่องนั้น ทั้งจารย์ท่าน เผิjนผู้ยาว (ผญาย่อย )
ไวๆ ฟ้าว ฮีบมาเด้อ กำลังม่วน ...
ทั้งสองอวน สองอ้าย ผู้ทางป้า ถ่าแต่ฟัง....เด้อจ้า

ขอบคุณคุณป้าหน่อยที่ติดตามอ่านครับ มีผู้อ่านผู้เขียนกะมีกำลังใจครับ

สาธุการบทความนี้ : 430 ครั้ง
จากสมาชิก : 1 ครั้ง
จากขาจร : 429 ครั้ง

01 ก.ค. 2555 เวลา 18:56:02

โพสต์โดย

คห.ที่2204) [ไปที่ความเห็นนี้ ในกระทู้นี้]

คุณจารย์ใหญ่:

คุณยาว ผญาย่อย:

คุณจารย์ใหญ่:

คุณยาว ผญาย่อย:

อ่ำถ่ำ แก้มน้องนั้นอ่ำถ่ำ หยับหนีสิหยับนำตีนทำสิหยับใส่
บาดว่าหยับใกล้ๆ นางน้องว่าอย่าเซา...
นางเอ้ย ชวนชมน้องว่าฮื้อ ชวนเซาพัดว่าบ่ ล่ะหน่ายใจผู้หญิงเอย
น้อนาง เจ้ากะมาช่างเว้า ให้ชายชมอีตู้ด่อน ไผสิหลอนเฮ็ดได้โอ้ยแนวเชื้อต่างกัน
อันว่า อันว่าเสาไฟนั้นมีฮูบอกอ้ายแหย่ บ่แม่นแนวหรอกน้อง อย่าหาเว้าส่างจา
ธรรมดามีแล้งมีฝนน้องกะว่า มีค่ำคืนยังฮู้แจ้งพะนางน้องบอกพี่ชาย
น้อนาง มีเดือนหงายเดือนมืด ของประจำโลกเผิ่นแต่ง คนมักกันบ่ควรแพงระหว่างพี่ชายกับอ้าย พะนะ...

โจะโจะไว้ จารย์ใหญ่-ยาว ไว้นี่ก่อน เด้อพี่เด้อ
ตอนหน้าพุ้น หั่งสิจ้าว กว่าหลัง
เฮาสองคน พากันตั้ง ประเด็นมา โต้ตอบ
สมมุติข่อยและเจ้า เป็นสาวแส่ หนุ่มคะนอง
พากันลอง ปัญญาเล่น เชิงโวหาร พอได้ม่วน
บ่ได้หวัง ต่อสู้ เอาแพ้ ชนะกัน
หาตั้งแต่บ่อนบั้น หม่องสิม่วน ซวนหัว
ให้ผู้ชม เพิ่นมีสุข ผ่อนคลาย ยามว่าง
แปลงเป็นทาง เผื่อเอาไว้ ดารุณี น้อยใหญ่
สิได้คิด สืบสร้าง ผญาเค้า คู่อีสาน
สาธุเด้อ ปานิธาน ของผู้ข้า จงเป็นจริง ดังว่า
นักปรัชญา(ผญา)รุ่นหลัง จงพากัน สืบสร้าง ให้คงไว้ ดั่งที่ขอ แหน่เด้อ...ท่านเอ้ย

สาธุการบทความนี้ : 867 ครั้ง
จากสมาชิก : 2 ครั้ง
จากขาจร : 865 ครั้ง

01 ก.ค. 2555 เวลา 18:58:03

โพสต์โดย

คห.ที่2207) ผญาเกี้ยวสาว [ไปที่ความเห็นนี้ ในกระทู้นี้]

***หันมาฟังบทซ้อน กลอนผญา ยาวกับใหญ่
มาเห็นกันบ่ท่อใด๋ ไปนำกันอ้อนต้อน ทั้งสองอ้าย ใหญ่ยาว (5555โอ้ยน้อซื่อแมะ)
มื้อนี้ พวกผู้สาวลงเข็ญฝ้าย เดือนกะหงาย จ้าสว่าง
คึดฮอดสาวคำนาง ผู้เข็นฝ้ายถ่าอ้าย สิมาเกี้ยว ฮ่วมเตียง
ฟังสำเนียง เสียงไนน้อง สาวคำนาง แอ้แล้วแอ่
“สิบ่แว สิบ่แว ข่อยติอ้าย” เสียงไนน้อง มาซ่างวอน แท้น้อ
เจ้าผู้เนื้อก่ำก้อน อยากเป็นคู่ เฝือแฝง เบิ่งเด้หล้า
คำแพงเอ้ย ซ่างวาจา อร่อยหู ยามนางเว้า
แม่นมีซาย มาเข้า ซอนหมอน ซ้อนเสื่อ ไป่น้อ
ยินข่าวว่า บ่าวบ้านเหนือ เพิ่นมาแนม สอดสิ่ง เป็นจริงแท้ หรืออย่างใด๋
หัวคิงไคแคมบ้าน หวานเลิงเลิง ให้น้องไขปากเอ่ย เบิ่งดู้
ซู้เอ้ยซู้ต่างบ้าน วานไขข้อ กล่าวแถลง เบิ่งนา หล่าเอ้ย

สาธุการบทความนี้ : 264 ครั้ง
จากสมาชิก : 1 ครั้ง
จากขาจร : 263 ครั้ง

08 ก.ค. 2555 เวลา 18:41:12

โพสต์โดย

คห.ที่2217) ขอนุญาตจารย์ใหญ่ นำผญาบทโต้ ในปลาร้านอกไหไปโพส บ้านมหา [ไปที่ความเห็นนี้ ในกระทู้นี้]

อ้ายจารย์เอ้ย หลายคนมาเรียกร้อง อยากฟังบ่อน เจรจา
น้องสิขอ ผอวนชาย ซ่อยแบ่งปัน คำเว้า
อันสองเฮา ได้เคยโต้ โวหาร ผญาย่อย นั่นนา
สิขอโพส เว็ปอื่นบ้าง สิพอได้ บ่น้อ
พอเพิ่นได้หัวร่อ พักผ่อน ยามแลง
ขอแถลงวาจา บอกข่าวมา แหน่เด้อท่าน
เจ้าผุหวานแกมส้ม เจ้าผุหวานคารม ให้ฟ้าวตอบ ให้ฮู้แหน่
อย่าให้โดนแท้แท้ ไทบ้าน เพิ่นสิคอง พี่จารย์เอ้ย 555 ฮิ้วๆๆๆๆ

สาธุการบทความนี้ : 363 ครั้ง
จากสมาชิก : 0 ครั้ง
จากขาจร : 363 ครั้ง

13 ก.ค. 2555 เวลา 20:21:27

โพสต์โดย

คห.ที่2219) [ไปที่ความเห็นนี้ ในกระทู้นี้]

คุณจารย์ใหญ่:

คุณยาว ผญาย่อย:
อ้ายจารย์เอ้ย หลายคนมาเรียกร้อง อยากฟังบ่อนเจรจา
น้องสิขอผอวนชาย ซ่อยแบ่งปันคำเว้า
อันสองเฮาได้เคยโต้ โวหารผญาย่อย นั่นนา
สิขอโพสเว็ปอื่นบ้างสิพอได้บ่น้อ
พอเพิ่นได้หัวร่อพักผ่อนยามแลง
ขอแถลงวาจาให้บอกข่าวมาแหน่เด้อท่าน
เจ้าผุหวานแกมส้ม เจ้าหวานคารม ให้ฟ้าวตอบ ให้ฮู้แหน่
อย่าให้โดนแท้แท้ ไทบ้านเพิ่นสิคอง พี่จารย์เอ้ย 555 ฮิ้วๆๆๆๆ

คันสิปันคำเว้า สองฮาเฮาบ่ได้ว่า
ย้านเเต่อายขายหน้า กลอนข้าบ่ค่องคือ
หรือว่าพอฟังได้ เชิญบ่าวยาวให้เจ้าหย่าว
บาบ่าวยาวผญา เจ้ามาจาบอกแจ้ง ทางนี้หากบ่ขีน

มีแต่ยินดีด้วย คันมีคนอยากเห็นอ่าน
กลอนบ่หวานแกมส้ม ขมบ้างโปรดอภัย
ใสเอ้ยใสใจน้ำ ความงามๆพากันว่า เอาเด้อ
สุขสันต์ยินหม่วนเเม้ง มโนมาดปรารถนา พะนะ...

ขอบพระคุณจารย์อ้าย น้ำใจหลายล้นหลื่น
บ่ขืนขีนคัดข้อง เอาเลยน้องบ่ว่ากัน พะนะ
กะสิเอาบ่อนบั้น หม่องมันม่วน นวลหู
ไปเฟื้อฟู หว่านแถลง แบ่งปัน ไทบ้าน
ทั้งอ้ายจารย์อ้ายยาวพร้อม สองคน สิขอส่ง น้อท่านน้อ
อานิสงฆ์ส่วนนี้ บูชาท่าน ปราชญ์อีสาน พี่น้องเอ้ย...

สาธุการบทความนี้ : 331 ครั้ง
จากสมาชิก : 5 ครั้ง
จากขาจร : 326 ครั้ง

14 ก.ค. 2555 เวลา 09:19:24

โพสต์โดย

คห.ที่2222) [ไปที่ความเห็นนี้ ในกระทู้นี้]

คุณจารย์ใหญ่:
ไผสิหลิงเห็นพื้นกองฟืนในตะหล่าง งูจงอางอยู่หั้นไผสิฮู้ฮ่อมนำ

***ใจคนลึกกว่าน้ำคดกว่าเถาวัลย์ น้อพี่เอ้ย
บ่มีวันคะเนถึงว่าแม่นไผดีชั่ว
เจ้าอย่ามัวนำคำเว้าคารมของคนผ่าน
จงใช้ปัญญาญาน คิดพิเคราะห์ให้ถ้วน สาแล้วจั่งเซื่อคำ เด้อผุสาวเอ้ย
555ฮิ้ว ๆๆๆๆ

สาธุการบทความนี้ : 295 ครั้ง
จากสมาชิก : 1 ครั้ง
จากขาจร : 294 ครั้ง

23 ก.ค. 2555 เวลา 21:10:32

โพสต์โดย

คห.ที่2223) [ไปที่ความเห็นนี้ ในกระทู้นี้]

คุณจารย์ใหญ่:
ฝนบ่มาฟ้าบ่ให้ ใจบ่หม่วนระทมทุกข์
อุกหลายเด้ เด้น้อ สิอยู่ไปจั่งได๋ได้
มองลงไปในพื้น ข้าวในนากะเเห้งเหี่ยว
เหลี่ยวเบิ่งดินเเห้งเเล้ง เเนมเเล้วน่าหน่ายหลาย

ฟ้าเอ้ยฟ้าฮ้องหล้าย เป็นลายทางบ่เเม่น
บ่อนหนึ่งตกบ่อนหนึ่งเเล้ง สังคือฟ้าบ่ท่อกัน...

***เสียงเขียดน้อย ฮ้องอ่อยอ่อย ระทมทุกข์ พี่เอ้ย
อุกหัวใจพอแฮง ลูกอีสาน ย้านตายเมี้ยน
แนมไปบน เทิงฟ้า เมฆา แจ้งจ่างป่าง
ฝนบ่โฮยเหือดแห้ง กบน้อย จ่อยผอม
ข้าวในนาตายแล้ง ควายบักเล น้ำตาหลั่ง พี่เอ้ย
ฝั่งน้ำชี เห็นแต่ชายหาดเหี่ยน ชลาน้ำ กะขาดเขิน
เงินได้จากขายข้าว นาปรัง หว่างปีผ่าน
ไปซื้อปุ๋ยมาหว่าน ข้าวนาปี จนว่าเกลี้ยง บัดมาซ้ำ บาดขาดฝน
คนจนเอ้ย คงสิไปบ่ม้ม ย้านจมจุ่ม ชีวิน
หนี้สินพันธะนัง จ่องดึง บ่สุขได้
คงต้องตาย บ่เหลือค้าง แผ่นดินไทย คือเพิ่นว่าล่ะน้อ
ถ้าเลือกพรรคพอทอ “อีกสี่ปีข้างหน้า จะไม่มีคนจนในประเทศไทย พะนะ”
5555 ฮิ้ว ๆๆๆๆๆ เกี่ยวกันบ่หือ 5555

สาธุการบทความนี้ : 368 ครั้ง
จากสมาชิก : 5 ครั้ง
จากขาจร : 363 ครั้ง

23 ก.ค. 2555 เวลา 21:35:47

โพสต์โดย

คห.ที่2228) [ไปที่ความเห็นนี้ ในกระทู้นี้]

คุณจารย์ใหญ่:
นับมื้อวนไปหน้า โลกาโลกล่วง
นับมื้อล่วงป่วงปิ้น ในเเดนดินโลกลุ่ม
มีหลายอันพันปุ้ม อีมะเเหลเเถเเถด
มีร้อยเเปดหมื่นเรื่อง บ่เคยพ้อกะส่างเห็น พะนะ...

***มีแต่เพไปหน้า โลกาสิเพมุ่น พี่จารย์เอ้ย
โลกมีแต่สิวุ่น เมืองบ้าน สิวุ่นวาย
จักไผดีไผฮ้าย ยาดแย่ง ชิงดี
มือไผยาวกะซาวเถิง ผู้จ่อยโซ ถืกเขาหย่ำ
การกระทำ กับคำเว้า มันไกลกัน คนละทีป
ปากจั่งซี่ใจจั่งซั่น หันนำปิ้น กะบ่ทัน
คนทุกวันมันใจส่อ(ฉ้อ) อายบ่เป็น เห็นแก่โลภ
โกงกันหน้า ด้านด้าน บ่อายบ้าน หมู่คน
อยู่ไปโดนหั่งสิเห็นไปหน้า พี่จารย์เอ้ย เจ้าคอยเบิ่ง
บ่ฮ่ำฮอน บ่อนพระองค์เพิ่นบอกไว้ หม่องมันซื่น ซุ่มเย็น ท่านเอ๋ย

สาธุการบทความนี้ : 277 ครั้ง
จากสมาชิก : 1 ครั้ง
จากขาจร : 276 ครั้ง

30 ก.ค. 2555 เวลา 23:56:32

โพสต์โดย

คห.ที่2230) [ไปที่ความเห็นนี้ ในกระทู้นี้]

คุณมังกรเดียวดาย:
ฟ้าเอ๋ย ฟ้าฮ้องหล่าย ขี้ฝ่าไหลฮวยฮวย ใบตองก้วยโอนเอนอ่อน
ลมวีวอนพานพัดต้อง ใบตองเนิ้งอ่อนเอน
ดวงตาเว็นแสงอ่อนล้า สาดแสงลาสิลับล่วง
ทาบทานาท่งก้วง เขียวสะอ้อนสะออนหลาย
มวลแมงปอเกาะกิ่งไม้ เขียดจ่านาก็ฮ้องฮ่ำ
เขียดขาคำเป่าปี่แอ้ บักแอ๋น้อยซ่อยประสาน
ยอดกล้ากวยกิ่งก้าน ฟ้อนแอ่นโอนเอน
ลมแฮ่งเย็นโลมเลีย ไอฝนชโลมต้อง
สิ้นแสงทองตากผ้าอ้อม เมฆไหลโลมหลั่งลงต่ำ
ฝนโฮยฮำหยาดพื้น ชโลมน้ำทั่วท่งนา

คิดฮอดเด้ คิดฮอดดิน คิดฮอดกล้า คิดฮอดน้ำ คิดฮอดปลา คิดฮอดนา คิดฮอดท่ง
คิดอยากเมือคืนโค้ง ต่าวบ้านถิ่นอีสาน.. บ้านเฮา.. แท้นอ

***ฟังลำนำ นิราศฮ้อง อ้อยอิ่ง คนิงเฮือน
แดนอีสาน เคยอุดม หลากโภชนังพื้น
หวนคำนึง คืนเค้า ปูปลา น้ำท่า
เขียดจ่านา กบ อึ่งเพ้า ปลาเป้า ห่าวคะนอง
หนองน้ำใส ซิวกุ้ง หอยขม แมงตับเต่า
นกเจ่าบินเสิ่นฟ้า อีกาฮ้อง กล่อมดง
ตอนนี้คง เพียงภาพให้ จินตนา เบื้องผ่าน
ดินอีสาน ตอนนี้แล้ง ดินกุ้ม ไง่ผง
ฝนบ่ลง ชาวนาไห้ สายน้ำตา ปานสายเลือด
พิรุณเหือด ขาดข่อน ใจสะท้อน อ่อนระทวย
ควายบักเล แหงนดูฟ้า เวทนา เศร้าโศก
อกเอ้ยอก สิแตกม้าง โพยมพุ้น บ่โผดผาย
เดือนแปดกลาย เข้ามาเหย้า เนาว์พรรษา เคยเปียกซุ่ม
ปีนี้แห้ง ขาดน้ำ แม่ศีลเจ้า กะขาดแฮง
เสียงพระสังโฆแจ้ง แสดงธรรม เสียงโหยอ่อน
ออนซอนเด้พี่น้อง อีสานบ้าน ซ่างง่วงเหงา แท้น้อ พี่น้องเอ้ย

สาธุการบทความนี้ : 239 ครั้ง
จากสมาชิก : 3 ครั้ง
จากขาจร : 236 ครั้ง

02 ส.ค. 2555 เวลา 09:10:55

โพสต์โดย

คห.ที่2232) [ไปที่ความเห็นนี้ ในกระทู้นี้]

คุณจารย์ใหญ่:
บ่ได้เหงาได้เศร้า ฝนยังมาอยู่คือเก่า
ยังเข้าเหล่าหาหน่อไม้ ยังไต้เขียดอยู่นา
ยังมีหมู่ปลาบ้อน ยังนอนนากะบองส่อง
ฟังเสียงกบเขียดฮ้อง คอยน้องผู้บ่คืน

เดิกดื่นเดือนบ่เเจ้ง บ่มีเเสงจ้าสว่าง
ย่างเลาะคันเสียบเหยื่อไว้ พอได้เลาะยาม
อยู่นำทามนาห้วย ยังมีหอยให้เก็บอ่อม
ซอมแล้วซอม หาผู้หันอ่วยโค้ง โลดซอมยากกว่าปลา พะนะ...

***นี่ล่ะน้อพี่เอ้ย เพิ่นว่า ฟ้าเอ้ยฟ้าฮ้องโหย่น เสียงโยนโยน ฟ้าฮ้องแล่น
แปนเอิดเติด ขี้ฝ่า ทรงคือฟ้า มาสั่งความ
ลังบ่อนเพิ่นผั่นท่วม ล้นแก่ง นองไหล..นอ
ลังบ่อนไป บ่มีฝน ไฮ่นาแปน ปานหัวล้าน
บ้านอ้ายจารย์ มีฝนล้น บ้านอ้ายยาว ผั่นแห้งไง่
มันซ่างคือเพิ่นเว้า นี่น้อฟ้า บ่ท่อกัน
พี่จารย์เอ้ย คันจั่งซั่น สิขอท่องเทียวหา เด้อพี่เด้อ
โสสิไปหายาม บ่อนเพิ่นสม บูรณ์ล้น
โสสิหา ของต้อน แพรวา ผืนแผ่น
เอาไปฝาก ใหญ่อ้าย พอมีข้าว ทดอุทร
บาดตกยามเดือดร้อน สิขอเพิ่ง ใบบุญ
คุณพี่จารย์ เจ้าอย่ามัวหลงแนม แต่ผุสาว จนลืมน้อง
อย่าหลงมอง แต่นำส้น กกขาขาว ส้นอีหย่อง
หันมามองผู้ทุกข์ฮ้อน บุญสิได้ ใส่ถง ..เด้น้องว่า

สาธุการบทความนี้ : 238 ครั้ง
จากสมาชิก : 1 ครั้ง
จากขาจร : 237 ครั้ง

03 ส.ค. 2555 เวลา 07:55:42

โพสต์โดย

คห.ที่2234) [ไปที่ความเห็นนี้ ในกระทู้นี้]

คุณจารย์ใหญ่:

คุณยาว ผญาย่อย:

ฟ้าเอ้ยฟ้าฮ้องป้างดังไปเป็นลายต่าง สาน้อ
ฟ้าฮ้องเยาะฮ้องย้อน ฟ้าดังข้อนอยู่บ่อนเดียว

มาหลูโตนเหลือทนอิตนชาติ ชาวนาฟ้าบ่ส่ง
หลงลงตกบ่ทั่วฟ้า ชาวนาหน้าหม่นหมอง
เสียดายเด้ไนเม็ดข้าว หลายถุงปุ๋ยที่ได้หว่าน
แสนกันดารเหี่ยวเเห้ง นาเเล้งเเดดเผา

อดเอาเด้อพี่น้อง หากินไปลายใหม่
เฮ็ดจั่งใด๋โชคบ่ให้ ใจหากซ้ำตื่มนำ
กรรมสาเเล้ว ค่ารถไถค่าปุ๋ยหว่าน
ค่าคนงานอีกซ้ำ หลกหญ้ากะพ่องกัน

ฟังเยอ ยาวผญาบ่าบ่าว
ส่งข่าวคราวบอกแจ้ง อยากเทียวยื้อย่องยาม
สิหางามผืนผ้า ยาวเป็นวาผืนใหม่
ผืนจบๆเจ้าหากเว้า สิเเลกข้าวทดอุทร

ตอนนี้ฝนบ่เเล้ง นาบ่เเดงเเต่มันน้อย ทำกินพอกุ้มปาก
ฟากว่านาฝ่ายพี้มีน้อยบ่หลาย
กรีดยางขายกะพอได้ กะยังไคเเคนเเหน่
พอได้ซ่อยได้เเก้ เเป๋เข้าตื่มกัน

อันว่า นาไฮ่ฮั้วเฮ็ดเเนวเดียวบ่เป็นต่อง
คึดเอาเด้อพี่น้อง ทั้งสวนฮํ้วไฮ่นา
ต้องหลากหลายขยายไว้ มีหลายเเนวให้คึดต่อ
หนึ่งเดียวมันบ่พอ ต้องสองสามสี่ห้า หลายรายได้ใส่กัน

หรือว่าเหตุนี้นั้น คนบ่หันปิ้นอ่วย
เเม่นอยากกลับต่าวโค้ง อดใจไว้อยู่เเก่วไกล
สู้เด้อใจพี่น้อง มื้อหนึ่งเป็นของเฮา
เฮ็ดบ่เซา ใจบ่ถอย สิค่อยดีบ่มีเเย่

เเอ่ละเเนคราวนี้ ยินดีให้มาผ่าน
แดนดอนตาลฝ่ายพี้ ทางบ้านถิ่นสถาน
จารย์ใหญ่ยังคอยถ้า มาโลดเด้อพี่น้องใหม่
ไกลบ่ไกลบ่ใกล้ เงินจ้างขี่รถมา สะล่ะละ พะนะ...

***คันพี่จารย์ เว้าจั่งซั่น กะสิบ่ ไปกวน ดอกพี่เอ้ย
ขอบพระคุณความหวังดี ที่โผดผายพาทีต้าน
บ้านเมืองเฮากำลังข่อนทั้งของกินของอยาก
ก็หากหายากแท้ ถ้าเฮานี่ ขาดกะตางค์
บ้านพี่จารย์ มียางต้น ขายน้ำยาง พอเลี้ยงชีพ
นาเฮ็ดไว้ หน่อยหน่อย พอให้คุ้ม ขวบปี
ย่อนเพิ่นมีทุนสร้าง ปลูกต้นยาง ลงทุนมาก ยุเด๋
ส่วนผุยาว(ยาว ผญาย่อย) ทุนขาดเหี่ยน เลยอดสร้าง ได้แต่มอง
มื้อนี้ลม พัดต้อง ใบม่วงหล่น ลงดิน
ยินพระตีกลองเพล หั่งปวดใจ รังร้าว
สิเอาไส น้อข้าว ใส่พาเพล ให้หลวงพี่
กรรมอีหลีพี่น้อง ย่อนยาวข้า นี้ทุกข์จน
ยามขัดสน คือยามนี้ คงต้องตายเป็นผี บ่เหลือค้าง อยู่นำเพิ่น ดอกเด้อ
ขอเตินเตือนพี่น้อง ถ่าฝังซาก ผู้ชื่อยาว แหน่เด้อ...

สาธุการบทความนี้ : 256 ครั้ง
จากสมาชิก : 1 ครั้ง
จากขาจร : 255 ครั้ง

03 ส.ค. 2555 เวลา 21:06:29

โพสต์โดย

คห.ที่2236) [ไปที่ความเห็นนี้ ในกระทู้นี้]

คุณจารย์ใหญ่:

บ่ได้เว้าจั่งซั้น มาหากันบ่ได้ว่า
มาโล้ดเด้ยามเยี่ยม ยินดีต้อนฮับเอา
ตกสมัยบ้านข้อน เมืองฮอมกะตามส่าง
หมากสะตางค์บ่อยากเว้า หายากให้ค่อยเพียร

ทุนบ่หลาย ค่อยหาไว้ทำไปทีละหน่อย
ค่อยเพียรทำเทื่อละน้อย ยังสิได้ตื่มกัน

ฟ้าเอ้ยฟ้าตื้มต้ำ ฮ้องหน่ำๆนำฝนมา
ชื่นอุราหัวใจ ได้ชุ่มเย็นภายพื้น
มืนตามองเห็นน้ำ มีความหวังได้คึดต่อ
ใกล้ละน้อบาดนี้ คือความข้อยผู้ประสงค์

***ฟ้าเอ้ย ฟ้าฮ้องป้าง ทางดอนตาล บ้านจารย์ใหญ่
ฟ้าเอ้ยฟ้าฮ้องไล่ เมืองร้อยเอ็ด บ้านข่อย หัวใจน้อย ฮ่ำคะนิง พี่เอ๋ย
เมฆขัวนัว ฝนผั่นมิดอิ้งติ้ง จักมันแล่น ไปทางใด๋
มีแต่ลมวอยวอย พัดแต่ทราย จนปลิวว่อน
ออนซอนหลาย แต่นาข้าว มีแต่เฉา แห้งเหี่ยว
เหลียวเบิ่งหน้าแม่ป้า นั้นทรงเศร้า หม่นหมอง
น้ำในคลองกะเหือดแห้ง ดินแดง พอปานถ่าน
ดินอีสานเคยม่วนแม้ง กะเลยเศร้า หม่นศรี
ฟังพาทีพี่จารย์ต้าน ใจพอบาน ขึ้นจักหน่อย พี่เอ๋ย
แม่นมีเล็กมีน้อย กะยอมให้ แบ่งปัน
นี่ล่ะน้อ เพิ่นว่าอีสานนั้น น้ำใจ บ่เคยเหือด
แม่นขาดแคลน เดือดฮ้อน บ่เคยถิ่ม ปล่อยป๋า กันแหล้ว
แนวใด๋ดี กะสิเอาไปต้อน ทั้งภูษา ผืนแผ่น เด้อพี่เด้อ
ทั้งเสื่อสาด หมอนขิดน้อย สิไปต้อน พี่จารย์
อาวสานก่อนเด้อฟ้า สิขอลา พี่จารย์ก่อน
ขอเข้าบ่อน ไปนอนฟังเสียงฟ้าฮ้อง ฟังลมแล้ง มันสั่งความ ก่อนเด๋อ พี่เอ๋ย...
.....555 ฮิ้ว อุกคัก ท่านเอ้ย......

สาธุการบทความนี้ : 328 ครั้ง
จากสมาชิก : 0 ครั้ง
จากขาจร : 328 ครั้ง

19 ส.ค. 2555 เวลา 19:27:34

โพสต์โดย

คห.ที่2239) [ไปที่ความเห็นนี้ ในกระทู้นี้]

คุณอีเกียแดง {แห่งรัตติกาล}:
อ้ายเอ๊ย..

           ฟังสำเนียงจาเว้าซ่างมาม่วนเสนาะหู
           ถือเป็นครูเป็นอาจารย์ปราชญ์อีสานได้ยอย้อง
           ตามครรลองอีสานแท้บ่มีแปรผันเปลี่ยน
           ผมขอเฮียน เพียรฮู้ เอาใจสู้สู่ครรลอง นำแนเด้ออ้ายยาวเอ๊ย..

อ่านผญาอ้ายยาว..หรือสิเอิ้นว่าเป็นอาจารย์เจ้าสำนวนกะได้เนาะครับ มันม่วน อ่านไหลลื่นเห็นภาพนำครับ ขอชื่นชมครับผม

***ยินสำเนียงวาทีต้าน หัวใจบาน เอมอิ่ม
ปานได้ซิมบั้งน้ำอ้อย หวานจ้อย อร่อยหู แท้น้อ
ชมว่าครู อัญญาท่าน ปราชญ์อีสาน เพิ่นยอยิ่ง
ขนคิงลุกทั่วร่าง เขินฮ้าย เพิ่นซ่างยอ แท้นอ
ขอบพระคุณเด้อท่าน ที่สงสาร ติดตามอ่าน
บั้นผญาผู้ข้า คารมด้อย อาจบ่สม
บ่อาจคมถึงใจท่าน ขมหรือหวาน แหลมหรือเลิศ
แต่สำนวน เกิดจากใจ ข้าผู้น้อย ผู้เรียนน้อย วุฒิบ่สูง
ในหัวใจนั่นอยากมุ่ง สืบสานต่อ ประเพณี
ของดีชาว อีสานเฮา ให้ยั่งยืน คู่เมืองบ้าน
ลูกอีสานคือผู้ข้า คันแม่นมีวาสนา กะขอยู้ เสริมส่ง
ให้ผญานั้นยังคง คู่อีสานบ่เหือดแห้ง ไลถิ่ม ห่างหาย ซั่นแหล้ว...ท่านเอ๋ย
***บทสรุปบั้นสุดท้าย เฮามาพร่ำ เฮียนนำกัน น้อท่านน้อ
ผมกะขออาศัย พร่ำเฮียน นำท่าน
สองเฮามา ดันยู้ บูชาครู ผู้เป็นปราชญ์
ฝึกนำกัน มื้อละเล็กละน้อย คงสิได้ ป่องไป
สองมือขอประนมไหว้ หากผิดพลาด ในคำจา
อย่าถือสาหาความ โปรดอโห สิด้วย
สวยเอ้ยสวยดอกว่าน บานเริงเริง ให้เจ้าสิ่งตาเบิ่ง แหน่เด๋อ
คันเถิงบ่อนบาดสิม้วน อัญญาท่าน จ่งอี่ดู ...ซาลาล๊า 555 ฮิ้ว ๆๆๆๆๆ

สาธุการบทความนี้ : 295 ครั้ง
จากสมาชิก : 2 ครั้ง
จากขาจร : 293 ครั้ง

22 ส.ค. 2555 เวลา 07:19:55

โพสต์โดย

คห.ที่2240) [ไปที่ความเห็นนี้ ในกระทู้นี้]

คุณบ่าวน้อย:
ฟ้าเอยฟ้าฮ้องห่าว เสียงยาวๆบาดห่างๆ
ฟ้าฮ้องต่าง ฟ้าฮ้องป้าง คือนางน้องห่างพี่ชาย
ฟ้าฮ้องกลายไปแล้ว บ่มีฝนสิมาผ่าน
แสนกันดารยากแค้นแดนใต้มนุษย์คน

***ฝนเอ้ยฝนเม็ดน้อย ป๋าชาวนาให้หลงคอย บ่เห็นส้น เห็นไง่
สาวเอ้ยสาว...เจ้านั้นลงไปไทย ปล่อยอ้ายยาว ท่าอยู่บ้าน ซ่างใจแล้ง ยิ่งกว่าฝน..น้อ
***ฝนเอ้ยฝนอันเย็นฉ่ำ ซ่างมาฮำ แต่หม่องขุ่ม แท้น้อ
ป๋านาดอนค้างเท้อเล้อ ให้ทรายกุ้ม ไง่ผง แท้ล่ะ หือ พะนะ 5555 ฮิ้ว ๆๆๆๆๆ

สาธุการบทความนี้ : 361 ครั้ง
จากสมาชิก : 1 ครั้ง
จากขาจร : 360 ครั้ง

22 ส.ค. 2555 เวลา 11:48:10

โพสต์โดย

คห.ที่2271) [ไปที่ความเห็นนี้ ในกระทู้นี้]

***พั้วเอ้ยพั้วดอกอ้ม โลกเฮาใบกลมกลม หันหลิ่น ปานบักปิ่น
คุณธรรมพังภิน บ่อาจกลับต่าวโค้ง คืนเค้า ดั่งเดิม
ใจผู้คนกะเริ่ม เขินขาด ความอาทร
มีแต่ความโลภะ มั่งพูน เติมเข้า
ความโฉดเขลามาแทนหม่อง ในสมอง ทับถมตื่ม
ลืมฮอดความเอื้อเฟื้อ บ่มีให้ แบ่งปัน
เอาแต่โมหันธ์เข้า มาเต็ง ต้านต่อ
มีแต่ยาดแย่งยื้อ เอาเข้า ใส่โต
โส โพธิสัตโต เพิ่นได้แจ้ง บอกกล่าว มวลมนุษย์
บ่มีหยังสิยืนยง ล้วนแต่วาย มลายสิ้น
ธรณินกะถอยเสื่อม บ่มีฝน แล้งเปล่า
อาโปกะเร่งเข้า กัดพื้น แผ่นทราย
เตโชกะเร่งไห้ ฮ้อนเฮ่ง พูน-องศา
วาโยหมุน พานพัด หน่ำแฮง ทวีเพิ่ม
ชีวิตคน กะเหิมห่าว บ่เคยใส ในผิดถูก
อยากเฮ็ดหยัง กะก้าว บ่เคยย้อน ใตร่ตรอง
คึดเบิ่งเด้อพี่น้อง เป็นหยังเพิ่น จั่งไลละ
ป๋าความสุขทางโลกา มาห่มเหลือง ขอทานข้าว
ในที่สุดพระองค์เจ้า พบความจริง อันสุขยิ่ง
ใสติ่งหลิ่งส่ำหน่วยแก้ว บ่มีมื้อ หม่นหมอง
คลองธรรมเพิ่น ว่าไว้ เป็นหยังหน่อ จั่งไลละ
หลงราคีราคะ กิเลสหนา ปัญญาตื้น
คืนมาตรอง เถิดน้อท่าน อย่ายอมมาร มวลกิเลส
ทุกประเทศ หมู่บ้าน สิสุขล้น ดั่งสวรรค์...ท่านเอ๋ย

สาธุการบทความนี้ : 372 ครั้ง
จากสมาชิก : 1 ครั้ง
จากขาจร : 371 ครั้ง

02 ก.ย. 2555 เวลา 12:09:29

โพสต์โดย

คห.ที่2277) คันมักอ้าย กะแล่นนำโลด [ไปที่ความเห็นนี้ ในกระทู้นี้]

***นั่งอยู่ใต้ฮ่มหว้า ตาเหลียวเบิ่งงานนา ใจอ้าย กะโอ้อ่าว
สาวเอ้ยสาว ข้าวในนา ตายจากสิ้น ย้อนฝนแล้ง บ่ส่งเสริม
เข้าพรรษา ฝนจั่งเริ่ม ไหลหยาด เทมา
มันหากเลยเวลา กล้าบ่มี พอดำส่าม
สนุกงามตั้งแต่หญ้า แนวบ่เป็นประสา ฮกเหี้ย เสียพื้นที่
สารเคมี ก็หากแพงขึ้นหน้า เอามาพ่น ให้ยุบตาย
อยากอายเด้ นัดผุสาวเอาไว้ อ้ายสิเอาเงินไส ไปขอน้อง มาเคียงคู่
บุญซูเอ้ย ดอกว่าน สงสารอ้าย แหน่เปี๋ยง
เสียงคนลือคนร่ำ ว่าเจ้าสายตาดำ มีซายซู้ เป็นผุใหม่
ว่าเป็นลูก เศรษฐีใหญ่ เทียวมาหว่านเว้าเกี้ยว สิเอาหล่า ฮ่วมเขนย
พ่อแม่เจ้า ยิ้มเป้ยเป้ย เทิงเย้ยเยาะ หยามหยัน
อ้ายมันจน บ่มีหยังสำคัญ เจ้าอย่าไป หัวซาเว้า พะนะ
ปล่อยอ้ายยาว ให้นอนเศร้า ดมดิน กินปลาแดก
อกเอ้ยอกสิแตกม้าง ฮักเลยฮ้าง ย้อนทุกข์จน
คนเอ๋ยคน คันน้องสงสารอ้าย ใจบ่หมาย แปรเป็นอื่น
คืนนี้อ้ายสิถ้า รอน้อง อยู่ฝั่งหนอง
แต่งเอาของ สาเด้อหล่า แล้วกะลงมาหา อ้ายยืนถ้า อยู่ส่างแซ่ง
แก้มแดงแดง แฟนบักอ้าย คืนนี้ให้แล่นนำ
สาเนาะ หล่าเนาะ 555 ฮิ้วๆๆๆๆๆ

สาธุการบทความนี้ : 470 ครั้ง
จากสมาชิก : 2 ครั้ง
จากขาจร : 468 ครั้ง

09 ก.ย. 2555 เวลา 20:23:02

โพสต์โดย

คห.ที่2315) ลมหนาวกำลังมาถามข่าว... [ไปที่ความเห็นนี้ ในกระทู้นี้]

***ลมหนาวมาออดอ้อนเนื้อสะเม่นเย็นกาย
บายเอาแพรที่เคยถือมาห่มคิงหลบซ้น
คิดถึงคนที่เคยเว้าเจรจาอิงแอบ
เคยแนบเคียงชิดข้างซ่างมาฮ้างห่างไกล แท้น้อ
หรือว่าใจของน้องมีสองซ้อนผู้ใหม่ แล้วบ้อ
จั่งได้ไลบักอ้ายให้คอยน้องอยู่ท่งนา
เจ้าซ่างป๋าฮวงข้าวเหลืองทองที่เคยเกี่ยว
เจ้าซ่างลืม ชายผู้เคยเว้าเกี้ยว หมายมั่นสิแต่งดอง
กลับมาสาเด้อน้องก่อนลมหนาวสิพัดเร่ง
กลับมาฟังเสียงเพลง กลับมาตำข้าวเหม้า กลับมาเข้าฮ่วมบ่อนนอน
กับพี่น้อ หล่าเอ้ย....

สาธุการบทความนี้ : 273 ครั้ง
จากสมาชิก : 0 ครั้ง
จากขาจร : 273 ครั้ง

07 ต.ค. 2555 เวลา 20:09:40

โพสต์โดย

คห.ที่2446) [ไปที่ความเห็นนี้ ในกระทู้นี้]

คุณอีเกียแดง {แห่งรัตติกาล}:

คุณป้าหน่อย:

คุณใหญ่ยาว:
หาทางเข้า เฮือนจะของ บ่ถืกป่อง พี่น้องเอ้ย
คึดฮอดไทพี่น้อง จนใจฮ้าย หน่ายอุรา
หาถามไผกะมิดจ้อย บ่เห็นฮอยสิมาตอบ
เลยเล่าโส ผ่าม้าง สมัครเล่น ซื่อ ใหญ่ยาว
บาดนี่ 5555ฮิ้ว ๆๆๆๆ

หลายมื้อเว็น คือกันท้าว อ้ายใหญ่ยาว คืออ้ายว่า...
ว่าแหม่นยาก แต่ป้าหน่อย หายจ้อย แหม่นป่องแปว
จั๊กว่าเป็นหยัง แนวป่องได๋ หาสิเปิด เบิ๊ดฮอดคำสิว่า แนวทางเข้าส่องบ่อเห็น......
บาดนี้เบิ๊ดเวรแล้ว แปวทางแจ้งจ่างป่าง ให้หลูทาง เทียวมาต้าน ขานเว้าต่อกันเด้อ.....คำเอย

สงสัยญาอ้ายยาวเพินสิลืมระหัสผ่านเนาะครับ..เลยต้องสมัครใหม่ บ่คลิกหม่องลืมระหัสแล้วสร้างระหัสใหม่ลองเบิ่งครับ..ใช้ซื่อเก่าเอาญาอ้าย

ขอบคุณครับ เข้าได้แล้ว 555ฮิ้ว ๆๆๆ
ระหัสกะโตเก่าอยู่ ตะก่อนผั่นเข้าบ่ได้

สาธุการบทความนี้ : 252 ครั้ง
จากสมาชิก : 1 ครั้ง
จากขาจร : 251 ครั้ง

04 ก.ค. 2556 เวลา 20:41:48

โพสต์โดย

คห.ที่2449) แล้งคักหลายเหมิดแนวเฮ็ดเลยเขียนกลอนเล่น เอามาให้อ่านครับ [ไปที่ความเห็นนี้ ในกระทู้นี้]

เตรียมตัวลงไปเยี่ยม พ่อลุงยม ผุหน้ายาก
ถือหมากพลู หมากไม้ ปลาไหลเผือก ไว้โด๊บดอง
ของกินของกับแกล้ม ส้มปลาโด ส้มผักกุ่ม
ส้มผักเสี้ยนกินบ่ได้ มันผิดเก๊า อี่พ่อลุง
มือหนึ่งถือตุงเหล้า บักสองซาว น้ำกลั่น
สองสามวันไปซ่าวซื้อ ทางก้ำ ฝ่ายกาฬสินธุ์
จัดของฝากแล้วกะจิ้น ขึ้นรถ ไววา
ตากะเหลียวนำทาง หว่างไป ซ่างมาเยิ่น แท้
ใจกะเพลินนำทางกว้าง เทิงแปน แล่นรถง่าย
บ่วุ่นวายคือโลกกว้าง ของบ้าน มนุษย์คน
คราวหนึ่งกะล่วงพ้น เข้าเขต เขาสุเมรุ
ตากะแลไปเห็น หมู่ผี มันเดินผ่าย
ลังโตบายเอาไม้ ทำซง สิวือแกว่ง
ว่าข่อยขับรถแฮง ไง่ท่วมหัวท่วมหน้า บ่เกรงเป้าเผดผี  แท้ พะนะ
ตกมาฮอดหว่างนี่ ซ่างมาเปลี่ยว บ่เห็นหยัง  แท้หือ
ปานวังเวิน หุบเหว ผู้คน บ่กลายย่าง
จักทางใด๋สิไปฮอด บ้านลุงยม ป้ายบ่บอก
ซ่างบ้านนอกแท้แท้ พ่อลุงเจ้า ซ่างอยู่เป็น  แท้หือ
เอ้า...ตาผั่นเห็น เงามืด คุมมุม กลางสายหมอก
ซี้มือบอก ว่าเลี้ยวซ้าย คันไปบ้าน ท่านพ่อยมฯ
ผมเลยย่างเข้าไปใกล้ ว่าแม่นไผ อยากฮู้แน่
ฮ่วย...อ้ายทิดแหล่  เจ้ามาพี้ ได้จั่งใด๋
เจ้านั่นตายไปแล้ว ได้สิบปี กินข้าวแจก แล้วตั้ว
จนลูกสาวผู้เค้า ของเจ้า ได้แต่งงาน  แล้วเด๋
เมียเจ้าออกจากบ้าน ได้ผัวใหม่ ตั้งสามคน  แล้วหนา
หรือเจ้าสาละวนคิด ห่วงเมีย เว้าดู้อ้าย
เลาเลยบายสมุดน้อย ถือมา ให้ข่อยเบิ่ง
นี่ล่ะงานบักอ้าย เงินเดือนให้ กะบ่มี
ได้ตั้งแต่ตีนซี้ มือสั่ง ให้เฮาเฮ็ด หน้าลาวเอ้ย
มอเตอร์ไซด์จักคัน กะบ่มี ให้เฮาใช้
ไปทางใด๋ มีแต่ย่ำ จนตีนโพง ตีนเปื่อย
ทั้งพ่องเมื่อยพ่องล้า จนขาโป้ ไค่บวม
ข่อยฟังความอ้ายแหล่เว้า เห็นใจเลา ล้าเมื่อย
เลยรินน้ำจอกน้อย ให้เลาได้ ล่องคอ
ลาอ้ายแหล่แล้วก้อ ผ่ากะเตี่ยว บ่เหลียวหลัง
นั่งสองแถวทะยานลัด สู่แดนอะบายพุ้น
บ่ทันโดนกะมาฮอด ประตูเมือง ซุ้มบักใหญ่
เห็นคนไหลแล่นเข้า จนดินฟุ้งไหง่ระงม
เสียงมันทมทมเว้า เย้าแหย่สนุกสนาน
เทิงหนุ่มบาวสาวปาน ม่วนยิน โฮฮ้อง
เลยเล่าถือของต้อน ไปหายาม ผู้เฝ้าเขต
บักยามเปรตผั่นเว้า ว่าโตเจ้า นี่แม่นไผ
ข่อยเลยจาระไนเว้า กับยาม พอแจ้งข่าว
ข่อยนี่ล่ะหนุ่มหน้าลาว คนรูปหล่อจากบ้าน  เฮือนห้องแห่งมหา
อยากสิมาหาเจ้า พ่อลุงยม อ้ายอี่พ่อ
ตั้งนานโดนกะด้อ บ่เคยพ้อพบกัน
มันกะเลยจาเว้า เซามีแฮงสาก่อน  เด้อ
ข่อยสิจรไปบอกท่าน รายงานแล้ว เจ้าจั่งเจอ
ข่อยเลยว่าเอ้อเอ้อ ให้ฟ้าวแหน่ อย่าโดนนาน
บั้งเหล้าขาวเด่ให้มัน  กรึ๊บแฮงแฮง จั่งเดินย้าย
มันไปรายงานท่าน  ยมบาล ท่านพ่อ
ว่าบักหนึ่ง ดำดำเตี้ยม้อต้อ อยากมาเฝ้า ท่านพ่อขุน
หน้าเป็นสีคุ้นคุ้น แถวบ้านไผ่ มัญจา  นี่ล่ะ
มันหากมาคนเดียว หาบเหล้าขาว มาด้วย
ฮ่วย...เปรียวเปรียวเร็วไวฟ้าว เอามันมา หากูด่วน
แดดสิจวนบ่ายคล้อย ย้านมันฮ้อน แดดตาย
มือคัวบายไหเหล้า เทิงยาดอง รีบเร่ง
เล็งใส่บ่อนท่อนท้าว เจ้าของบ้าน กะทะหลวง
เลยมาเถิงห้องกว้าง ถ้ำแท่น แดนทองแดง
แงงไปเห็นสาวจี หนุ่มคะนอง เลียนร่าย
บักพ่อชายบ่นุ่งผ้า ป๋าหำโปง ลากแก่
อี่แม่ญิงกะแก้ ขนม๋อยลาก แก่ขี่ดิน
หูได้เสียงเอิ้น  กำลังดูเพลินเพลิน...มาถะแม้  บักตาปลอก    พะนะ
กะเลยออกจากหั่น  มากรานก้ม อี่พ่อยม
ผมหน้าลาวเด้อท่าน กะขอกราน ก้มกราบ
มวลหมู่หาบ ของต้อน  ขอถวยท่าน  อี่พ่อบาล
หลานนี่มายามเยี่ยม อยากเห็นเมือง พ่อลุงอยู่
สิสวยหรูเลิศล้ำ หรือแร้น  ยากเข็ญ  ซั่นดอก
เลาเอนพิง เตียงน้อย  อยู่เทิงหิน ก้อนเรียบ
ยกขาเหยียบ ขอบตั่งน้อย  หำผั่นย้อย ซอดกระเบน
ข่อยแลเห็น แล้วกะเลยอดไว้ คันหัวขวัญ เพิ่นสิด่า
ไข่หำท่อกะต่า ตั้งก้อนหินเอ้าเย้า อยากเอาเมี้ยน ให้พ่อลุง อยู่ดอก
อเวจีนี้หั่งยุ่ง มีแต่คนเว้ายาก หน้าลาวเอ้ย
มีแต่บักขี้ดื้อ ความเว้า นั้นเห่อเหิม
กูนี้อุตส่าห์เพิ่ม โทษใหญ่ หนักหนา
มันกะมาเดินขบวน อยากแก้ธรรม มนูญบ้าง
พวกมู๋ถูเอาสีข้าง ดึงดัน ปั้นแต่ง
ยุทุกเช้าทุกแลง ปั่นพวกผีเผดเป้า ให้มันร่วม ป่วนเมือง
บาดนี้มาเข้าเรื่อง ถามไถ่ ลุงหลาน
นานโดนมาเป็นปี จั่งด่วนมา ยามเยี่ยม
เตรียมหยังมาล่ะท้าว หลานหน้าลาว ผู้ฮ้ายใหญ่
พวกเหล้าไหไก่ต้ม เอามาต้อน อี่พ่อลุง  บ่น้อ
ข่าวว่าซุมทางบ้าน อีสานเฮา แห้งไง่  ว่านา
ฟ้าฝนบ่หยอดให้ ทางน้ำ นั้นขาดเขิน
นายกเพลินแต่หาเล่น บ่เหลียวแล ประชาราษฎร์
สามร้อยบาทว่าสิให้ กะมีน้อย บ่ทั่วถึง
บาดนี้หั่งหนักอึ้ง สองล้านล้าน บาทเข้ามาถม
คนจนจมธรณิน หนี้สิน นั้นพูนเพิ่ม
พากันเหิมหากันห่าว ผู้แทนควาย ความคิดหม่อ
ยืมมาแล้วหาทางฉ้อ  เอาเงินเข้า ใส่ถง
คนบ้านดงปัญญาตื้น หลงเชียร์ ให้เป็นใหญ่
ได้เป็นแล้วบ่เห็นไผ ออกมาพ้อโผล่หน้า จาต้านไต่ถาม
เอ้า..บาดนี่ยกตุงเหล้า บักสองซาว ถวยอี่พ่อ
ปลาไหลเผือกหนึ่งกระทอ เอามาดองใส่เหล้า กินแล้วมันจั่งแข็ง
ในย่ามแดงนั้นส้มม้า ซ่อยกำลังวังชา บ่มีล้า ถดถ่อย
เหลียวเห็นเผดส่ำน้อย จั่งตึงเต้น คึกคะนอง
ถองลงไปสองสามแก้ว คุยกันนัว หัวกันม่วน
ลุงยมเพิ่นเลยชวน ปิ้งอี่แฮ้งแกล้มเหล้า สาน้อหล่า อยากให้ซิม  พะนะ
ข่อยบ่ปากได้แต่ยิ้ม อยากลองเบิ่ง คือกัน
มันสิกุยเหม็นคาว หรือว่าหอม อยากลองลิ้ม
ซิมเหล้าเหมิดตุงแล้ว ซงตาลาย ย่างบ่เที่ยง
พ่อลุงลงจากเตียง เซถลาท่าวล้ม ยังคุยจ้อ “กูบ่เมา” พะนะ
บักหน้าลาวมึงอยากได้ เผดอีได๋ ไปเลือกเบิ่ง
มื้อนี้ลุงอยากเลี้ยง หลานหล่า เจ้าอย่าเกรง
เลากะเค็งเค็งเว้า บักแหล่เอ้ย พากูย่าง เบิ่งน้า
อยากไปเลาะเบิ่งอ่าง หม้อกระทะน้ำฮ้อน ย้านมันปลิ้น เงี่ยงหงวย
สวยเอ้ยสวยตอนหล่า โยติกา ลุงยมเมาไว้นี่ก่อน
มื้อใหม่จั่งมาออน เฟสบุ๊คให้ม่วนแม้ง  ขอโจ่ะไว้ก่อนอัญญา
5555ฮิ้ว ๆๆๆๆๆๆ

สาธุการบทความนี้ : 223 ครั้ง
จากสมาชิก : 3 ครั้ง
จากขาจร : 220 ครั้ง

06 ก.ค. 2556 เวลา 19:38:14

โพสต์โดย

คห.ที่2455) ย้อนฝนแล้ง [ไปที่ความเห็นนี้ ในกระทู้นี้]

ข้าวในนากะตายแล้ง เงินค่าดองน้องกะแพง บ่มีหยังสิคึดต่อ ล่ะหล้าเอ้ย
ควายเทิกตู้ของอีพ่อ ก็หากมาท่าวล้ม ย้อนมันเฒ่า แก่คิง
สามร้อยบาท นั้นกะมิดอิ้งติ้ง โรงงานบ่ สนใจ
เหลียวทางใด๋ บ่เห็นแปว ป่องหวัง สิมีเค้า
อันสัญญาที่เคยเว้า อ้ายยังจำ บ่มีล่า ดอกหล่า
ยังคิดฮอดอำคา ผู้เคยจาปากเว้า สิเอาเข้า ฮ่วมเตียง
ฝากสำเนียงผญาเว้า เถิงนงเยาว์ แก้มจุ่นพุ่น
ปีนี้อ้ายบ่มีทุน พอสิได้แต่งน้อง อดรออ้าย จักเคิ่งปี
บัดเทื่อบุญ ห่าถืกล็อตเตอรี สิฟ้าวแต่งขันขอ ตั้วนาง
อดสารอ อย่าเลยละ หล่ายสัญ-ญาอ้าย
เดือนหงายหงายคืนนี้ อ้ายขอฝากวาจี เถิงผู้แก้ม ป่ายหล่าย
น้องเจ้าอย่ามีชาย ผู้อื่นมาเข้าซ้อน นอนส้วม ก่อนพี่มา
เด้อหล้าเอ้ย

สาธุการบทความนี้ : 344 ครั้ง
จากสมาชิก : 1 ครั้ง
จากขาจร : 343 ครั้ง

23 ส.ค. 2556 เวลา 11:58:39

โพสต์โดย

คห.ที่0) เพลงหวานของบ้านทุ่ง [ไปที่ความเห็นนี้ ในกระทู้นี้]

ตาเว็นแดงจวนค่ำ ฟังลำนำของชาวท่ง
เสียงนกตูม ฮ้องตู้มตู้ม งานตากล้า หว่างสิถอน
นกคืนคอนตอนค่ำ อีกาดำบินกลับถิ่น
ออกหากินตั้งแต่เช้า แลงแล้วได้ต่าวฮัง
ฟังเสียงกบนาฮ้อง กังวานไกล เอ้บแล้วเอ้บ
แอ๋แล้วแอ๋อิ่นอ้อย จ่านาน้อย ฮ่ำฮอน
ขวยกี่ซอนมันอ้น แจคันแทหม่องน้ำขาด
เป็นคลองคูคดเคี้ยว ปานเอ็นเส้น ปูดโปน
คนกะฮือฮือฮ้าย ควายบักเล ให้ฟ้าวย่าง
ทางขี่โผ่จื้นจื้น เอาเด็กน้อย ขึ้นขี่หลัง
เสียงดังโหม่งโหม่งตึ้ง โปงญาคู เพิ่นทุ้งทั่ง
ระฆังเหง่งเหง่งหง่าง ผสมตู้มโหม่งแซม
ดวงจันทร์แฮมกลางเดือนเก้า พรรษาเนา พ่วมเคิ่ง
พ่อทายกถือดอกไม้ ไปไหว้ บ่มศีล
ยินเสียงเพลงดังแว่ว หวานหวานของบ้านท่ง
เลือดอีสานเข้มข้น ออนซอนซึ้ง ซาบเสียง
แสงตะเกียงรี่รี่ ไหวไหว ลิบลี่
ลมทุ่งวีฟาดต้อง เรไรฮ้องแอ่วผสม
ชมพระจันทร์ดวงแหว่ง ยามแลง คึดฮอดอุ่น นางเอ้ย
โอ้แม่คุณของบักอ้าย ปานนี่ อยู่จั่งใด๋ เด้น้อ...

...................................

สาธุการบทความนี้ : 525 ครั้ง
จากสมาชิก : 5 ครั้ง
จากขาจร : 520 ครั้ง

06 ก.ย. 2554 เวลา 19:47:51

โพสต์โดย

คห.ที่8) ต่ออีกจักกลอนเนาะ 55555 [ไปที่ความเห็นนี้ ในกระทู้นี้]

แดดแฮงแฮงตาเว็นคล้าย บ่ายบ่ายระอุอวล
เลยเล่าซวนสหายฮัก ไปเบิ่งแงง นาข้าว
เดียวนี้กลายเดือนเก้า ผะดับดิน พวมผ่าน
อีกจักหน่อยบ่นาน บุญข้าวสากจ้อจั้น เดือนสิบมื้อจวบเพ็ง
เล็งใส่นาท่งห้วย หม่องเคยหา ดักลอบ
น้ำไหลหลี่ล้นต้อน ยอสะดุ้ง ใส่ไซ
เสียบคันเบ็ดเอาไว้ ตามขอบ คันแทนา
ฟังเสียงปลาตะเพียนขาว สวบกิน ใบข้าว
เบิ่งปลาโดปลาค้าว สะยานตน สวบไล่
ซุมหมู่ซิวกุ้งน้อย สะยานย้าน สั่นสาย
สหายเอ้ย...ให้โตยายคันเบ็ดไว้ เฮาสิเสียบนำหลัง เด้อ
เบิ่งทำเลให้มันเหมาะ จั่งสิหมาน บาดยามล่อ
พอให้มีแนวได้ เอาเมือเฮือน ต้อนอีแม่
พอให้เพิ่นได้แผ่ เอียบเกลือไว้ตากแห้ง ก่อนเถิงมื้อ สิแต่งทาน
บ่ทันนานเสียงน้ำ ฟองกระจาย ดังซวดซาด
ป้าดถีโธปลาค่อโหล่ มันดิ้น แกว่งไกว
ต้นข้าวกวยนวยเนิ้ง เบิ่งเอาตี้ มันลากแก่
คันเบ็ดอ่อนแตแซ ฟ้าวไปเอาแมะเพื่อน มันสิหลูด เลิ่งหนี เด้
ยามหลายทีเลาะหลายครั้ง ย่างไปมา กะเลยเมื่อย
ขอแวะเซาพักยั้ง เถียงนาน้อย บ่อนเดิม
เงยเบิ่งฟ้ากะเริ่ม ตั้งเหง้า เงาทะมึน
ฝนสิรินเททก ดั่งวสันต์ โดยด้าม
ต้นข้าวงามรอคอยท่า สาวนา มาเก็บเกี่ยว
อ้ายรอน้องมาจับเคียว เกี่ยวข้าวฮ่วมบักอ้าย อย่าลืมถิ่ม ถิ่นอีสานเด้อ หล่าเอ้ย

สาธุการบทความนี้ : 417 ครั้ง
จากสมาชิก : 4 ครั้ง
จากขาจร : 413 ครั้ง

11 ก.ย. 2554 เวลา 10:04:54

โพสต์โดย

คห.ที่11) วิบัติภัย [ไปที่ความเห็นนี้ ในกระทู้นี้]

เดือนสิบฝนเร่งจ้าว หน่ำหน่ำ ฮำลง
เทิงนาดงนาดอน อุทกธาร พูนเพิ่ม
เติมเทิงแลงเทิงเช้า ฮวยโฮย บ่ได้ขาด
ธรรมชาติแต่งปั้น สวรรค์แต้ม แต่งแปลง
ฝนแฮงแฮง ต่อกันมาหกเจ็ดมื้อ แสงตาเว็น บ่พ้อโผล่
ซุมนาโคนาคน้ำ สนุกเล่น เริ่งใจ
ซุมคนอยู่ทางใต้ แสนลำบาก เหลือหลาย
ทางถนนหลายสาย กะขาดตอน ตัดต้อน
ลังคนนอนอยู่ในบ้าน เผลอเผลอ น้ำท่วมแซ่
ต้องขนของจากบ้าน หนีน้ำ เสี่ยงฝน
ฟังข่าวซ่าจ้นจ้น ภูเขาเลื่อน ดินไถล
ชีวีมรณังไป ทั้งหนุ่มสาว เด็กน้อย
เบิ่งเอาเด้อคนเอ้ย.... มันหากเถิงบ่อนคล้อย มนุสสา สิตกยาก
ย้อนตนเองเป็นผู้สร้าง บ่เห็นช่อง ป่องแปว
เฮ็ดให้แนวฮีตเค้า ขาดด่าน บ่สมดุล
หนาวกะหนาวเหมิดแฮง ฮ้อนกะเกิน บ่พอก้ำ
ฝนกะฮำฮำฮ้าย เกินกลาย บ่อนสิเกิ่ง
คึดเบิ่งดู้พวกหมู่เจ้า คนกะก้ำ เกิ่งกัน
มีแต่ดันเกินก้าว บ่มีถอย ให้ก้ำเกิ่ง กันแหล้ว
กูนี่คิดจั่งใด๋ มันต้องเป็นจั่งซั่น บ่มีกั้น ก้าวเจ้าของ
แต่ละคนมองสุดโต่ง บ่มีก๋า หม่องมันแม่น
บักหม่องฮักหม่องแก่น บ่มีเลยสิคึดพ้อ โอน้อโอ้ย ได้แต่โอย พี่น้องเอ้ย

สาธุการบทความนี้ : 516 ครั้ง
จากสมาชิก : 2 ครั้ง
จากขาจร : 514 ครั้ง

20 ก.ย. 2554 เวลา 07:55:32

โพสต์โดย

คห.ที่12) กระต่ายหมายจันทร์ [ไปที่ความเห็นนี้ ในกระทู้นี้]

ดวงจันทร์แจ้ง แสงใส สิบห้าค่ำ
บ่มีเมฆหม่นเศร้า มาปิดจ้าสว่างตา
ซ่างมาคือใบหน้า ผุลังคน ของพี่ แท้น้อ
ลมหนาวพัดหวี่หวี่ แสงจันทร์สาดเข้าป่องเอี้ยม เฮียมอ้าย ได้แต่มอง
มื้อได๋เด้น้อน้อง เจ้าสิโหยด มาโลมใจ
มื้อได๋น้อคนงาม สิโหยดลง มาหาอ้าย
ได้แต่หงายแหงนหน้า คอยแต่ชมจันทรา ซินซาตา ซาติกระต่าย
ได้แต่หมายหล่ำจ้อง คองถ่า อยู่ขี่ดิน
เหมยหมอกรินโรยเร้า ใจเฮาเอ้ย นี่หนาวสั่น
สาธุเด้อ ขอให้บุญอ้ายเกี่ยวฝั่น ดังฝันอ้าย ที่เกี่ยวปอง
มื้อนี้คิดฮอดน้อง ได้มาส่อง เบิ่งดวงจันทร์
ข่าวกลางวัน ว่าสิมีพระราหู มาคาบอม เอาน้อง
หลายคนคองคอยถ่า ปรากฏการณ์ ธรรมชาติ
หวังสิเห็นจันทร์มืดเศร้า ราหูเข้า ห่มพระจันทร์
บาดว่าใจอ้ายนั้น ซ่างไหวหวั่น บ่คือเขา แท้น้อ
คือมีลางมาคอยแนม ส่งข่าวมา ให้ชายฮู้
ย้านแต่ตู๋หลูหน้า มีชายมา ถ่าวอนเหนี่ยว
แอบมาจีบนารถน้อง แล้วโอมเจ้า เข้ากล่อมสอง
เดิกเดิกมา ลมล่วงต้อง ใบไผ่ หัวใจหวิว
น้องคงนอนหลับใหล นิ่งนิทรา อยู่กรุงกว้าง
ฝากดวงใจของอ้าย ตามสายลม มาตุ้มห่ม แหน่เด้อ
ลมเอ้ยลมเจ้าจ่งเข้าป่องเอี้ยม ไปหอมหล่า ต่างพี่ชาย แหน่เด้อ ลมเอ้ย

สาธุการบทความนี้ : 461 ครั้ง
จากสมาชิก : 1 ครั้ง
จากขาจร : 460 ครั้ง

15 ธ.ค. 2554 เวลา 19:58:31

โพสต์โดย

คห.ที่14) นมโต้น ตีนเปิ่ม ไผกะเห็น [ไปที่ความเห็นนี้ ในกระทู้นี้]

***งูเห่าขดขี่คู้ ฟักไข่ อยู่ในโพรง
คองคอยรอบุตรา สิโผล่คลาน ออกมาเลื้อย
บ่ให้มี ไผมาใกล้ ฮวงฮัง โพรงอยู่
ฮ้ายพอปานซาติเซื้อ นางเสือเลี้ยง ลูกคีง
มื้อหนึ่งนาง กุดโตน้อย ซวนบุตรี ออกคุ้ยเขี่ย
หากินปลวก เลาะฮั้ว เลาะโพนส่าง ส่องฮู
นางกะดู๋ เหลือฮ้าย คุ้ยเขี่ย ตามประสา
หามดแมง มากิน ป้อนลูกไป ตามเรื่อง
ตามมองเมียง แลจ้อง มองเห็นงู อยู่โพรงปลวก
นางกะเรียกลูกน้อย มาแม้หล่า เจ้าอย่าไป
เห็นบ่ตีน อันใหญ่เฟิ้ม ของงูเห่า เจ้าเล็งดู..เบิ่งดู้
มันสิโถมมาถึง ทืบลง หัวเจ้า
เฮามาหนี ไปไกลโพ้น ไปจากโพน หม่องงูอยู่..เถาะหล่า
เจ้าอย่าไปใกล้งู มันหากเชื่อบ่ได้ สิกินเจ้า ท่าวตาย หล่าเอ้ย
ฝ่ายแม่งูกะเว้า เจ้าอย่าเขี่ย โพรงฮัง..ข่อยเด้อ ไก่น้อยเอ้ย
บ่มีหยังให้เจ้ากิน ปลวกแมง บ่มีแล้ว
แนวเจ้ากิน ตอนเช้า กะคือนม ของแม่..เจ้าเด้
คันลืมกิน เจ้าสิรั้ง โตน้อย จ่อยผอม
เบิ่งแหน่ตี้ นมโต้น ของมารดา เจ้านั้น บ่ทันดูด
ไปถะแม้บักหล่า อย่ามาคุ้ย เขี่ยขี่ดิน เถาะ...หล่าเอ้ย
ข่อยได้ยินคำนี้ ทบทวนแล้วหลายที ปึกเอาฮ้าย บ่ซอดซ่อง
บอกแหน่เด้อพี่น้อง ความหมายนั้น ว่าจั่งใด๋... อัญญาเอ้ย

สาธุการบทความนี้ : 413 ครั้ง
จากสมาชิก : 2 ครั้ง
จากขาจร : 411 ครั้ง

19 พ.ค. 2555 เวลา 17:56:26

โพสต์โดย

คห.ที่16) ความจริง จากลูกชาวนา [ไปที่ความเห็นนี้ ในกระทู้นี้]

***คนอัปรีย์ขึ้นนั่งบ้าน เฮือนซาน กะเพมุ่น ...พี่น้องเอ้ย
ชาวประชากะวุ่น ถืกเขานั้น ปั่นหัว
ปัญญามัว บ่ใสแจ้ง จักสิเซื่อ ทางใด๋
ไผกะดีของไผ คนอื่นทราม ยามเขาเว้า
โตเฮาเอง กะภูมิด้อย เฮ็ดแต่นา คราดแต่ไฮ่
ไผผู้ดี ไผผู้ฮ้าง ตกยามนี้ คึดบ่เห็น
เบิ่งเขาพากันเล่น ในสภา ออกอากาศ
ป้าดถีโธ พวกผีบ้า หมาอยู่บ้าน บ่ส่ำเขา
เบิ่งเอาเด้อหมู่เจ้า ไผคนถืก ไผทำผิด
ไผทำดี ไผทำเลว ให้พิจารณ์ ให้มันถ่วน
กรรมทั้งมวลที่เขาสร้าง กำลังมาตันทาง ให้เมืองบ้าน เฮาปั่นป่วน
ทุกข์ทั้งมวล พวกเขาบ่รับรู้ พวกเฮานี่ ล่ะรับกรรม ...พี่น้องเอ้ย

สาธุการบทความนี้ : 355 ครั้ง
จากสมาชิก : 2 ครั้ง
จากขาจร : 353 ครั้ง

02 มิ.ย. 2555 เวลา 07:16:45

โพสต์โดย

คห.ที่17) เสียงจากสภาสู่เถียงนาน้อย [ไปที่ความเห็นนี้ ในกระทู้นี้]

***สามร้อยบาทกะได้แล้ว ค่าแรงสูง เพิ่นกะจ่าย แล้วเด้อ
หมื่นห้ายายเรียบร้อย เป็นสังเจ้าจ่มบ่เซา
อยากได้หยังกะให้เจ้า ไปนำกันเหมิดสุอย่าง
บ่พอหรือสิเอาหยัง อีกบาดนี้ น้อท่านราษฎร
ส่วนที่นอนหมอนมุ้ง รวมทั้ง ปัจจัยสี่
บ่มีส่วนเกี่ยวข้อง สิแพงขึ้น แล้วแต่เขา
สู้บ่ได้แล้วแต่เจ้า อย่ามาจ่ม ไส่ฮูหู
สิอดตายแล้วแต่เธอ บ่ได้หัว ซาย้อน
ขอนอนเทิงสวรรค์ฟ้า อยู่ส่ำเทวดา สอสอสนุกยิ่ง
ตายสาซุมฮากหญ้า อย่ามาเว้ากวนส้นTeen
555555555 55555555 5555555

สาธุการบทความนี้ : 371 ครั้ง
จากสมาชิก : 1 ครั้ง
จากขาจร : 370 ครั้ง

09 มิ.ย. 2555 เวลา 12:09:06

โพสต์โดย

คห.ที่18) เสียงครวญจากบ้านนอก [ไปที่ความเห็นนี้ ในกระทู้นี้]

***ทางสภากะยากยุ่ง การเมือง กะยาดแย่ง
ชาวนากะยากล้น เตรียมไถคราด หว่านดำ
ฝนกะฮำลงพื้น ดินกะเย็น น้ำกะซุ่ม
แต่กระเป๋าผั่นขาดแห้ง เงินใช้ กะบ่มี
เจ้านายเอ้ย...คือว่าดีคักแท้ ถ้าได้นั่ง ครองเมือง
อยู่กันมาจนเป็นปี บ่ห่อนมี หยังดีขึ้น
มีตะบืนสิหาแก้ ธรรมนูญ เพื่อไผหน่อ
คือบ่มีไผมาผ่อ ถามสุขทุกข์ พวกฮากหญ้า คาแต่สู้ เพื่อเจ้าของ... ซั่นบ้อหือ

สาธุการบทความนี้ : 389 ครั้ง
จากสมาชิก : 1 ครั้ง
จากขาจร : 388 ครั้ง

10 มิ.ย. 2555 เวลา 08:34:51

โพสต์โดย

คห.ที่19) จริงหรือเก้... [ไปที่ความเห็นนี้ ในกระทู้นี้]

***งัวควายตายกะยังได้ โครงกระดูก เขาหนัง
ซ้างสารตายในไพร กะจ่งงา อันมีค่า
บาดว่าคนเฮานั้น ตายลงไป บ่เหลือชีพ
เหลือหยังไว้ล่ะพี่น้อง พอได้ จ่มถึง
ตายเน่าเหม็นตึ้งตึ้ง บ่มีค่า พอสลึง
บ่มีแนวเป็นราคา กระดูกหนัง เขาเผาถิ่ม
ความดียังคงมั่น ให้พากัน ฟ้าวสร้างก่อ
บาดสังขารผ่านล่วง หลานเหลนหล่อน สิกล่าวถึง... ท่านเอ้ย

สาธุการบทความนี้ : 389 ครั้ง
จากสมาชิก : 1 ครั้ง
จากขาจร : 388 ครั้ง

14 มิ.ย. 2555 เวลา 22:38:24

โพสต์โดย

คห.ที่20) ขอทำดีบูชาแม่ [ไปที่ความเห็นนี้ ในกระทู้นี้]

***ไผเด้น้อ เคยถือเสียม คอนคุน้อย หาขุดกลอย ขุดมันเผือก
เลือกเอาแนว ใส่ป้อน ให้เฮาได้ อิ่มหนำ
แม่นไผนอ ทำงานสร้าง ทอแพร ผืนแผ่น
แม่นไผนอ คอยเซ็ดล้าง สรงน้ำ ส่วยคิง
ไผเด้น้อ กล่อมให้มิดอิ้งติ้ง ยามเข้าบ่อน เฮือนนอน
ไผเด้เอาสองกร มาหอบโซม ให้กินจู้
ไผเด้น้อ สอนให้เป็นคนฮู้ เตินเตือน ให้ฮู้ฮ่อม
ไผเคยทาแป้งหอม น้ำอบน้ำขมิ้น ให้ผิวได้ ผ่องใส
ยามเฮาทุกข์ฮ้องไห้ ไผเล่าปลอบ คอยประโลม
ยามหัวลมพานพัด ล่ะแม่นไผ ผู้คอยตุ้ม
ซุมหมู่ดารณีน้อย ให้พากัน ครวญใคร่ แหน่เด้อ
มื้อนี้... มือเคยไกวอู่น้อย อ่อนแฮงล้า สั่นเทา
เวียกเคยเอา เดียวนี้เอื้อน เฮือนเคยถู กะต้องหล่า
ปูปลาเคยอ่อมต้ม กะเลยเว้น เฮ็ดบ่ไหว
นางเอ้ย..เจ้าอย่าไลลืมเฒ่า ผู้เคยเพียร เคยฮักห่อ
อดสาเลี้ยง เจ้าแต่น้อย อย่าลืมเฒ่า ให้นั่งเหงา
เตรียมเอามาลัยน้อย ประคองกร ไปก้มกราบ
บาทผู้คุณเลิศล้น เหนือฟ้า ล้นแผ่นดิน
แม่เอ้ย...เหมิดชีวินของลูกนี้ ขอประกอบแต่ความดี
เอามาปลงไว้บาทแม่
ต่อไปนี้สิดูแล บ่ให้แม่เดือดร้อน ต้องโหยล้า เมื่อยคิง เด้อแม่เอ้ย...

สาธุการบทความนี้ : 391 ครั้ง
จากสมาชิก : 2 ครั้ง
จากขาจร : 389 ครั้ง

11 ส.ค. 2555 เวลา 09:44:55

โพสต์โดย

คห.ที่22) [ไปที่ความเห็นนี้ ในกระทู้นี้]

คุณปิ่นลม:

สุดยอดปรมาจารย์ กลอนอีสานอีหลี   ผมลองแต่งแล้ว
มันบ่ลื่นไหลครับ  สงสัยใจเฮาบ่เป็นอริระเสรีพอ

คำว่า  หล่า กับ ลุน     หอบโซม   ส่วยคิง

อ่านแล้ว หมากหัวใจ อ่วยข้ามหย่วย  แล่นแท้แล้ เมือบ้าน
ขอบคุณหลายๆ ครับ

ขอบคุณและยินดีกับคำชมของท่านครับ
สำเนียงของอีสานแต่ท้องถิ่นกะแตกต่างกันเนาะครับ

คำว่า "หล่า" ออกเสียงว่า ลา ตามท้องถิ่นทางร้อยเอ็ดครับ ซึ่งแปลว่า ละ หรือ คลายออก ครับ
หากออกเสียงว่า หล่า ตามการผันวรรณยุกต์ กะสิแปลว่า ลุน คือท่านหรือหลาย ๆ คน เข้าใจครับ

หอบโซม แปลว่า อุ้ม ครับ

ส่วยคิง แปลว่า การชำระล้างร่างกายด้วยน้ำ คล้ายอาบน้ำครับ แต่ว่าใช้น้ำน้อยกว่าการอาบ ครับ

ขออนุญาต แปลเพิ่มเติมอีกคำหนึ่งครับ บางทีบางท่านที่เป็นวัยรุ่น อายุยังน้อย หรือบ่เคยได้ยินคนเฒ่าแก่โบราณเพิ่นคุยกัน อาจสิบ่รู้ความหมาย คำว่า "กินจู้" ความหมายกะคือ กินนม หรือดูดนม จากเต้านมของแม่ครับ

สาธุการบทความนี้ : 350 ครั้ง
จากสมาชิก : 1 ครั้ง
จากขาจร : 349 ครั้ง

11 ส.ค. 2555 เวลา 13:58:21

โพสต์โดย

คห.ที่26) [ไปที่ความเห็นนี้ ในกระทู้นี้]

คุณป้าหน่อย:

คุณยาว ผญาย่อย:
***ไผเด้น้อ เคยถือเสียม คอนคุน้อย หาขุดกลอย ขุดมันเผือก
เลือกเอาแนว ใส่ป้อน ให้เฮาได้ อิ่มหนำ
แม่นไผนอ ทำงานสร้าง ทอแพร ผืนแผ่น
แม่นไผนอ คอยเซ็ดล้าง สรงน้ำ ส่วยคิง
ไผเด้น้อ กล่อมให้มิดอิ้งติ้ง ยามเข้าบ่อน เฮือนนอน
ไผเด้เอาสองกร มาหอบโซม ให้กินจู้
ไผเด้น้อ สอนให้เป็นคนฮู้ เตินเตือน ให้ฮู้ฮ่อม
ไผเคยทาแป้งหอม น้ำอบน้ำขมิ้น ให้ผิวได้ ผ่องใส
ยามเฮาทุกข์ฮ้องไห้ ไผเล่าปลอบ คอยประโลม
ยามหัวลมพานพัด ล่ะแม่นไผ ผู้คอยตุ้ม
ซุมหมู่ดารณีน้อย ให้พากัน ครวญใคร่ แหน่เด้อ
มื้อนี้... มือเคยไกวอู่น้อย อ่อนแฮงล้า สั่นเทา
เวียกเคยเอา เดียวนี้เอื้อน เฮือนเคยถู กะต้องหล่า
ปูปลาเคยอ่อมต้ม กะเลยเว้น เฮ็ดบ่ไหว
นางเอ้ย..เจ้าอย่าไลลืมเฒ่า ผู้เคยเพียร เคยฮักห่อ
อดสาเลี้ยง เจ้าแต่น้อย อย่าลืมเฒ่า ให้นั่งเหงา
เตรียมเอามาลัยน้อย ประคองกร ไปก้มกราบ
บาทผู้คุณเลิศล้น เหนือฟ้า ล้นแผ่นดิน
แม่เอ้ย...เหมิดชีวินของลูกนี้ ขอประกอบแต่ความดี
เอามาปลงไว้บาทแม่
ต่อไปนี้สิดูแล บ่ให้แม่เดือดร้อน ต้องโหยล้า เมื่อยคิง เด้อแม่เอ้ย...

ขออณุญาติบาดคำ คั่นเอาไปลำใ่ส่แคน อยู่บ้าน
อ้ายสิว่าหยังบ่อน้อ บ่อได้ยอคูบา ...สิว่าแนวใด อ้าย.... คั่นบ่ออนุญาติ กะคือสิบ่อกล้าล่ะผู้ข่า...

ยินดีครับ สิมีวาสนาได้ฟังเพิ่นลำบ่น้อ ขะน้อย 555

สาธุการบทความนี้ : 336 ครั้ง
จากสมาชิก : 0 ครั้ง
จากขาจร : 336 ครั้ง

12 ส.ค. 2555 เวลา 05:57:45