ลูกเขยเล่นโบกกับพ่อเฒ่า เสียเงินให้พ่อเฒ่าเหมิดเอาโลด กะเลยคิดหาวิธี สิเอาเงินคืนเด้ ตาทีเนี่ย

(ให้เวลาเลาคิดจักหน่อยแหน่)...

... คิดออกแล้ว.....

ลูกเขยกะเลยไปบอกพ่อเฒ่าว่า

“ พ่อ มื้ออื่นเซ้า พ่อผู้ใหญ่บ้าน สิแก้ผ้าเอา....(อั่นนั่นล่ะ) ให้พ่อเบิ่งเด้ แค่พ่อ ย่างไปขอเบิ่งท่อนล่ะ กะได้เบิ่งแล้ว..”

“ เฮ้ย กูบ่เซียซะพอแฮงล่ะ คนใหญ่คนโต จั่งพ่อผู้ใหญ่บ้าน จั่งได๋สิมากล้าแก้ผ้า ป๋า...(อั่นนั่นล่ะ) ให้ผู้อื่นเบิ่งเว่ย.. เป็นไปบ่ได้ เป็งปายม่ายล่าย...” พ่อเฒ่าเลาคัดค้าน

“ คันพ่อบ่เซีย มาพนันกันบ่ล่ะ เอาจัก ห้าร้อย เนาะพ่อเนาะ”

“ โอเช .. โอเช..ห้าร้อยเด้อบักทิด ”

ตกลงเงินพนันกันเรียบร้อยแล้ว พ่อเฒ่ากะยิ้มย่วยๆ ว่าสิได้เงินลูกเขยมาฟรีๆ ส่วนลูกเขยกะยิ้มย่วยๆ คือกัน ว่าสิได้เงินคืนสามร้อย จากนั้น ลูกเขยกะไปหาผู้ใหญ่บ้าน บอกว่า

“ พ่อผู้ใหญ่ มื้ออื่นเซ้า....(อั่นนั่นล่ะ) เจ้าสิโปเด้ ”

“ หาว่าไปทั่วหลาย ของมันอยู่ดีๆ จั่งได๋สิไปโป กูบ่เซียดอก” พ่อผู้ใหญ่เลาคัดค้าน

“ คันบ่เซีย มาพนันกันกะได้ ข้อยพนันว่า มื้ออื่นเซ้า... (จุดจุดจุด) เจ้าสิโปอึ่งลืง.. เอาจักร้อยเนาะ”

“ โอเช โอเช ได้เลยบักทิด มันบ่โปแน่นอน ”

“ คันจั่งซั่น ต้องหาพยานในการเบิ่งเด้ เอาพ่อเฒ่าของข้อยดีบ่”

“ เอ้อ เอาจั่งซั่นกะได้ ”

ลูกเขย จัดการทุกอย่างตามแผน ส่วนพ่อผู้ใหญ่บ้าน กะพยายามระมัดระวังอย่างดีคัก สิกิน สินั่ง สินอน สิย่าง กะระวังอย่างคัก แล้วกะเข้าห้องไปตรวจเบิ่ง ทุกชั่วโมงเอาโลด ไปเบิ่งยามได๋ มันกะปกติดีอยู่คือเก่า กะยิ้มย่วยๆ ว่าสิได้เงินพนัน

“ เอาว่ะ เปิด... (อั่นนั่นล่ะ) ให้บักพ่อเฒ่าเบิ่ง แลกกับเงินร้อยบาท คุ้มอยู่ดอกเว่ย..” เลาคิดในใจ

ตื่นเซ้ามา ทั้งสามคนเตรียมพร้อม ต่างคนกะต่างคิดว่า สิได้เงินพนัน พ่อผู้ใหญ่บ้าน ก่อนออกจากห้อง กะตรวจเบิ่งอีกเทื่อนึง... บ่โป ...จั่งค่อยย่างไปจุดนัดพบ พอพ้อหน้าพ่อเฒ่า พ่อเฒ่ากะ ฮ้องบอกว่า

“ ไส ไส ข้อยขอเบิ่ง.... (อั่นนั่นล่ะ) เจ้าแหน่ ได้บ่ ”

“ มาติ๊ล่ะ มาเบิ่งใกล้ ๆ ”

พ่อผู้ใหญ่บ้านเว้าแล้ว กะย่างเข้าไปเปิดออกให้เบิ่งอย่างดีใจ (ดีใจว่ามันยังปกติ บ่โป นั่นล่ะ)

สรุปสาเนาะ สรุปว่า

พ่อเฒ่า เสียเงินให้ลูกเขย ห้าร้อยบาท

ลูกเขย เอาเงิน ร้อยบาท ที่ได้จากพ่อเฒ่าไปให้ ผู้ใหญ่บ้าน

เจ้าของ เหลืออยู่ สี่ร้อยบาท

ผู้ที่เสียเงินกะคือพ่อเฒ่า

พ่อผู้ใหญ่บ้าน ชนะพนันได้เงินยุ แต่กะต้องเปลืองโตเปิด...(อั่นนั่นล่ะ) ให้พ่อเฒ่าเบิ่ง

ส่วนลูกเขยแค่วางแผน บ่ต้องเปลืองโต เปลืองตังค์ ได้เงินตั้งวะสี่ร้อยบาท สะล่ะล่ะ...