พญาคันคาก ได้ปกครองบ้านเมือง โดยธรรม จนชาวเมืองทั้งหลาย หันมาเคารพ นับถือบูชาพญาคันคาก.... ต้องการอีหยัง กะมาบอกพญาคันคาก..จนลืมบูชาพญาแถน ลืมไหว้พญาแถน ผู้เป็นใหญ่ในเมืองฟ้า... เฮ็ดให้พญาแถนน้อยอกน้อยใจ จนกลายเป็นเคืองแค้นโกรธา

"อ้ายมนุสสาสรรพสิ่งทั้งหลาย มันไม่ยำเกรงเคารพต่อกูอย่างนี้เสียแล้ว จำกูจักสั่งสอนมันเสียบ้าง ให้มันฮู้แฮงฟ้าพญาแถนเป็นใหญ่ ให้มันทุกข์แร้นแค้น แหงนหน้าเปล่าดาย สานอ..."

     แต่นั้น แถนจึงปิดเมืองฟ้า ตันแปวพญานาค บ่ให้ขึ้นเหล่นน้ำ ให้เฟือนเฟียด เกิดฝน แล้วทั้งสากลโลก ก็บังเกิดความแห้ง แล้งทุรกันดาร ดินหินทราย สรรพสิ่งสรรพสัตว์ทั้งหลาย ต่างก็หอดหิวฮ้องโอดโอยทุกขะแหล่ง แล้งเลือดขุ่น ตายม้วยระบาดหงาย ดินและทรายหมกไหม้ ป่าก็วายสายธารแห้งกิ่น ๆ ลมปิ่นไง่ง้องเผาขั่วไหม้ชะเล ซั่นแหลว

    ฝูงคนทั้งหลาย เกิดความเดือดฮ้อนไปตามๆ กัน กะเลยพากันไปเฝ้าพญาคันคาก เกิดเป็นการชุมนุมรวมคนหมู่ใหญ่ มีพญาคันคากเป็นประธาน หลังจากโสกันไปโสกันมา กะได้ทราบว่า พญานาคบ่ได้ขึ้นไปเล่นน้ำ ย่อนพญาแถนปิดป่องแปว บ่ให้ขึ้นไปได้ ฝน กะเลยบ่ตกลงมา

“ฮ่วย...เป็นถึงพญาเมืองฟ้า เป็นหยังคือเฮ็ดจั่งซี้ … ทางที่ถืกที่ควร ควรสิประพฤติตนตามธรรม... ธรรม คือหน้าที่ หน้าที่ของพญาเมืองฟ้า คือการดูแลให้ชาวฟ้าชาวมนุษย์อยู่เย็นเป็นสุข...แต่นี่ พญาแถนเฮ็ดบ่ถือบ่ต้อง”...

     พญาคันคาก กะเลยส่งพญานกเค้าแมว ให้บินขึ้นไปเทิงเมืองฟ้า ทำหน้าที่เป็นทูตเจรจาขอให้พญาแถนเปิดป่องให้พญานาคขึ้นไปเล่นน้ำ

     พญานกเค้าแมว ขึ้นไปหาพญาแถน เล่าความลำบากยากเข็ญในเมืองมนุษย์ให้พญาแถนฟัง แล้วกะขอให้พญาแถนเปิดป่องให้พญานาคขึ้นไปเล่นน้ำในสระหลวงเมืองฟ้า

     พญาแถน โมโหอยู่แล้ว กะบ่ยอมเฮ็ดตามที่นกเค้าแมวขอ แถมบอกว่า

"ย้อนว่า สูบ่พากันย่านเคารพกู บ่บูชากู สูพากันบูชาบักพญาคันคาก…เมื่อสูทุกข์เดือดฮ้อน ให้หันหน้าไปพึ่งมัน นั่นถ่อน"…



     พญานกเค้าแมว เมื่อเจรจาบ่สำเร็จ กะได้นำความกลับมาบอกให้ที่ชุมนุมทราบ...

    พญาคันคากได้ฟังจั่งซั่น กะเลยประกาศสงครามกับพญาแถน เรียกชุมนุมสรรพสัตว์ทั้งหลาย เกณฑ์ไพร่พล ตั้งแต่สัตว์พิษเล็กๆ น้อย เช่นมด แมงงอด แมงเงา ขี้เข็บ งูเงี้ยวเขี้ยวขอ ไปจนถึงสัตว์พิษหลายเช่นพญานาคพร้อมทั้งวางแผนกลอุบายต่างๆ

     พญาคันคาก ได้สั่งให้พวกปลวก ก่อโพนขึ้นไปเรื่อยๆ เพื่อเป็นทางหรือเป็นสะพานให้กองทัพสรรพสัตว์เดินทางไปเมืองฟ้า

     พวกปลวกทั้งหลาย กะพากันสร้างโพน ต่อกันขึ้นไปเรื่อยๆ จนฮอดเมืองฟ้าพญาแถน...

     จากนั้น ทุกอย่าง กะกำลังดำเนินตามกลอุบายพญาคันคาก

     พวกมอด เป็นทัพหน้า เป็นหน่วยลับ ยกพลมอด ไปลักกัดเจาะกินด้ามดาบด้ามหอก จ๋อกินอาวุธทั้งหลายของทหารพญาแถน

     พวกมด แมงงอด แมงเงา ขี้เข็บ กะพากันยกพลแอบไปลี้จอบอยู่ตามเสื้อผ้า ชุดของทหาร เทิงชุดของพญาแถน

     พวกมิ้ม เทิงมิ้มน้อยมิ้มหลวง มิ้มขวางตะเว็น ต่อ แตนราม แตนฝ้าย แตนขี้หมา กะพากันยกพลไปลี้แอบจอบอยู่ตามซอกงาไม้ จอบอยู่ตามเฮือน ตามใต้หลังคา

     พวกงูพิษชนิดต่างๆ เช่น งูเห่า งูจงอาง งูแสงอาทิตย์ งูลายบักพริก งูสามเหลี่ยม งูเขียวหางไหม้ งูเขียวหัวโป งูแมวเซา กะพากันไป ไปฮอดงูบ่มีพิษเช่นงูลอกเซียก กะไปซ่อยหมู่พวกคือกัน.

     พวกนาค ที่มีพิษหลาย กะไปคือกัน